Përmirësohet shëndeti i
kompozitorit Shpëtim Saraçi

TIRANE- Përmirësohet ndjeshëm gjendja shëndetësore e kompozitorit Shpëtim Saraçi. Sipas të afërmve të familjes, kompozitori Saraçi tashmë ka filluar të flasë e të fitojë lirshmëri në veprime.

Pas trajtimit të specializuar mjekët janë të kënaqur me rezultatet e mbërritura dhe kanë pohuar se duhet të vijojë një tjetër stad mjekimi për përmirësimin e mëtejshëm të shëndetit të tij.

Po ashtu mësojmë se nesër kompozitori Shpëtim Saraçi do lërë klinikën ku u shtrua para afro dy javëve dhe ku u mjekua deri më sot dhe do të shtrohet në një tjetër klinikë rehabilituese, ku do të vijojë të jetë nën kujdesin e mjekëve gjermanë.

Kompozitori i njohur mori goditje ishemike në trurin e vogël në mes të muajit gusht. Pas një javë përpjekjesh në spitalet shqiptare në qendrën spitalore “Nënë Tereza” ku mjekimet nuk kanë dhënë rezultatet që prisnin, familjarët e kompozitorit e nisën drejt një klinike të specializuar në Gjermani, duke marrë vetë përsipër të gjitha shpenzimet.

Pas kësaj, qeveria shqiptare vendosi një shtesë fondi prej 3 287 000 (tre milionë e dyqind e tetëdhjetë e shtatë mijë) lekësh në buxhetin e vitit 2013 për mbulimin e pjesshëm të shpenzimeve të kurimit të kompozitorit Shpëtim Saraçi.

Sipas vendimit kjo shumë duhet të përballohet nga fondi rezervë i Këshillit të Ministrave dhe pagesa do të bëhet me paraqitjen e faturave origjinale të institucionit të kurimit. Në mes të gushtit, kompozitori i njohur Shpëtim Saraçi ka qenë i shtruar pranë Shërbimit të Neurologjisë, në Qendrën Spitalore Universitare "Nënë Tereza”.

Një prej mjekëve të Urgjencës në Qendrën Spitalore “Nënë Tereza” duke kujtuar rastin e shtrimit të kompozitorit Saraçi pohoi se diagnoza u përcaktua kur Shpëtim Saraçi shkoi për të bërë një skaner, i cili zbuloi se kishte marrë disa goditje ishemike në trurin e vogël.

I lindur në Shkodër në vitin 1970, kompozitori 43-vjeçar është ndër muzikantët më në zë. Ai ka një krijimtari të pasur. Pjesëmarrës në të gjitha aktivitet kulturore të rëndësishme të vendit, Saraçi është vlerësuar me shumë çmime, duke dhënë një kontribut të vyer e të pazëvendësueshëm në muzikën shqiptare dhe festivalet e fundvitit

Shkrimi u publikua sot(13.09.2013) në gazetën Shqiptarja.com(print)
(v.gj/shqiptarja.com)