Çështja 'Beleri'/ Kryeministri grek Mitsotakis: Ka ndikuar negativisht në marrëdhëniet me Shqipërinë

Kryeministri i Greqisë Kyriakos Mitsotakis ka dhënë një intervistë mbrëmë për median greke SKAI TV ku ka folur edhe për çështjen e Fredi Belerit.

Mitsotakis ka thënë se kjo çështje ka komplikuar marrëdhëniet e Shqipërisë me Greqinë. Ai vuri në dukje sërish, mbajtjen në paraburgim të Belerit dhe mos-lejimin që të bëjë betimin si kryebashkiak i Himarës.

'Ne kemi shprehur rezervat tona të forta. Jo vetëm që nuk iu dha mundësia të betohet gjatë kohës që ishte në paraburgim, por edhe tani që kemi vendimin e gjykatës nëse ka qenë një proces i drejtë. Ne do të këmbëngulim, nuk ka asnjë vendim përfundimtar', tha ai, duke nënvizuar se mënyra se si Shqipëria e trajtoi këtë çështje ka ndikuar negativisht në marrëdhëniet greko-shqiptare.

LEXO EDHE:
Dritan Hila: Pse Micotaqis duhet ta pranojë dorën e shtrirë të Ramës!

Nga ana tjetër, e përditshmja greke Kathimerini e ka komentuar këtë intervistë të Mitstotakis duke thënë se Athina pret një lëvizje vullnet mirë nga pala shqiptare.

Më tej ajo shton se kryeministri grek përdori tone të buta, por kjo pas taktikave agresive sipas saj të kryeministrit Edi Rama, i cili denoncoi se ka përpjekje për të ndërhyrë në drejtësinë shqiptare.

G.K/r.k./Shqiptarja.com

TAG:
• Kyriakos Mitsotakis
• edi rama
• fredi beleri
• greqi