Refuzuan të vaksinoheshin kundër COVID-19, United Airlines do të përjashtojë nga puna afro 600 punonjës

Linja ajrore amerikane United Airlines njoftoi se ka nisur procedurat për të përjashtuar nga puna 593 punonjës të cilët kanë refuzuar të vaksinohen kundër koronavirusit (COVID-19). Në një e-mail nga drejtuesit e kompanisë drejtuar punonjësve thuhet se ky ishte një vendim jashtëzakonisht i vështirë, por që ata duhej të garantonin sigurinë e ekipeve të tyre.

United Airlines, kompania kryesore ajrore në SHBA, e cila e ka bërë të detyrueshme që të gjithë punonjësit e saj në vend të vaksinohen kundër COVID-19, deklaroi se e kanë shtyrë planin për pushime të papaguara nga 2 tetori në 15 tetor për shkak të një padie në vazhdim.

Kompania me mbi 67 mijë punonjës tha se 99 për qind e punonjësve tashmë kanë përfunduar vaksinimin, duke shtuar se personat që do të përjashtohen nga puna përbëjnë 1 për qind. Linja ajrore amerikane, duke raportuar se edhe 2 mijë punonjës të tjerë kanë kërkuar një përjashtim mjekësor ose fetar, i barabartë me rreth 3% të 67 mijë punonjësve.

 “Kjo është një arritje historike për kompaninë tonë ajrore dhe punonjësit tanë, si dhe për klientët dhe komunitetet që ne u shërbejmë. Arsyetimi ynë për të kërkuar vaksinën për të gjithë punonjësit e United në SHBA ishte i thjeshtë  për t’i mbajtur njerëzit tanë të sigurt dhe e vërteta është kjo: të gjithë janë më të sigurt kur të gjithë vaksinohen dhe kërkesat për vaksinë funksionojnë”, thanë shefat e kompanisë.

United njoftoi më 6 gusht se kompania ajrore me bazë në Çikago po kërkonte që të gjithë 67 000 punonjësit e saj me qendër në SHBA të vaksinoheshin. Në fillim të gushtit, United Airlines vendosi të pushojë punonjësit e pavaksinuar, më së voni deri në pesë javë pasi vaksina mori miratimin e plotë nga Administrata Amerikane e Ushqimit dhe Barnave .

TAG:
• Koronavirus
• Vaksina Covid
• united airlines