Samiti i BE në Tiranë, Drejtori i Policisë: Plan të detajuar masash! Nuk refuzojmë protestat por siguria është prioritare mbi preferencat gjeografike (Të Berishës)

Policia e Shtetit garanton të drejtën për të protestuar edhe më 6 dhjetor kur do të zhvillohet samiti BE-Ballkani Perëndimor, por garantimi i sigurisë do të jetë prioritar mbi preferencat (kapriçot) për vendin se ku do të zhvillohet protesta nga ana e organizatorëve, Rithemelimit të Sali Berishës.

Ka qenë drejtori i Përgjithshëm i Policisë, Muhamet Rrumbullaku, ai i cili pas takimit me ministrin e Brendshëm, Bledi Çuçi, doli në një konferencë për mediat për të folur për mbarëvajtjen e Samitit BE-Ballkani Perëndimor që do të zhvillohet në Tiranë më 6 dhjetor.

“Policia e Shtetit nuk ka patur dhe nuk do të ketë asnjë prirje për të ndaluar apo spostuar asnjë protestë, por në këtë rast, siguria e 32 delegacioneve shtetërore me liderët e tyre nga BE dhe Ballkani Perëndimor, e delegacionit të Presidentit të Këshillit, e Presidentes së Komisionit dhe e të gjithë personaliteteve VIP të kategorisë së autoriteteve të larta shtetërore, na imponon që të vëmë sigurinë kombëtare dhe ndërkombëtare mbi dëshirën gjeografike për të protestuar. Policia e Shtetit nuk e ndalon absolutisht protestën e lajmëruar, por garanton mbarëvajtjen e saj jashtë perimetrit të sigurisë, pasi Perimetri i Sigurisë është i pacënueshëm dhe i aksesueshëm vetëm nga pjesëmarrësit në Samit dhe nga gazetarët e akredituar.  Ne kemi besim se arsyeja do të fitojë mbi emocionet e kujtdo dhe jemi të përgatitur për çdo rast kur do të ndodhë e kundërta”, tha Rrumbullaku.

LEXO EDHE:
Vrasja e Martinit, gazetari te ‘5 pyetjet’: Të sqarohet a ishin dy thika në vendngjarje? Zëdhënësi i policisë: Një autor, po punohet për masa të reja sigurie në shkolla! Prençi: Dështim

Ai tha se policia ka parë dhe vlerësuar edhe kërkesën për zhvillimin e protestës, për të cilën kemi kthyer një përgjigje ligjore, profesionale në interes të samitit, që është një ngjarje historike, e para në këto 30 vite.

"Edhe në respekt të drejtës për të protestuar kam thirrur organizatorët dhe i kemi sqaruar për detyrimet tona për garantimin e protestës në çdo vend tjetër përveçse në perimetrin e sigurisë. Do të kërkoja mirëkuptimin e qytetarëve që për shkak të masave të sigurisë që do të marrim të na mirëkuptojnë se edhe ky samit është në interes të të gjithë shqiptarëve.", tha ai. 

Kreu i policisë së Shtetit tha se zhvillimi i Samitit të Bashkimit Europian, në Tiranë, tregon më së miri se Shqipëria është vend i sigurt dhe demokratik dhe sipas tij uniformat blu janë të angazhuara me maksimumin e kapaciteteve njerëzore dhe logjistike, për mbarëvajtjen e tij.

“Për të garantuar rendin dhe sigurinë, në rrugëkalimet e delegacioneve dhe në vendin ku do zhvillohet Samiti, Policia e Shtetit ka hartuar një plan të detajuar masash, duke  bashkëpunuar me agjencitë ligjzbatuese brenda vendit, me ekspertë të sigurisë së vendeve të BE-së, si dhe me organizatat ndërkombëtare INTERPOL dhe EUROPOL, për shkëmbimin në kohë të informacioneve. Nisur dhe nga përvoja e aktiviteteve shumë të rëndësishme të zhvilluara më parë, Policia e Shtetit ka fituar përvojën e duhur dhe besojmë se edhe në këtë rast, Policia e Shtetit do të tregojë përkushtim dhe profesionalizëm, duke i bërë një shërbim të çmuar imazhit të vendit. Dua të siguroj nxënësit, punonjësit e institucioneve, banorët rezidentë brenda permitetrit të sigurisë, por dhe jashtë tij, se data 6 dhjetor është ditë normale mësimi, pune e aktiviteti të përditshëm, pavarësisht kufizimeve të lëvizjeve në disa akse rrugore, për të cilat Policia e Shtetit ka marrë masa për devijimin e lëvizjeve në rrugë alternative, me qëllim që të mos ketë pengesa për vijimin normal të aktiviteteve gjatë datës 6 dhjetor”, tha Muhamet Rrumbullaku.

Që në 5 dhjetor, ora 14:00, të gjitha rrugët rreth Bulevardit ‘Dëshmorët e Kombit’ dhe stadiumit ‘Air Albania’ do të jenë të bllokuara, si masë sigurie e marrë për mbarëvajtjen e ngjarjes historike që do të zhvillohet në Tiranë në 6 dhjetor, Samiti i BE-Ballkani Perëndimor. Në këto akse rrugore, brenda perimetrit të sigurisë do të ndalohet parkimi, qarkullimi i automjeteve dhe qytetarëve, ndërsa do të lejohet vetëm lëvizja e banorëve të zonës. 6 dhjetori nuk do të jetë pushim për administratën apo për shkollat/universitetet. Mësimi do të vijojë normalisht si te Shkolla ‘Kosova’, Liceu Artistik, si dhe universitete që janë brenda këtij perimetri. Drejtori i Policisë së Shtetit, Rebani Jaupi, me anë të një konference për mediat, sqaroi dje me detaje se si do të bëhet hyrja.

Kujtojmë se ish-Kryeministri Sali Berisha ka nënvizuar ditët e fundit se më 6 dhjetor, ditën kur të gjithë liderët e Ballkanit do të mblidhen në vendin tonë do të organizojë protestën e radhës, duke thënë se ky do të ishte një rast historik që qytetarët me anë të një proteste paqësore të ngrinin zërin e tyre kundër qeverisjes aktuale. 

 

Harta me rruget e bllokuara

Rendit zhvillimet sipas orarit:

Të Fundit Të Parat

K.T.//Shqiptarja.com

TAG:
• Samiti i BE ne Tirane
• policia e shtetit
• Muhamet Rrumbullaku
• 6 dhjetori i Berishes
• Bledi Cuci