Shansi i fundit i PD-së për të bllokuar 30 Qershorin, Bardhi-gjykatësve: Mos legjitimoni kryebashkiakët e PS-së

Sekretari i Përgjithshëm i Partisë Demokratike, Gazmend Bardhi, i bëri thirrje gjykatave që të mos miratojnë vendimin e KQZ-së për shpërndarjen e mandateve të kryetarëve të 61 bashkive, fitues në zgjedhjet vendore të 30 qershorit. Bardhi tha se gjyqtarët duhet të mos vërtetojnë si të vlefshëm mandatet, ose të pezullojnë gjykimin derisa dekreti i presidentit që i anuloi zgjedhjet e 30 qershorit, të shqyrtohet nga Gjykata Kushtetuese.

Në një deklaratë për mediat nga selia blu, Bardhi tha se votimet e 30 qershorit ishin antikushtetuese dhe se mundësia e fundit që ato të shpallen si të paligjshme, janë gjykatat në të gjithë Shqipërinë.

"Sipas ligjeve të vendit, që një Kryebashkiak të marrë detyrën, mandati i tij duhet të vërtetohet nga gjykata, nëse është marrë në përputhje me Kushtetutën, nëse është fituar apo jo në zgjedhje të organizuara në mbështetje të Dekretit të Presidentit.Nëse gjyqtarët do të tregojnë integritet, do t’i binden ligjit dhe nuk do t’i nënshtrohen kërcënimeve me veting apo me mjete të tjera mafioze, të përdorura më parë nga Edi Rama, vendimi i tyre është shumë i thjeshtë: të respektojnë kompetencën kushtetuese të Presidentit për të shpallur datën e zgjedhjeve", tha Bardhi, duke shtuar se përsa kohë Gjykata Kushtetuese nuk është shprehur, "dekretet e Presidentit të Republikës janë në fuqi dhe të detyrueshme për zbatim".

Kjo deklaratë nga selia blu, në dukje një qëndrim më shumë në radhët e PD-së kundër procesit zgjedhor të 30 qershorit, është në fakt një hap pas i të djathtës drejt njohjes së 30 qershorit. Me kërkesën që Bardhi u bën gjykatave për të mos i vërtetuar mandatet, do të thotë se PD njeh institucionin e gjykatës si vendimmarrëse në këtë proces. Pra, në rast se gjykatat në të gjithë vendin, vërtetojnë mandatet e kryetarëve të bashkive miratuar edhe nga KQZ-ja, rrjedhimisht PD nuk ka më asnjë 'justifikim' për të mos njohur ligjshmërinë e zgjedhjeve vendore të mbajtur më 30 qershor, zgjedhje në të cilat Partia Socialiste garoi e vetme në më shumë se gjysmat e bashkive, pa kandidatë përballë, duke i fituar të 61 bashkitë.

Deklarata e plotë e Bardhit

Këmbëngulja kriminale e Edi Ramës për të zhvilluar votimet e paligjshme dhe antikushtuese të 30 Qershorit e ka çuar vendin 30 vjet mbrapa, në prag diktature, ku çdo pushtet e ka nën kontrollin një njeri i vetëm.

Sot, askush nuk mund të pohojë se votimet e 30 qershorit ishin demokratike, se ato respektuan Kushtetutën, respektuan të drejtën e qytetarëve për të zgjedhur dhe u kryen në funksion të interesit publik.

Me pohimin se “Gjykata Kushtetuese është i vetmi institucion që mund të bëjë vlerësimin e kushtetueshmërisë së Dekretit të Presidentit”, Misioni i ODIHR-it, i ka vënë 30 Qershorit, de fakto, vulën e paligjshmërisë.

Si një vend me kornizë ligjore kushtetuese demokratike, ekziston akoma mundësia që votimet e 30 qershorit të refuzohen edhe “de juro” si të paligjshme. Këtë mund ta bëjnë gjykatat në të gjithë Shqipërinë.

Të nderuar qytetarë!

Sipas ligjeve të vendit, që një Kryebashkiak të marrë detyrën, mandati i tij duhet të vërtetohet nga gjykata, nëse është marrë në përputhje me Kushtetutën, nëse është fituar apo jo në zgjedhje të organizuara në mbështetje të Dekretit të Presidentit.

Nëse gjyqtarët do të tregojnë integritet, do t’i binden ligjit dhe nuk do t’i nënshtrohen kërcënimeve me veting apo me mjete të tjera mafioze, të përdorura më parë nga Edi Rama, vendimi i tyre është shumë i thjeshtë: të respektojnë kompetencën kushtetuese të Presidentit për të shpallur datën e zgjedhjeve.

Gjyqtarët, ku kandidatët e votimeve të shfuqizuara me dekretin e Presidentit, do të paraqiten për të marrë mandatin e paligjshëm, kanë dy mënyra për të mbrojtur shtetin e së drejtës nga sundimi mafioz i një personi të vetëm.

1.            Të mos japin mandatet, duke vërtetuar pavlefshmërinë e 30 Qershorit.

2.      Të pezullojnë gjykimin, për shkak se çështja nuk mund të zgjidhet para se Gjykata Kushtetuese të vendosë për dekretet e Presidentit të Republikës.

Sa kohë Gjykata Kushtetuese nuk është shprehur, Dekretet e Presidentit të Republikës janë në fuqi dhe të detyrueshme për zbatim.

Kushdo që pohon të kundërtën, nxit anarkinë, nxit vetëgjyqësinë, nxit anormalitetin.

Këta gjykatës kanë dorë të vendosin nëse shqiptarët do të kenë mundësi të nisin së shpejti bisedimet për anëtarësim me Bashkimin Europian apo do të jenë njerëz të izoluar, që jetojnë në një diktaturë të re në shekullin e 21.

Kjo është pengesa e fundit institucionale mes demokracisë dhe diktaturës! Është pengesa e fundit institucionale që Edi Rama të marrë nën kontroll të plotë, me votime të paligjshme, edhe hallkën e fundit të pushtetit në vend, pushtetin lokal.

Ne nuk kemi për ta lejuar kurrë që kjo të ndodhë, por mënyra për ta ndaluar me sa më pak kosto për vendin është që gjyqtarët t’i binden ligjit dhe të bëjnë drejtësi përmes ligjit.

G.M.//Shqiptarja.com

TAG:
• kqz
• zgjedhjet lokale 2019
• gazmend bardhi