Rama çon për deputet në Fier
ish-kreun e KQZ-së, Celibashin

TIRANE - Pas një biznesmeni, një gazetari e një prokurori, kryesocialisti Rama sot ka prezantuar një prurje të re, një jurist,  ish-kreun e Komisionit Qendror të Zgjedhjeve, Ilirjan Celibashi, si kandidat për deputet në qarkun e Fierit.

Më herët kryesocialisti Rama ka prezantuar gazetarin Alfred Peza për Peqinin, biznesmenin Parid Cara për Kavajën dhe prokurorin Vexhi Muçmata për deputet në Kukës.

Në një konferencë për mediat të dhënë sot nga selia rozë, Rama tha se Celibashi vjen në këtë post pas dy herë refuzimesh të ftesës së tij. Lideri i opozitës tha se, tashmë mbetet në dorë të shqiptarëve për të zgjedhur mes pushtetit të një njeriu të vetëm dhe një skuadre njerëzish, e cila sipas tij do të sjellë Rilindjen shqiptare.

Vetë i kandiduari për deputet, Ilirjan Celibashi tha se: Kush do ndryshimin e Shqipërisë duhet të angazhohet politikisht. Shqiptarët këtë radhë duhet që të mbështesin masivisht dhe pas asnjë lloj ngurimi alternativën e PS, si alternativën më të mirë për të qeverisur vendin të paktën në 4 vitet e ardhshme”.


RAMA: BERISHA PERPJEKJE TE DESHPERUAR KUNDER OPOZITES
Ndërkaq, lideri i opozitës edhe në këtë rast nuk la pas akuzat ndaj kryeministrit Berisha. Rama tha se shefi i mazhorancës e ka humbur betejën me varfërinë dhe se njëherësh gënjen shqiptarët me premtime të parealizueshme të cilat edhe këto i kopjon nga Programi i PS-së.

“Berisha e ka humbur betejën me varfërinë, me borxhin kombëtar dhe borxhet që i janë bërë litar në fut, e ka humbur betejën me korrupsionit sot është bërë fytyra dhe dora e korrupsionit. Sot përpiqet që kohën e humbur ta kap me turravrap të dëshpëruar kundër opozitës. Kopjon programin tonë. Gënjen shqiptarët për çka nuk ka bërë dhe për çka medemek do bëjë në mandatin e ardhshëm. E gjitha kjo është një përpjekje e kotë e pafuqishme e dëshpëruar, fundi i një epoke”, deklaroi kryesocilisti Rama.

Redaksai Online
(Gre.M/Shqiptarja.com)

TAG:
• kqz