Kryeministri Edi Rama ka reaguar ndaj kritikave dhe protestave që kanë shoqëruar propozimin për reformën e re administrative-territoriale.

Përmes një postimi në rrjetet sociale, Rama shkruan se përveç rasteve specifike ku janë djegur teserat e Partisë Socialiste (të cilin e cilësoi një akt të turpshëm), protestat janë normale dhe të mirëpritura.

Më tej kryeministri shprehet se dokumenti i reformës territoriale është në fazën e vet të konsultimit publik prej 60 ditësh dhe sipas tij, gjithësekush ka të drejtë të shprehë mendimin e vet.

Rama nënvizoi gjithashtu se, sipas ligjit, kryetarët e bashkive dhe këshillat bashkiakë duhet të paraqesin me shkrim qëndrimet e tyre, ndërsa ata që kundërshtojnë reformën, sipas tij mund të protestojnë në mënyrë paqësore, për sa kohë nuk cenojnë rendin publik apo pengojnë lëvizjen e qytetarëve.

"Në Shqipëri nuk ka regjim dhe as në Partinë Socialiste nuk do të ketë vendime që pengojnë shprehjen e lirë të opinionit për këtë reformë", theksoi mes të tjerash Rama, duke shtuar se vendimi përfundimtar do të merret nga Kuvendi pas përfundimit të procesit të konsultimeve.

Kritika Rama kishte edhe për disa deputetë të PS (pa përmendur emra), për të cilët tha se “kanë bërë ‘tribunin e vegjëlisë’ pa ditur tamam çfarë thonë”. Kryeministri mbrojti edhe kriteret mbi të cilat është hartuar propozimi, duke theksuar se ato bazohen në argumente logjike dhe administrative.

Reagimi i Ramës:

Vazhdon qarja e hallit të kalorësit se po i varen këmbët, së fundi edhe me një agjitim të madh nga vajtorët e vajtojcat, pse tanimë po protestohet edhe “brenda PS” dhe kjo qenka një shenjë tmerrsisht e keqe për “regjimin”

Në fakt jo, përjashto aktin e turpshëm të djegies së teserave të PS në një rast, nga disa individë që as vetë s’kanë ditur tamam ç’kanë bërë apo ndonjë rast kur deputetë tanët kanë bërë “tribunin e vegjëlisë” pa ditur tamam çfarë thonë, gjithçka tjetër është jo vetëm normale po edhe e mirëseardhur

Një, sepse dokumenti i reformës së propozuar është pikërisht në fazën e vet të konsultimit publik ligjor prej 60 ditësh dhe kjo fazë do të thotë pikërisht, bujrum gjithkush të shprehet lirisht për propozimin

Dy, sepse sipas ligjit kryetarët e bashkive e këshillat bashkiakë duhet të shprehen me shkrim për qëndrimet e tyre dhe është krejt e kuptueshme që ata që janë kundër të shprehen edhe me forma të tjera paqësore - për sa kohë nuk bllokojnë rrugë e nuk pengojnë të tjerët të bëjnë jetën e tyre, duke u futur vetë në konflikt me ligjin dhe me PS bashkë

Tre, sepse as në Shqipëri nuk ka regjim, as në PS nuk ka dhe nuk do të ketë asnjë vendim për të shkurajuar askënd që të shprehë opinionin e vet për këtë reformë, për të cilën sigurisht do të vendosë parlamenti, por deri atëherë të gjithë do të dëgjohen, përfshirë edhe bashkitë që mund të duan të integrojnë tek vetja bashki më të vogla që në propozimin aktual mbeten siç janë

Nga ana tjetër të gjithë do të informohen shumë më tepër përgjatë këtyre 60 ditëve lidhur me arsyet logjike të propozimeve - ku nuk ka pasur si të merren parasysh reputacioni i zonës bashkiake që nga koha e antikitetit, numri i të rënëve në luftrat e 2000 vjetëve të fundit apo të tjera të dhëna e gojëdhana të kësaj natyre, të cilat s’kanë qenë dhe s’mund të jenë farë argumenta në këtë debat