Riorganizimi i Partisë së Lirisë, anëtarja e Komitetit Drejtues shpall kandidaturën për zv.presidente! Në garë me Erisa Xhixhon, të besuarën e Metës

TIRANË- Anëtarja e Komitetit Drejtues Kombëtar të Partisë së Lirisë, Myrvete Asqeri ka shpallur kandidaturën e saj për postin e zv.presidentes. Silvia Caka njoftoi kandidaturën e Myrvete Asqerisë në një dalje për mediat, ndërkohë që për këtë post kandidon edhe Erisa Xhixho, një nga të besuarat e Ilir Metës.

“Asqeri ka mbaruar arsimin e lartë për “Kontabilitet – Financë” dhe për një kohë të gjatë ka dhënë konsulencë në strategji biznesi, risk financiar, risk kredie, produkte financiare, akes në financë, trajnim dhe mentorim, operacione huadhënie, menaxhuese dhe motivuese e një numri të madh burimesh njerëzore në banka të nivelit të dytë. Aktualisht, ajo mban pozicione të larta në sistemin bankar, pranë të cilit është atashuar që prej vitit 2021”, tha Silvia Caka.  

Partia e Lirisë do të mbajë të shtunën e 27 prillit Konventën, ku vetë kryetari Ilir Meta ka paralajmëruar riorganizim të partisë. Meta ka shtuar akuzat për tradhtarë brenda PL-së, akuza që janë parë si një shigjetim drejt grupit të afërt të Monika Kryemadhit. Meta ka thënë se do i jepet fund nepotizmit..

Në PL s’do ketë më kryetar, por President. Kandidati i vetëm për President është Ilir Meta, ndërsa Tedi Blushi është propozuar Sekretar i Përgjithshëm.

SI.E./Shqiptarja.com

TAG:
• Partia e Lirise
• Erisa Xhixho
• Ilir Meta
• myrvete asqeri