Pavarësisht sekpticizmit të opozitës, pikëpyetjeve dhe kërkesës për më shumë kohë, socialsitët po e cojnë përpara projekt-rezolutën anti-korrupsion të propozuar nga kryeministri Rama më 7 maj, që synon të rrisë sundimin e ligjit, luftojë korrpsionin dhe të përafrojë legjislacionin shqiptar me atë të Bashkimit Europian.
Pas më shumë se 1 ore diskutim, konferenca e kryetarëve miratoi me 9 votat pro të mazhorancës dhe abstenimin e anëtarëve të opozitës, kalimin për votim në seancën plenare të 27 majit. Në mungesë të Gazment Bardhit qëndrimin e opozitës e shpjegoi Jorida Tabaku.
“Më vjen mirë që lufta kundër korrupsionit duhet ndryshojë dhe qeveria pranon që kemi një korrupsion endemik dhe sot ekziston në të gjithë institucionet. Tani kush ka folur e paska pasur të drejtë. Rezoluta që ju propozoni çon miratimin e ngritjes së një komisioni të posaçëm dhe disa elementë që ne mendojmë se kanë nevojë për një debat më të gjerë se sa debati në kuvend. Kam dorëzuar disa ndryshime ligjore për të luftuar korrupsionin me ndryshime që i vijnë në ndihmë kësaj beteje dhe që u refuzuan nga PS. Mazhoranca i rrëzoi duke mohuar korrupsionin. Sot, qeveria pranon korrupsionin dhe mungesën e vullnetit politik. Ju kërkoni të krijoni një Komision AdHoc që merr funksione nga KKIE dhe pa asnjë argument.”, tha ajo.
Pikëpyetje të cilat Tabaku i ngriti edhe në tryezën e konferencës së kryetarëve, por kreu i grupit të socialistëve sqaroi se nuk do të ketë asnjë mbievndosje kompetencash me asnjë komision ekzistues në parlament.
"Nuk mund ta bëjë qeveria këtë gjë prandaj po marrim një iniciativë të tillë në Parlament. Qeveria është një nga institucionet që do të raportojë për mirëqeverisjen dhe luftën kundër korrupsionit. S'ka asnjë merak për mbivendosje kompetencash nga Këshilli i Integrimit Europian apo komisionet e tjera. Procesi Screenig është burimi kryesor që na çon në marrjen e kësaj iniciative duke e shpallur prioritet luftën kundër korrupsionit dhe mirëqeverisjen. Padiskutim që mazhoranca ka barrën kryesore sepse i është deleguar sovraniteti nga qytetarët, por ne kemi kërkuar gjithëpërfshirje në Parlament për ta udhëhequr këtë iniciativë", deklaroi Çuçi.
Spiropali tha se rezoluta është një hapësirë e re që adreson luftën kundër korrupsionit dhe mirëqeverisjen.
‘Procesi i integrimit është i të gjithë shqiptarëve, jo vetëm i PS-së apo qeverisë. Draft-rezoluta është mekanizëm shtesë dhe detyrim që ka dalë nga procesi Screening. Komisioni i Posacëm është një hapësirë e re që adreson luftën kundër korrupsionit dhe mirëqeverisjen.’- tha Spiropali.
Miratimi i kësaj rezolute në parlament kërkon një shumicë të thjeshtë votash, çka do të thotë se mazhoranca mund ta miratojë lehtësisht vetëm me votat e saj. Pas miratimit të rezolutës mes palëve pritet të nisin diskutimet për ngritjen e një komisioni të posacëm, që do të monitorojë punën e institucioneve, përfshirë edhe ato të drejtësisë për luftën kundër korrupsionit, të rekomandojë propozojë ndryshime ligjore në përputhje me legjislacionin e Bashkimit Europian.
‘Korrupsioni nuk luftohet me rezoluta në fund të mandatit’, është shprehur kështu kreu i Partisë Demokratike lidhur me rezolutën anti-korrupsion të propozuar nga PS, e cila do të kalojë të hënën 27 maj në Kuvend.
Basha shkruan në një postim në rrjetet sociale, se e vetmja mënyrë për të luftuar korrupsionin është një plan i qartë dhe vullnet politik.
“Koha kur qeveria nxit dhe mbështet korrupsionin merr fund. Korrupsioni nuk luftohet me rezoluta në fund të mandatit dhe aq më pak duke vështirësuar dhe tentuar të kontrollosh drejtësinë, por me plane të qarta dhe vullnet politik”, shkruan ai.
Ndërkohë, kryetari i Partisë Demokratike, Lulzim Basha ka dhënë të tjera indicie rreth programit që do të shpaloset në 1 Qershor si alternativë për shqiptarët. Kreu i PD, vuri theksin tek lufta ndaj korrupsionit dhe mbështetja ndaj drejtësisë.
“Vijojmë diskutimet me grupet e punës për programin qeverisës të Partia Demokratike. Korrupsioni është pengesa më e madhe, për zhvillimin e vendit dhe krijimin e mundësive për të rinjtë, që ata të ndërtojnë jetën e tyre në Shqipëri. Prandaj lufta kundër korrupsionit, mbështetja për drejtësinë, transparencë e llogaridhënie në qeverisje janë në fokus të programit tonë, në mënyrë të detajuar”, shkruan Lulzim Basha në rrjetet sociale.
Deputetja e PS-së Elisa Spiropali në mbledhjen e Konferencës së Kryetarëve për draft-rezolutën për thellimin e reformave për mirëqeverisjen, sundimin e ligjit dhe luftën kundër korrupsionit për Shqipërinë 2030 në Bashkimin Europian, tha se ky është një mekanizëm shtesë dhe detyrim që ka dalë nga procesi Screening.
Spiropali tha se Komisioni i Posaçëm është një hapësirë e re që adreson luftën kundër korrupsionit dhe mirëqeverisjen.
‘Së pari, dua të theksoj se ky nuk është një ndryshim kursi sa i takon mirëqeverisjes, antikorrupsionit dhe sundimit të ligjit, në të kundërt, është një thellim i kursit tonë për mirëqeverisjen, antikorrupsionin dhe sundimit të ligjit, duke qenë se kjo forcë politike jo vetëm në këtë rezolutë, por çdoherë dhe kurdoherë e deklaron se reforma në drejtësi, procesi në të cilin kaloi hartimi i planit kombëtar të veprimit për reformën në drejtësi ishte jo vetëm një plan politik yni, por edhe një plan qeverisës dhe më pas u shndërrua në një plan kombëtar përmes Kuvendit të Shqipërisë.
Së dyti, ne nuk synojmë që përmes një rezolute, me shkop magjik, të përcaktojmë vullnetet dhe politikat sa u takon këtyre tri fushave, por, sigurisht, rezoluta është një hap i parë deklarativ, ku përcaktohet hapësira gjithëpërfshirëse që ka Kuvendi. Ne do të donim që të kishim në këtë rezolutë jo vetëm diskutimet e opozitës, që besoj se do t’i kemi, sepse ju në të gjitha seancat i prekni këto çështje, por në fund edhe njëlloj dakordësie sa u takon parimeve, sepse aty nuk shprehet asgjë tjetër përveç parimeve, për të cilat besoj se biem të gjithë dakord, ku përfshihet edhe çështja që ju e ngritët me shqetësim, për pakthyeshmërinë e reformës në drejtësi.
Shprehimisht, në rezolutë ne flasim për këtë pakthyeshmëri dhe mosprekjen e shtyllave apo të elementeve të reformës në drejtësi, siç kemi rënë dakord dhe siç kemi votuar në vitin 2016.
Këtë hapësirë gjithëpërfshirëse, që Kuvendit ia mundëson Kushtetuta dhe ligji, ne mund ta përdorim për të manifestuar vullnetin tonë politik, por edhe institucional në konceptimin e politikave më të mira dhe hartimin e një plani kombëtar veprimi në këto tri fusha, që është edhe synimi, në fakt, i ngritjes së komisionit të posaçëm për mirëqeverisjen, antikorrupsionin dhe sundimin e ligjit në Kuvend. Këtu nuk ka asnjë përplasje, asnjë marrje kompetencash të komisioneve të përhershme apo të Këshillit të Integrimit, të gjithë kanë rolin e tyre. Kuvendi, në të gjithë këtë hapësirë të gjerë që ka, mundëson edhe ngritjen e komisioneve të posaçme për çështje të caktuara. Këto tri fusha janë prioritet i qeverisë, prioritet kombëtar dhe jo vetëm yni, sepse kanë dalë nga Procesi i Shqyrtimit Analitik të legjislacionit me BE-në, pra procesit screening.
Ne sot kemi një diagnozë, kemi një radiografi të të gjithë trupit, jo vetëm të ligjeve, por edhe të funksionimit të institucioneve tona, që ka dalë nga ky proces screening negociatash, dhe e kemi shumë të qartë se ku duhet të jemi, jo vetëm institucionet e qeverisë, pra që varen nga ekzekutivi, por të gjitha institucionet.
Nuk integrohet as Partia Socialiste e Shqipërisë, as qeveria e Republikës së Shqipërisë në BE, integrohet Shqipëria në BE dhe ku tjetër, përveç Kuvendit, ne mund ta garantojmë këtë hapësirë, ku të shfaqim bashkëpërgjegjësinë tonë në këtë proces, ku të afrojmë edhe ekspertët më të mirë, vendas dhe të huaj, që të jenë partnerët tanë, BE-ja dhe SHBA-të, pjesë e këtij procesi, siç shkruhet e zeza në të bardhë në këtë rezolutë, dhe siç është vullneti ynë për t’i përfshirë në komisionin e posaçëm.
Unë besoj se është një mundësi e mirë për të gjithë deputetët, edhe për ju personalisht, por nuk e kam vetëm për ju, por për të gjithë deputetët që ndër vite kanë punuar dhe janë marrë me procesin e integrimit, apo siç drejtoni edhe Komisionin për Çështjet Europiane në Kuvend, që të jeni pjesë e hartimit të këtij plani kombëtar, me masa institucionale, administrative apo edhe ligjore, të cilat adresojnë tashmë problematika konkrete, që kanë dalë nga procesi i shqyrtimit analitik, si dhe udhërrëfyesit që ne kemi hartuar për shtetin e së drejtës dhe reformën në administratën publike, për të përmendur dy.
Kjo është një mundësi, besoj se është një instrument që Kuvendit ia jep Kushtetuta, ia jep ligji dhe ne duhet t’i përdorim të gjitha këto mundësi jo për të treguar protagonizëm politik, prandaj e kërkojmë bashkëpërgjegjësinë tuaj në këtë proces, por për të qenë të vetëdijshëm që Shqipëria i ka të gjitha mundësitë për t’u integruar në BE brenda vitit 2030, siç ka shfaqur vullnetin dhe ambicien si kryetari i Këshillit, Charles Michel, apo kryetarja e Komisionit Europian, të cilët besojnë se Ballkani Perëndimor mund ta hedhë këtë hap dhe Shqipëria, në fakt, është një lider në këtë rajon sa i tako këtij procesi.
Duke ju falënderuar për kohën që keni marrë jo vetëm për leximin, por edhe për angazhimin tuaj, këtu flas për të gjithë deputetët që janë në Konferencën e Kryetarëve, por edhe ata që mungojnë sot, unë do t’ju nxitja që në seancën e ditës së hënë ne jo vetëm ta diskutojmë, por edhe ta miratojmë këtë rezolutë.’- tha Spiropali.
Lajme të tjera
-
Komisioni 'Antikorrupsion', Xhafaj: Kemi gati draftin, konsolidim reformës në drejtësi
17 Dhjetor, 13:52 -
Nisin në Durrës Forumet e Dialogut Qytetar, debatohen gjetjet dhe sugjerimet e ekspertëve për mirëqeverisjen, antikorrupsionin dhe sundimin e ligjit
12 Dhjetor, 23:17 -
Antikorrupsioni/ Fjala e plotë e Edi Ramës: S’ka komplot kundër SPAK, pa PS s’do kishte reformë në drejtësi
11 Dhjetor, 19:03
-
Kulluri në Report Tv: Komisioni ‘Xhafaj’ po tenton të fusë ujë në themelet e reformës në drejtësi, PS kampione e korrupsionit
11 Dhjetor, 18:43 -
Antikorrupsioni/ Fatmir Xhafaj: Kur nisi fillimisht pati dyshime dhe spekulime, por provuam të kundërtën sikurse dhe me Reformën në Drejtësi!
11 Dhjetor, 16:46 -
Rama: 6 muaj sulme sikur unë e Xhafaj kishim plan të errët për të bllokuar SPAK, s'presim opozitën për të shkuar para! Gonzato: Reforma në drejtësi të jetë e pakthyeshme
11 Dhjetor, 16:14 -
Konferenca e Kryetarëve debate për interpelancën e Bardhit për Ramën! Rrëzohet ngritja e Komisionit të Posaçëm 'Pakti i fëmijëve'! U kërkua nga 'Djathtas 1992'
11 Dhjetor, 13:13 -
Konferenca e Kryetarëve/ Spiropali propozoi emërtimin e dy sallave të vogla të Kuvendit me emrat Bashkim Fino dhe Gerti Bogdani
11 Dhjetor, 12:38 -
Goditja e korrupsionit me tenderët, koncensionet dhe investimet strategjike! Çfarë thonë ekspertët e Komisionit të Posaçëm
10 Dhjetor, 20:53 -
Antikorrupsioni kalon në sitë sektorët më me risk, ekspertët: Kujdes me prokurimet, koncesionet dhe tatimet! (VIDEO)
10 Dhjetor, 17:54
-
Shmangia e konsultimeve formale dhe referendumet lokale për një qeverisje të hapur, të tjera gjetje dhe rekomandime të ekspertëve te ‘Antikorrupsioni’
7 Dhjetor, 08:49 -
Kuvendi i jep 350 mijë euro Xhafajt për Komisionin Antikorrupsion! Do të punësojë 91 ekspertë me pagesë deri në 8 mijë euro (EMRAT+ DOKUMENTI)
4 Dhjetor, 14:03
