Protesta e dhunshme e Berishës, 18 të arrestuar! 17 nën hetim, mes tyre Balliu, Boçi e Bardhi! 2 në kërkim (EMRAT)

Një protestues nga Berati pretendon se gjatë protestës së PD-së të shtunën, është goditur nga policia. Sipas tij, e kanë qëlluar me një bombë të vogël gazi dhe e kanë shoqëruar pa e sqaruar. Protestuesi pretendon se është goditur brenda furgonit të policisë dhe qëndroi rreth 3-4 orë në komisariat.

“Më gjuajtën me një nga ato bombat e vogla të gazit. Më morën, më shoqëruan pa pikën e lidhjes pse isha atje. Më morën në furgon, më kanë gjuajtur, më çuan në komisariatin nr. 2, më mbajtën nja 3-4 orë, më gjuajtën, më kanë bërë copë. Më goditën brenda furgonit dhe jashtë ambientit të komisariatit kur kam zbritur nga komisariati. Kur kam zbritur nga furgoni, më kanë goditur me shqelma e grushte. Nuk kam kundërshtuar gjë, për çfarë do të kundërshtoja? Si gjithë të tjerët, isha edhe unë atje. S’isha për t’u zënë as për shtetin, as për asnjë. Kam problemin e astmës. Më hodhën gaz lotsjellës në sy. Syrin nuk e hap dot. U thashë jam i sëmurë, mos më godisni. Më zuri ankthi, më zuri ajo e frymëmarrjes, më lanë të lirë. Më thanë ik. Më kanë lënë te dera e komisariatit, më ka marrë një shok. Më ka shoqëruar në spitalin e Beratit pastaj”, pretendon protestuesi.

Djali 14 vjeçar i cili u shoqërua nga policia pas protestës së dhunshme të Partisë Demokratike ku u lënduan 11 efektivë policie ka dalë nga ambientet e Komisariatit nr 1 duke shpjeguar se si u kap nga forcat e rendit.

“Isha në xhami. Isha duke larë fytyrën prej gazit. Ika unë dhe isha tu pa policët. Më erdhën 5 civila. Më kanë kthyer duart, me futen prangat, me ulën poshtë xhamisë, më gjuajtën dhe më sollën këtu. Ndenja këtu 2-3 orë . I kam dhënë mbiemër dhe bënin ca letra. Nuk e di se çfarë po bënin! Më erdhën disa deputetë si quhen ata, dhe ata më nxorrën.”

Minoreni ishte në mesin e 23 militantëve të Partisë Demokratike, të cilët, u shoqëruan në Komisariatin numër 1 pasi sipas policisë, u konstatuan se kanë gjuajtur me gurë dhe sende të forta në drejtim të forcave të rendit.

Drejtori i Përgjithshëm i Policisë së Shtetit, Ilir Proda, ka ndarë një mesazh falënderimi për punonjësit që u angazhuan gjatë protestës kombëtare të Partisë Demokratike gjatë së shtunës. Mbi 1350 punonjës policie gjendeshin në detyrë gjatë protestës në të cilën u përdorën bomba molotov dhe objekte të tjera.

Proda falënderon të gjithë të angazhuarit për demonstrimin e standardeve profesionale, respektit ndaj ligjit dhe përgjegjësisë, teksa uron shërim të shpejtë për 11 punonjësit e lënduar.

“Të nderuar drejtues dhe punonjës të Policisë së Shtetit,

Ju falënderoj për profesionalizmin, përmbajtjen dhe përkushtimin e treguar gjatë angazhimit tuaj në garantimin e rendit dhe sigurisë publike gjatë protestës.

Pavarësisht akteve të shumta të dhunës, me bomba molotov, lëndë piroteknike e sende të forta, ju demonstruat standarde të larta profesionale, respekt për ligjin dhe përgjegjësi institucionale.

Uroj shërim të shpejtë për 11 punonjësit e dëmtuar gjatë detyrës dhe i siguroj ata për mbështetjen e plotë të institucionit.

Një falënderim i veçantë shkon për të gjithë drejtuesit, për lidershipin, koordinimin dhe menaxhimin profesional të situatës.

Mirënjohje për çdo efektiv të Policisë së angazhuar”,  shkruan Proda.

Pas protestës së dhunshme të Partisë Demokratike, 23 militantë protestues janë shoqëruar në policisë, ndërsa të paktën 11 efektivë kanë mbetur të lënduar dhe kanë marrë ndihmë mjekësore në spital.

Mes të shoqëruarve në Komisariatin numër 1 ishte dhe një i mitur i moshës 14-vjeçare, që fillimisht dyshohej se ishte 10 vjeç, i cili sipas bluve gjatë protestës është konstatuar duke gjuajtur me gurë dhe sende të forta në drejtim të shërbimeve të policisë.

“Theksojmë se shtetasi i mitur në asnjë moment nuk është mbajtur në ambiente të përbashkëta me persona të rritur të ndaluar apo të shoqëruar, por ka qëndruar në një ambient të përshtatshëm dhe është trajtuar me kujdes, në përputhje me parimet dhe garancitë ligjore për të miturit. Ai është lënë i lirë menjëherë pas mbërritjes së përfaqësuesit ligjor”,- njofton policia.

Shoqërimi i 14-vjeçarit solli edhe reagime nga deputetët e PD-së, ndërsa disa prej tyre ishin edhe në Komisariatin numër 1 në Tiranë ku u përplasën me efektivët, si dhe kërkonin të takonin shefin e komisariatit, Elton Shani.

"Arrestimi i një fëmije vetëm për faktin se ndodhej në një protestë nuk ka asnjë bazë ligjore dhe tejkalon çdo kufi etik e moral. Ky nuk është zbatim i ligjit, por një keqpërdorim flagrant i autoritetit shtetërorKjo nuk është rend publik. Është dështim dhe degradim i institucioneve",- shkroi në rrjete soociale deputeti Bardh Spahia.

"Arrestimi i një fëmije vetëm pse ndodhej në një protestë kalon çdo kufi ligjor, etik dhe moral. Kjo nuk është zbatim ligji, por abuzim i hapur me pushtetin",- shkroi në rrjete sociale deputetja Jorida Tabaku.

"Një regjim që guxon të arrestojë një fëmijë 10-vjeç… Shtet horrash që mbron kriminelët dhe arreston fëmijët. Ky regjim ka kaluar çdo kufi, çdo moral, çdo njerëzi. Mjaft është mjaft! Fëmijët nuk preken",- shkroi në rrjete sociale deputetja Elda Hoti.

Rasti po hetohet edhe nga Avokati i Popullit, i cili ka dërguar përfaqësues në Komisariatin nr. 1, por edhe në rajonet e tjeratë policisë ku ka pasur persona të shoqëruar.