Raporti i AMP, 18 efektivë policie të arrestuar në korrik! Rasti më i bujshëm vënia në pranga e 14 policëve në Shkodër

18 punonjës policie u arrestuan në muajin korrik nga Agjencia e Mbikëqyrjes Policore, pjesa më e madhe për shpërdorim detyre. Operacioni më i bujshëm ishte ai i arrestimit të 14 policëve në Shkodër për tenderin e rikonstruksionit të komisariatit. Në krye të ankesave të qytetarëve Policia e Rendit.

Ngjarja e Himarës, me autor një punonjës policie, ka rritur ndjeshëm zemërimin e opinionit publik kundrejt bluve, pasi është ngjarja e disatë ku efektivët janë protagonistë në situata të rënda kriminale gjatë muajve të fundit. 

Vetëm në muajin korrik, Agjencia e Mbikëqyrjes Policore arrestoi 18 punonjës policie, njëri prej tyre në flagrancë. Pjesa më e madhe të akuzuar për shpërdorim detyre dhe shkelje e barazisë së pjesëmarrësve në tendera apo ankande publike. Rasti më i bujshëm ishte ai i arrestimit të 14 policëve në Drejtorinë Vendore të Policisë së Shkodrës.

Pasditen e 21 korrikut AMP vuri në pranga edhe ish-shefin e Rendit në Policinë e Shkodrës, Saimir Rustemi, i akuzuar për një tender për rregullimin e Komisariatit në vlerën e 200 mijë lekëve. Gjykata e Shkodrës nxori të gjithë të arrestuarit nga qelia, duke dhënë masa më të buta “arrest në shtëpi” dhe “detyrim paraqitje”. Arrestimi i Rustemit nuk u prit mirë nga qytetarët e Shkodrës, të cilët protestuan për lirimin e tij.

Ndërkohë, Agjencia e Mbikëqyrjes Policore trajtoi gjatë muajit korrik 174 ankesa që kanë ardhur nga qytetarët për punonjësit e Policisë së Shtetit. Numri më i madh i tyre është për Policinë e Rendit, 67 të tilla, ndjekur nga Hetimi i Krimit me 48 ankesa dhe më pas Policia Rrugore me 46 të tilla.

Goditja me skaf e 7-vjeçares Jonada Avdia i përket muajit gusht, ndërsa konsiderohet ngjarja më e rëndë e viteve të fundit e shkaktuar nga një punonjës policie, së bashku me atë të vrasjes së Klodian Rashës në 8 dhjetor të vitit 2020 nga efektivi i policisë, Nevaldo Hajdaraj dhe ekzekutimin e Çaush Saliasit nga kolegu Ludjan Zaimi, në ambientet e brendshme të Komisariatit. Nr 3 në Tiranë.

G.MO/LR/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Vizita e Presidentit Begaj në Kosovë, si i vlerësoni mesazhet dhe takimet që zhvilloi?



×

Lajmi i fundit

Grabitja e argjendarisë në Lezhë, policia identifikon autorin 17-vjeçar e i vihet në kërkim

Grabitja e argjendarisë në Lezhë, policia identifikon autorin 17-vjeçar e i vihet në kërkim