Sociale

Rritet numri i të rinjve të prekur nga ankthi, psikiatrja: Marrja e ilaçeve pa recete është e rrezikshme

Në Shqipëri është rritur ndjeshëm numri i të prekurve nga ankthi. Statistika të shumta tregojnë çdo ditë shifra te larta, kryesisht tek të rinjtë. Për Report TV psikiatria Arjana Rreli thotë se rreziku më i madh vjen nga mostrajtimi i kësaj sëmundjeje.

Redaksia 17 Janar 2019, 20:52 | Përditesimi: 17 Janar 2019, 21:02

Rritet numri i personave të prekur nga ankthi dhe gjendja depressive. Psikiatrja Arjana Rreli thotë për Report TV se vitet e fundit vihet re se është rritur numri i të rinjve që preken nga këto probleme.

Ne shohim se rastet janë rritje, jo vetëm për shkak të ndërgjegjësimit, por edhe sepse në shoqërinë tonë ka disa faktorë stresantë që i bëjnë njerëzit lehtësisht të ngacmueshëm, që format e ankthit të shprehen në forma nga më të ndryshmet.

Arjana Rreli, psikiatre

Me rritjen e numrit të njerëzve që vuajnë nga ankthi, është bërë e mundur që edhe informacionet në lidhje më të, të jenë më të detajuara. Por shpesh, komplekset kanë shtyrë të rinjtë të marrin trajtim pa u konsultuar, që sipas psikiatres Rreli mund të rezultojë e rrezikshme.

LEXO EDHE:
Njerëzit inteligjentë mund të vuajnë më shumë nga ankthi, por pse?

Vetëtrajtimi i cdo probleme e sidomos i atyre me probleme të shëndetit mendor është i gabuar, sepse ka disa medikamente që krijojnë varësi.

Arjana Rreli, psikiatre

Ankthi në pjesën më të madhe të rasteve, kurohet në mënyra alternative, por sigurisht ka edhe raste kur rekomandohet përdorimi i medikamenteve.

Në momentin kur pengon mirëfunksionimin e personit dhe e bën të paaftë në aktivitetin e përditshëm duhen medikamente.

Arjana Rreli, psikiatre

Edhe vetë të rinjtë tregojnë se kanë vuajtur nga ankthi dhe sipas tyre shkak kanë qenë problemet e përditshme.

Mendoj se ankthi është tek cdo person. Cdo njeri ka caste kur ndihet në ankth. Edhe unë kam qenë një nga këto persona.

Një e re që ka vuajtur nga ankthi