Me propozim të VMRO-DPMNE-së, Këshilli i Bashkisës së Shkupit me 24 vota pro dhe 19 kundër, futi në rend të ditës pikën për “Vendimin për shfuqizimin e vendimit për përcaktimin dhe ndryshimin e emrave të rrugëve, urave dhe shesheve në rajonin e Qytetit të Shkupit”. Ky propozim u votua edhe nga opozita shqiptare “Aleanca për Shqiptarët”, votat e të cilës dhanë kuorumin e nevojshëm për t’u futur në rend dite.

Propozimi për ndalimin e ndryshimit të emrave të rrugëve do të thotë edhe heqjen e disa emërtimeve të rrugëve në Shkup që mbajnë emrat e Hasan Prishtinës, Ismail Kadaresë, Ernest Koliqit etj.

Propozuesja e kësaj iniciative Marija Andonovska, këshilltare VMRO-DPMNE-së,  tha se për këtë vendim ka paqartësi dhe mungesë dokumentacioni.

“Kërkoj në seancën e sotme në rendin e ditës të shtohet edhe një pikë, vendim për shfuqizim të vendimit për ndryshimin e emrave të rrugëve, urave dhe shesheve në rajonin e Qytetit të Shkupit. Është vendim që është sjell nga përbërja e kaluar, është sjell në kohën para zgjedhjeve”, tha Andonova.

Kjo u kundërshtua nga këshilltarja e LSDM-së  Lubica Jançeva e cila theksoi se me shfuqizim të vendimit për ndryshimin e emrave të rrugëve shkelet rregullorja dhe se kërkoi që të votohet me emër e me mbiemër.

Pas votimit pika u fund në rend dite dhe do të diskutohet në mbledhjen e Bashkisë së Shkupit, ku shumicën e këshilltarëve e përbënë VMRO-DPMNE dhe Aleanca për Shqiptarët.