ANGLI - Arsenali dhe Chelsea iu përgjigjën Manchester United, duke marrë fitore për raundin e 25-të në Premier League. ‘Topçinjtë’ fituan 3-0 kundër Sunderlandit duke mbajtur kreun e renditjes, ndërsa te Chelsea, Palmer shënoi tre herë për fitoren 1-3 kundër Wolves.

Arsenali i shënon tre gola Sunderlandit

Arsenali siguroi një fitore të rëndësishme duke mposhtur bindshëm Sunderlandin me rezultatin 3-0. Skuadra londineze dominoi takimin dhe rasti i parë serioz erdhi në minutën e 30-të, kur Declan Rice provoi nga distanca, por topi përfundoi shumë pranë shtyllës. Ndeshja u zhbllokua në minutën e 42-të, kur Martin Zubimendi realizoi një gol spektakolar me kthesë nga skaji i zonës, pas asistimit të Leandro Trossard, duke kaluar Arsenalin në avantazh.

Në pjesën e dytë, vendasit vijuan me ritëm të lartë dhe në minutën e 66-të gjetën golin e dytë. Kai Havertz asistoi saktë për Viktor Gyokeres, i cili u tregua i saktë. Deri në fund të ndeshjes, “Topçinjtë” vulosën fitoren, teksa sërish Gyokeres doli në skenë duke realizuar golin e tretë për rezultatin përfundimtar 3-0.

Chelsea ‘kafshon’ Wolves, tre gola Palmer

Chelsea fitoi në udhëtim 1-3 kundër Wolves. Ndeshja u zhbllokua që në minutën e 13-të, kur pas një faulli në zonë ndaj lojtarëve të Chelsea, gjyqtari Jarred Gillett akordoi penallti. Cole Palmer mori përsipër ekzekutimin dhe me shumë qetësi realizoi golin e parë.

Chelsea vazhdoi presionin dhe në minutën e 35-të fitoi edhe një tjetër penallti, pas një ndërhyrjeje të gabuar të Yerson Mosquera brenda zonës. Sërish Palmer ishte i saktë nga pika e bardhë, duke dyfishuar për 0-2.

Vetëm tre minuta më vonë, londinezët shënuan edhe golin e tretë. Marc Cucurella bëri një depërtim të shkëlqyer në krah, ndërsa topi përfundoi te Cole Palmer, i cili me një goditje precize e dërgoi topin në rrjetë për 0-3. Wolves shkurtoi në minutën e 54-t me Toluwalase Arokodare.

Me 56 pikë Arsenali mbetet në krye të Premier League, nëntë më shumë se Man. City (një ndeshje më pak) dhe Aston Villa.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 6 Shkurt, 23:06

    Kushtetuesja rrëzon Ramën dhe Balluku pezullohet, jeni dakord me vendimin?

Lajme të tjera