Kryeministri shqiptar Edi Rama i tha Reuters të enjten se nuk do të japë dorëheqjen për shkak të protestave të dhunshme të udhëhequra nga studentët, të cilat hynë në ditën e tretë radhazi.

Policia përdori topa uji për të shpërndarë protestuesit, të cilët thyen xhama dhe dëmtuan pronën në kryeqytet, duke bërë që Parlamenti të anulonte seancën e tij.

Studentët, të cilët protestojnë kundër rritjes së kostove të arsimit dhe korrupsionit, kanë kërkuar dorëheqjen e Ramës.

“Sa u përket thirrjeve për dorëheqjen time, qeveritë ndryshohen përmes zgjedhjeve demokratike. Ne zhvilluam zgjedhjet vitin e kaluar, jo një revolucion”, tha Rama në përgjigjet me shkrim për Reuters.

“Përgjegjësia ime është të dëgjoj, t’u përgjigjem shqetësimeve legjitime dhe ta çoj Shqipërinë përpara. Alternativa do të ishte tradhtia ndaj shqiptarëve që më dhanë një mandat të fortë për të përfunduar negociatat për anëtarësimin në Bashkimin Evropian.”

Rama tha se ishte i gatshëm të diskutonte rritjen e kostove të arsimit, por shtoi: “Sulmet ndaj institucioneve, shkatërrimi i pronës publike dhe rrezikimi i sigurisë publike nuk kanë asgjë të përbashkët me kërkesat legjitime të studentëve.”

Protestat përbëjnë sfidën më të madhe deri më tani për Ramën, i cili fitoi një mandat të katërt vitin e kaluar.

Trazirat vijnë pas muajsh demonstratash kryesisht paqësore, të nxitura nga planet për ndërtimin e një resorti luksoz në bregdetin jugor të Shqipërisë, projekt i mbështetur nga Jared Kushner, dhëndri i presidentit amerikan Donald Trump, i cili është përballur me sfida ligjore.

“Korrupsioni duhet të luftohet dhe, siç ka riafirmuar së fundmi edhe vetë BE-ja, Shqipëria po e lufton atë si kurrë më parë”, tha Rama.

“Ndoshta disa forca, brenda dhe jashtë vendit, nuk duan që Shqipëria të ketë sukses si pararendëse në procesin e anëtarësimit në BE. Por unë nuk do të lejoj që dhuna të pengojë të ardhmen evropiane të Shqipërisë.”

Së bashku me Malin e Zi, Shqipëria aktualisht kryeson procesin e anëtarësimit mes vendeve të Ballkanit dhe synon të anëtarësohet në BE që në vitin 2028.

Lajm në përditësim