Qeveria i akordon 3.7 milionë
euro fonde shtesë KQZ-së

TIRANE - Këshilli i Ministrave miratoi dje, gjatë mbledhjes së radhës të qeverisë, një shtesë fondi prej 521 milionë lekësh të reja në buxhetin e shtetit në favor të shpenzimeve të Komisionit Qendror të Zgjedhjeve, konkretisht për financimin e shpenzimeve për zgjedhjet për Kuvendin e Shqipërisë të 23 qershorit të këtij viti.

"Komisionit Qendror të Zgjedhjeve, në buxhetin e miratuar për vitin 2013, për zgjedhjet për Kuvendin e Republikës së Shqipërisë, të vitit 2013, t’i shtohet një fond prej 521.000.000 lekësh, nga i cili 45.000.000 lekë, për shpenzime personeli, për kryerjen e pagesave për komisionerët e KZAZ-ve, qendrave të votimit dhe grupeve të numërimit;

436.000.000 lekë, për shpenzime operative, për projektet SEN dhe SEV dhe 40.000.000 lekë, për shpenzime për investime", thuhet në vendimin përkatës, të miratuar dje nga anëtarët e qeverisë ‘Berisha’.

Sipas këtij vendimi, do të ngarkohen ministria e Financave dhe Komisioni Qendror i Zgjedhjeve për zbatimin e tij. Shuma në total është e barabartë me shifrën, e konvertuar në valutë të huaj, të 3.7 milionë eurove.

Shkrimi u botua sot në gazetën Shqiptarja.com (print) 01.08.2013
 
Redaksia Online
(b.m/shqiptarja.com)

TAG:
• kqz