Kockat tona luajnë një rol të rëndësishëm në shëndetin e organizmit dhe janë të shumtë faktorët që ndikojnë në forcën dhe qëndrueshmërinë e tyre. Nutricionisti Altin Joka, i ftuar në emisionin “Rreze Dielli” në Report Tv, u ndal te sistemi kockor, të cilin e cilësoi si një ekosistem të gjallë, brenda të cilit ndërtohet kolagjeni dhe qarkullojnë mineralet që lidhen ngushtë me sistemin imunitar.

Sipas Jokës, mungesa e vitaminës D është një nga problemet kryesore që ndikon në dobësimin e kockave, pasi nuk lejon përthithjen e mineraleve në strukturën kockore. Kjo ndikon drejtpërdrejt te kalciumi, i cili nuk lidhet siç duhet me kockën. Po aq të rëndësishëm janë edhe mineralet e tjera si magnezi, bori dhe silici, të cilët marrin pjesë në ndërtimin dhe mirëmbajtjen e sistemit kockor.

“Kur mungon vitamina D, mineralet nuk arrijnë të depozitohen në kocka dhe kalciumi nuk lidhet siç duhet me to. Ndikim kanë edhe elementë të tjerë si magnezi, bori dhe silici”, u shpreh ai.

Nutricionisti theksoi se inflamacioni në zorrë ndikon drejtpërdrejt te kockat, pasi organizmi mbetet pa lëndët e para të nevojshme për rigjenerimin e tyre. Po ashtu, destabilizimi hormonal godet skeletin, ndërsa stresi kronik dhe rritja e nivelit të kortizolit ndikojnë negativisht në densitetin kockor, duke konsumuar rezervat minerale të organizmit. Sipas tij, edhe mungesa e gjumit, mungesa e aktivitetit fizik, mbipesha, ekspozimi ndaj metaleve të rënda dhe toksinave, si dhe inflamacionet afatgjata të shkaktuara nga baktere apo viruse, mund të përkeqësojnë ndjeshëm shëndetin e kockave.

Një rol të veçantë, sipas Jokës, luan silici, një mineral shpesh i nënvlerësuar. Ai e krahasoi atë me skeletin e një ndërtese, pasi merr pjesë në ndërtimin e kolagjenit dhe në lidhjen e mineraleve me kockën. Ndërkohë, dëmtimi i lëngut sinovial dhe mungesa e kolagjenit janë faktorë të tjerë që ndikojnë në dobësimin e sistemit kockor.

Duke folur për rëndësinë e ushqimit, Joka u shpreh se ai është ushqimi që mban gjallë të gjithë ekosistemin e organizmit.

 “Çdo kafshatë që fusim në gojë është një sinjal për organizmin. Trupi ka nevojë për proteina cilësore, si dhe për vitamina si K, C dhe D. Ushqimi mbetet baza e shëndetit të kockave”, theksoi ai.

Për të vlerësuar gjendjen e tyre, ai rekomandon kryerjen e analizave si CRP, proteina C-reaktive, ESR, vitamina D, magnezi, kalciumi total dhe ai i jonizuar, fosfori, niveli i hekurit, faktori reumatoid dhe acidi urik.

Një nga faktorët që ndikon ndjeshëm në shëndetin e kockave është edhe pesha trupore. Sipas ekspertit, pesha e tepërt ushtron presion të vazhdueshëm mbi gjunjët dhe ndryshon mënyrën e ecjes.

“Mbipesha, dhjami i tepërt ndikon në metabolizmin e insulinës dhe ngadalëson procesin e riparimit të indeve, duke sjellë dëmtime graduale në sistemin kockor. Dhimbjet zakonisht nisin në zonën e kurrizit, më pas shfaqen në ije dhe më vonë edhe në këmbë”.

Joka paralajmëron se ka disa shenja që nuk duhen neglizhuar, si thonjtë e brishtë, vështirësia në ngritjen e peshave, ngërçet e shpeshta, flokët e dobët, lodhja e pashpjegueshme dhe shërimi i ngadaltë i plagëve apo mavijosjeve. Sipas tij, këto mund të jenë sinjale të hershme se organizmi po përballet me probleme që lidhen me shëndetin e kockave.

Për të qetësuar dhimbjet dhe për të forcuar sistemin kockor, nutricionisti këshillon largimin e ushqimeve inflamatore si buka e rafinuar, brumërat, niseshteja, yndyrnat trans dhe ushqimet me përmbajtje të lartë sheqeri. Në vend të tyre, ai rekomandon konsumimin e sardeleve, të pasura me omega-3, vajit të ullirit ekstra të virgjër, shafranit, kurkuminës të kombinuar me piper të zi, xhenxhefilit, frutave të pyllit, perimeve jeshile, hudhrës, qepës, arrave, bajameve, farave të lirit dhe farave të kungullit.

Po ashtu, shumë të dobishme konsiderohen çaji jeshil, shega, qershia e errët, avokado, lakra e kuqe, brokoli, lulelakra, kakaoja cilësore, panxhari, kefiri, kosi dhe ushqimet e fermentuara. Në listën e ushqimeve të rekomanduara përfshihen edhe bishtajoret, mishi i rritur në mënyrë natyrale, si dhe lëngu i selinosë i kombinuar me karrotën.

Duke u ndalur te kolagjeni, Joka theksoi se ai duhet të shoqërohet me vitaminë C, proteina dhe minerale si zinku, bakri dhe silici për t’u përthithur sa më mirë nga organizmi. Sipas tij, baza më e mirë mbetet lëngu i kockave, ndërsa një dozë kolagjeni prej rreth 15 gramësh përthithet më mirë kur shoqërohet me lëng limoni. Ai këshillon gjithashtu konsumimin e peshkut, mishit, vezëve dhe farave, pasi këto ushqime përmbajnë aminoacidet e nevojshme për prodhimin natyral të kolagjenit në organizëm.