Foli për orgji, Berisha përjashtohet për 10 ditë nga seancat plenare! Merret vendimi edhe për 3 deputetë të tjerë! Noka: Na përjashtuan se përdorëm bilbila

Sekretariati për Procedurat, Votimet dhe Etikën ka marrë vendimin për përjashtimin e Berishës dhe tre deputetëve të opozitës nga seancat plenare pas fyerjeve dhe shkeljes së etikës të bërë ditën e hënë në Kuvend.

Berishës dhe Nokës u ndalohet pjesëmarrja në seanca plenare dhe Komisione Parlamentare për 10 ditë, ndërsa Palokës dhe Këlliçit për 5 ditë.

Pas përfundimit të mbledhjes së sekretariatit, Noka dhe Këlliçi dhanë një deklaratë për mediat ku u shprehën se do të jenë të pranishëm në seancën plenare që do mbahet ditën e nesërme në Kuvend, duke shtuar se do të organizohet një tjetër protestë jashtë dyerve të organit legjislativ.

Noka mes të tjerash tregoi edhe një video ku shfaqeshin deputetë të mazhorancës së sotme duke përdorur bilbila dhe megafonë gjatë seancës duke argumentuar se drejt tyre nuk ishte marrë asnjë masë disiplinore.

“Vazhdon skenari për t’i mbyllur gojën opozitës. Mendojnë se duke përjashtuar pa asnjë shkak deputetët e opozitës dhe duke bërë qefin Ramë-Gonigalit. Kjo është vrasje e opozitës, të jenë të sigurtë as Nikolla as Rama nuk do mundin t’i mbyllin gojën opozitës. Pa fjalën e lirë një parlament nuk mund të ekzizstojë, ndryshe quhet monist. Ne kemi detyrë të përfaqësojmë 750 mijë votuesit dhe të çojmë zërin e tyre në parlament. Sa herë që nuk do na lejojnë të bëjmë këtë, ne do gjejmë metoda për ta çuar fjalën tonë. Asnjë nen i rregullores nuk është shkelur. Shikojeni videon me bilbila opozita e atëhershme protestonte për të drejtat e veta dhe as nuk i ndërpreu njeri.  Kur ishin në opozitë vetë hynin me megafona, flisnin merrnin edhe mikrofonin e Topallit dhe nuk i ka ndaluar askush. Kjo është demokracia”-tha Noka.

Ndërsa Këlliçi tha se po përjashtohej ndërkohë që nuk kishte folur fare gjatë seancës plenare të zhvilluar. Sa i përket objektit për të cilin u akuzua se e kishte futur fshehurazi në Kuvend, ai tha se ishte një mbajtëse telefoni që e kishte gjetur brenda parlamentit.

“Pretendohet që unë kam futur këtë pajisje që është një pajisje për të mbajtur telefonin. Çdo i ri e ka parë këtë pajisje. E kam gjetur në sallë të parlamentit. Nuk e kam futur fshehurazi këtë pajisje. Ftoj të më nxjerrin videon se ku unë e kam futur fshehurazi dhe se çfarë dëmi përbën një pajisje që mban telefonin. Akuzohem se kam shkelur kodin e etikës ndërkohë që nuk kam folur në seancë. E gjitha kjo bëhet që Rama të vijë nesër në parlament dhe të mos ketë opozitën aty për të folur mbi rastin McGonigal. Nesër në orën 10:00 do ketë sërish protestë para parlamentit. Ne aty me siguri do jemi përjashtuar, e dimë se vendimi është marrë por të paktën nuk akuzohem për asnjë vepër penale’-tha Këlliçi.

Ditën e hënë njëkohësisht me seancën plenare që nisi në porën 17:00, opozita mbajti edhe një protestë përballë Kuvendit, ku u mblodhën qindra persona të cilët herë pas here patën edhe momente tensioni me forcat e policisë të vendosura për ruajtjen e sigurisë.

Ndërkohë që Berisha u fut në sallë, pasi iu kërkua llogari për deklaratat e bëra më herët lidhur me përdorimin e fjalës ‘orgji’, ai vijoji me akuzat, duke sjellë kështu edhe reagimin e 31 deputeteve të mazhorancës të cilat kërkuan përjashtimin e tij nga seanca plenare.  Seanca gjatë gjithë kohës që u zhvillua, u përfshi nga një situatë anormale, teksa deputeti Flamur Noka duke përdorur një bilbil përpiqej të ndalonte fjalën e deputetëve të mazhorancës.  Nga ana tjetër për Palokën dhe Këlliçin u mor masa e përjashtimit për shkak të shkeljes së etikës dhe bllokimit të foltores së Kuvendit. Kreu i grupit parlamentar të PS, Taulant Balla tha se opozita po përpiqej të mos lejonte zhvillimin e punimeve parlamentare për shkak të hetimeve që janë hapur për 21 janarin dhe Gërdecin.

Pasi doli nga seanca plenare, Berisha doli para protestuesve të cilët ndodheshin jashtë kuvendit dhe paralajmëroi deputetët e mazhorancës se herën tjetër do duhej të merrnin leje për të dalë nga godina e organit legjislativ, duke lënë të kuptohet se do të ketë protesta të vazhdueshme.

Rendit zhvillimet sipas orarit:

Të Fundit Të Parat

B.V/M.Q./Shqiptarja.com

TAG:
• belind këlliçi
• PD
• flamur noka