Ekuipazhi i Artemis II do të përjetojë për herë të parë në histori humbjen e plotë të komunikimit me Tokën për rreth 40 minuta, teksa anija kozmike Orion kalon pas Hënës. Deri tani, astronautët kanë ruajtur lidhje të vazhdueshme me qendrën e kontrollit në Houston, Texas, por kjo do të ndërpritet përkohësisht, raporton BBC.

Ndërsa astronautët do të kalojnë pas Hënës, sinjalet e radios dhe lazerit që lejojnë komunikimin vajtje-ardhje midis anijes kozmike dhe Tokës do të bllokohen nga vetë Hëna.

Piloti i Artemis, Victor Glover, tha se shpreson që bota do ta shfrytëzojë kohën për t’u bashkuar.

“Kur të jemi pas Hënës, pa kontakt me të gjithë, le ta shfrytëzojmë këtë si një mundësi”, tha ai për BBC News para misionit.

“Le të lutemi, të shpresojmë, të na dërgoni mendimet dhe ndjenjat tuaja të mira që të rikthehemi në kontakt me ekuipazhin.”

Më shumë se 50 vite më parë, astronautët e Apollos përjetuan gjithashtu izolimin nga humbja e sinjalit gjatë misioneve të tyre në Hënë.

Në vitin 1969, ndërsa Neil Armstrong dhe Buzz Aldrin bënë histori duke bërë hapat e parë në sipërfaqen hënore, Collins ishte i vetëm në modulin e komandës, duke orbituar Hënën.

Ndërsa anija e tij kalonte pas anës së errët, kontakti me dyshen në sipërfaqen hënore, si dhe me kontrollin e misionit, u zhduk për 48 minuta.

Ai e përshkroi përvojën në kujtimet e tij të vitit 1974, “Carrying the Fire”, duke thënë se ndihej “vërtet i vetmuar” dhe “i izoluar nga çdo jetë e njohur”, por se nuk ndjente frikë apo vetmi.

Në intervistat e mëvonshme, ai përshkroi paqen dhe qetësinë që sillte heshtja në radio, duke thënë se ajo ofronte një pushim nga kërkesat e vazhdueshme nga kontrolli i misionit.

Në Tokë, ndërprerja e komunikimit krijon tension për ekipet që monitorojnë misionin. Matt Cosby, drejtori kryesor i teknologjisë tha se ekipi do të ndihet nervoz gjatë kalimit pas Hënës, por do të relaksohet sapo të rikthehet sinjali, duke konfirmuar sigurinë e astronautëve, shkruan BBC.

"Kjo është hera e parë që po gjurmojmë një anije kozmike me njerëz në të. Do të nervozohemi paksa teksa kalon pas Hënës, dhe pastaj do të jemi shumë të emocionuar kur ta shohim përsëri, sepse e dimë që të gjithë janë të sigurt", tha ai.