ANGLI - Data 19 maj 2026 do të shënohet në historinë e Arsenalit, pasi ‘Topçinjtë’ e Londrës siguruan këtë të martë titullin e 14-të kampion në Premier League, kjo pas 22 vitesh pritje.

Për herë të fundit Arsenali e fitonte këtë trofe në sezonin e largët 2003-04, edicioni i famshëm i 'Invincibles', kur skuadra e Arsene Wenger e mbylli kampionatin pa asnjë humbje dhe u fut në histori si një nga ekipet më të mëdha të futbollit anglez. Në atë sezon të paharrueshëm, Arsenali e fitoi titullin me 90 pikë, me bilanc 26 fitore dhe 12 barazime në 38 ndeshje, duke shënuar 73 gola dhe pësuar vetëm 26.

Barazimi i Man. Cityt - Edhe pse duhet një tjetër raund deri në fundin e sezonit 2025-26 në elitën e futbollit anglez, barazimi 1-1 i Manchester Cityt në fushën e Bournemouth ka bërë që ‘Qytetarët’ të dalin nga gara për titullin kampion pasi mbeten katër pikë pas Arsenalit. Kështu, Pep Guardiola do të largohet nga City pa trofeun e Premier League për këtë sezon.

Në ‘Vitality’ Bournemouth shënoi me Eli Junior Kroupi në minutën e 39-të, për ta mbyllur në epërsi pjesën e parë, por Erling Haaland në shtesën e pestë të ndeshjes (90+5’) barazoi për 1-1. Bournemouth është në garë për një vend në Champions League edicionin e ri.

Radha e Champions League - Tanimë gjithë festa shpërngulet në Londër, me Arsenalin e trajnerit Mikel Arteta që do të festojë nga divani dhe një javë para fundit të sezonit një trofe të pritur për 22 vite. Trajneri spanjoll ka luksin që në ndeshjen e fundit të sezonit kundër Crystal Palace më 24 maj të bëjë rotacion, duke u fokusuar te finalja e Champions League kundër PSG-së e cila do të zhvillohet më 30 maj në ‘Puskas Arena’ të Budapestit.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 19 Maj, 10:36

    Sylvinho e mbyll me Kombëtaren, si e vlerësoni punën e trajnerit brazilian?

Lajme të tjera