Shtëpia italiane e modës Prada ka prezantuar të dielën veshjen e shtresës së brendshme që do të përdoret nga astronautët e NASA-s që do të shkojnë në Hënë, në përpjekje për t’u bërë lojtari i parë i madh i luksit që depërton në industrinë hapësinore.

Kostumi i ngjitur pas trupit, i krijuar në bashkëpunim me kompaninë e infrastrukturës hapësinore me bazë në Houston, Axiom Space, përfshin tuba ventilimi të endur në strukturën e veshjes.

“Ne kemi vërtet një spektër të gjerë aftësish dhe njohurish,” tha Lorenzo Bertelli, drejtori i marketingut i Prada-s, në një event në dyqanin e Prada-s në Manhattan, i ulur pranë një manekini që mbante veshjen e re “Liquid Cooling and Ventilation Garment”.

Ekspertiza për zhvillimin e produkteve për eksplorimin hapësinor “mund të vijë nga shumë industri në dukje pa lidhje midis tyre”, tha Jonathan Cirtain, CEO i Axiom Space.

Produkti i ri vjen pas një tjetër hapjeje të bujshme të Prada-s në modën hapësinore në vitin 2024, me prezantimin e një kostumi hapësinor që pritet të përdoret për uljen e planifikuar të NASA-s në Hënë me misionin Artemis 4 në vitin 2028.

Markat e luksit prej kohësh janë frymëzuar nga udhëtimet hapësinore, por Prada ka shkuar “përtej frymëzimit drejt një partneriteti real”, ndërsa industria e eksplorimit dhe turizmit hapësinor po zhvillohet, tha Thomai Serdari, strateg i markave luksoze dhe profesor i marketingut në Universitetin e Nju Jorkut.

Serdari theksoi dy arsye kryesore që nxisin interesin e Prada-s në industrinë hapësinore: qasja te konsumatorët e pasur që po mendojnë për udhëtime në hapësirë dhe lidhja e markës me mendimin avangardë. Kompani si Blue Origin e Jeff Bezos dhe SpaceX e Elon Musk kanë investuar gjithashtu në turizmin hapësinor për të pasurit.

Rifillimi i eksplorimit hapësinor dhe udhëtimeve në Hënë “do të tërheqë shumë vëmendje”, tha Luca Solca, drejtues global i sektorit të mallrave luksoze në Bernstein. Markat e luksit duhet të mbeten të rëndësishme dhe të dukshme, shtoi ai.

Lëvizja e Prada-s vjen në një moment sfidues për sektorin e luksit. Pas dy vitesh rënieje, industria po jepte shenja stabilizimi deri kur filloi lufta në Iran në fund të shkurtit, e cila prishi udhëtimet dhe uli shpenzimet për luks në një zonë shumë më të gjerë se Lindja e Mesme.

Edhe kompani të tjera të modës dhe veshjeve kanë hyrë në “valën hapësinore”. Under Armour është bashkuar me Virgin Galactic për të krijuar veshje për hapësirë, ndërsa Columbia Sportsëear ka bashkëpunuar me Intuitive Machines për teknologji tekstilesh hapësinore.

Megjithatë, mbetet e paqartë nëse markat e tjera luksoze do ta ndjekin këtë rrugë.