Propozimi i Beqajt/ Rama: S'ka për të pasur ulje pagash e pensionesh! Do të zgjerohet harta e zonës së gjelbër, në 11 maj zgjerimi i madh

"Bëj durim dhe të shpresojmë që më herët se vonë do të lirohet dhe përsa i përket cështjes së dasmave edhe pse kam parë që kanë lëshuar dasmat vendet e tjera, por jo më shumë se 10 persona" tha Rama.

Plazhi është i ndaluar dhe kjo ka revoltuar një nga qytetarët që pyet kryeministrin se përse e ka marrë këtë vendim. "Ti ke ndonjë det privat, dhe nëse ke dhe mund të ruash distancën nga të tjerët mund të shkosh dhe unë e di që nuk ka ndonjë det privat. Nëse shikoni masat e Greqisë, në plazhet private për një numër të kufizuar kanë lënë hapësirë, të tjerët jo" tha ai.

Në lidhje me riatdhesimet, kryeministri Rama tha se disa emigrantë të ardhur nga Greqia dhe të karantinuar në hotele sipas rregullt fillimisht gënjyen për të paguar shpenzimet e tyre për 14 ditë dhe më pas dolën e thanë se nuk kemi lekë. Rama tha se nuk mund të bëhet kështu, por gjithsesi kjo çështje tashmë është zgjidhur dhe qeveria po u paguan atë pjesë që po e bën me të gjithë të riatdhesuar.

"Rregullat bëhen për një kategori të tërë. Të gjithë shkojnë në hotel karantinë dhe më pas i drejtohen banesës. Ka disa ankesa në dy tre hotele në zonën jugore ku gënjyen se thanë do t'i paguajmë ne lekët, gënjyen dhe tani ne e kemi zgjedhur do i mbulojmë pjesën që u kemi mbuluar dhe të tjerëve, tani dalin në dritare dhe thonë jo po ne nuk i kemi leket. Po pse gënjyet, për çfarë arsye, na shtyu nevoja? Jo nuk është kështu", tha Rama.

Në datë 11 maj qeveria do të vendosë për hapjen e lëvizjes mes qyteteve brenda vendit, por edhe kufijtë me vendet fqinje në bazë të ecurisë. "Në 11 maj do të vendosim për hapjen më tutje korridorin e lëvizjes tokësore apo ajrorë për të hyrë në vendin tonë. Javën e ardhshme do të shikojmë për berberët dhe në 11 maj do të kemi një zgjerim më të madh, do të kemi një zgjerim tërësor duke parë dinamikën" tha Rama.

Në raport me një milion banorë, kryeministri Edi Rama tha se Shqipëria dhe Bullgaria kanë më pak vdekje në Europë nga COVID. "Mund të kemi të metat tona, por po e bëjmë me dinjitet, Shqipëria vendi me më pak vdekje për një milion banorë bashkë me Bullgarinë në gjithë kontinentin. Ka një arsye kjo, nuk është se virusi ka qenë se shqiptarët janë tip i vështirë, por se kemi marrë masat e duhura" tha Rama.

Kryeministri Edi Rama tha se ditën e nesërme do të bëhen publike vendimet se çdo të bëhet me universitetet.

"Sot kam pasur një mbledhje të fundit me ministren e Shëndetësisë dhe ata të Arsimit se çdo të vendoset në lidhje me universitetet. Nesër do bëhet njoftim se çdo të bëhet me universitetet", tha Rama.

Kryeministri Rama sqaroi të gjithë opinionin publik, i cili u revoltua në lidhje me propozimet e deputetit socialist, Ilir Beqaj për të ulur pagat dhe pensionet për të krijuar një fond të veçantë për përballimin e  situatave të papritura si ajo e COVID-19. Rama tha se kjo gjë nuk ka për të ndodhur dhe se i vetmi rast që paga dhe pensioni mund të preket është vetëm për rritjen e tyre.

"Nuk ka ulje pensionesh dhe ulje rrogash, se dikush ka një ide dhe mund ti thotë në një vend ku të gjithë mund të shprehin idetë e tyre. Të gjithë mund të thonë ide të caktuara, për sa i përket vendimi zyrtar të qeverisë nuk ka pasur dhe nuk do të ketë prekje të pensioneve apo të pagave. Përkundrazi nëse do të preken do të preken vetëm për t'u rritur dhe asnjëherë për t'u ulur për asnjë arsye në botë.", tha Rama.

Kryeministri Edi Rama u shpreh se po shikohet mundësia e rihapjes së berberëve, floktoreve dhe dentistëve, por me protokoll sigurie, ndërsa nuk dha datë se kur. 

"Duke qenë se ka shumë që duan të shkojnë në Greqi u kujtoj se faktikisht nuk lejohet lëvizja nga prefektura në prefekturë. Kur flasim për kufij, hap kufijtë se na mbyte, se na vrave, dakord unë jam i tilli apo atilli mbase, por a shikoni se çfarë ndodh?

Do të hapemi me shumë kujdes dhe deri në, pas kësaj jave, dhe javës në vijim, do të bëjmë një analizë të thellë me ekspertët dhe komitetin lidhur me procesin e hapjes së korridoreve ajrore. Në tërësi do të vijojmë me këtë regjim për korridoret ajrore. Lehtësimi do të vijë në proces. Mbeten në proces për t'u studiuar dhe për t'u lehtësuar, disa biznese, floktoret, berberët, dentistët.

Janë të rrezikshme, sepse mjafton që një nga klientët të infektojë berberin, parukerin apo dentistin të gjithë marrin infeksionet. Por me protokollet do të lehtësojmë edhe këtë aktivitetet dhe pastaj mbetemi te qendrat tregtare më parë dhe më pas restorantet dhe baret. Pas datës 4 maj nuk ka diskutim deri në 11 maj kur do të kemi një rivizitim të të gjithë situatës. Do të shikojmë edhe efektin e hapjes së zonave të gjelbra që do të zgjerohen" tha ai.