Kryeministri Edi Rama shfaqi hapur kritika për mënyrën e menaxhimit të Radio Televizionit Shqiptar, duke e quajtur një dështim. Pas mbledhjes së grupit të PS, kryeministri tha se Shqipëria sot nuk ka televizion publik, ndërsa shërbimin e televizionit publik e konsideroi si “shërbimi me mizerabël në botë”. Kreu i qeverisë tha se asnjë lekë nga taksat publike nuk do të shkojë më për televizionin publik derisa të reformohet. Para deputetëve të PS, Rama tha se në çdo takim që ka pasur me drejtorët e këtij institucioni ia ka dhënë si opsion mbylljen për t’u rikthyer më pas.

Kryeministri shkoi edhe më tej duke thënë se nuk e ka parë RTSH që prej vitit 1990, duke sjellë si shembull edhe intervistat e tij në televizion publik, për të cilat tha se janë të vetmet që nuk ka marrë asnjë mesazh.

Sa i takon reformës së TVSH-së, Rama tha se çdo opsion duhet të jetë në tryezë edhe mbyllja përfundimtare, edhe privatizimi, edhe partneriteti, por theksoi se ai vetë nuk përfshihet.

“Kam tentuar të krijojmë kushtet që RTSH të reformohet dhe kemi dështuar me suksesin më të plotë. Se di çfarë do të bëjë drejtuesja e re, por deri tani bilanci i RTSH është dështim i suksesshëm, nga borxhi në borxh dhe nga mospërfillja e publikut në mospërfillje, ne s’kemi televizion publik sot në Shqipëri, kemi një kanal atje, por hera e fundit kur e kam, parë është në vitin 1990 pata përmbysjes së protestave. Që atëherë televizion publik s’kam parë, kam vajtur i ftuar po as veten skam parë dhe janë të vetmet intervista pas të cilave nuk marr asnjë mesazh, se kam shkuar në një përshpirtje atje që duhet përshpirtje publike, më kanë parë i kam parë ata në sallë dhe jashtë studios s’më ka parë njeri. Drejtuesit e RTSH, të gjithë e dinë, nga unë nuk kanë marrë kurrë asnjë mesazh, se unë nuk e shoh dhe kur ndonjëri nga ju më thoni shiko çfarë bën RTSH. Të gjithë drejtorët i kam takuar pasi janë zgjedhur. U kam thënë mbylleni, nxirrni në ekran, televizioni publik i kërkon ndjesë popullit, të gjitha familjeve, në republikën e Shqipërisë dhe jashtë saj, i kërkon ndjesë dhe për të gjithë ata që nuk jetojnë më dhe që kanë qenë të detyruar siç jeni edhe ju të marrin shërbimin më mizerabël publik në glob, ju premtojmë se do reflektojmë dhe do rikthehemi në ekran kur të jemi gati dhe të bëjmë reformë. Si ka mundësi që televizionet e tjera me më pak buxhet shumë më tepër sukses, sepse buxhetin e tyre nuk e kanë të garantuar.

Duan të drejtën për të transmetuar ndeshjet e kombëtares, por leket nuk i paguajnë sepse ne jemi publik, doni lekët tona, shkoni tek qeveria. S’kemi për të dhënë asnjë lek nga taksat e shqiptarëve, deri kur t’i meritojë. Çdo opsion duhet të jetë në tryezë edhe mbyllja përfundimtare, edhe privatizimi, edhe partneriteti, edhe çdo gjë përvec kësaj që është. Unë nuk marr pjesë në këtë, siç nuk marr pjesë në asnjë lloj tentative për të rregulluar median, e vëra këtë aventurë thjesht për pak gjëra dhe u mbeti Shqipërisë atje ajo paragrafi, drafti i ligjit për median. Sot BE diskuton shumë më tepër se aq, por nuk merrem, as me mediat online, as tv publik, ju që vuani shpifjet e tyre merruni”, tha Rama.

Pas kësaj deklarate të kryeministrit, reagoi Asociacioni i Gazetarëve të Shqipërisë duke thënë se kjo retorikë “stigmatizon median publike” dhe “sugjeron zgjidhje drastike”. Opsionet për mbyllje, privatizim ose partneritet, i cilëson “ekstreme” dhe se “do të dëmtonin rëndë pluralizmin mediatik.”

Rendit zhvillimet sipas orarit:
Ora 19:44
Kritikat e Ramës ndaj RTSH, reagon Asociacioni i Gazetarëve: Mbyllja e privatizimi masa ekstreme, çdo reformë në konsultim me grupet e interesit

1768581135_edirama.jpg

Asociacioni i Gazetarëve të Shqipërisë ka reaguar me shqetësim për deklaratat e kryeministrit, i cili e quajti RTSH “dështim.” Në një deklaratë publike, Asociacioni tha se kjo retorikë “stigmatizon median publike” dhe “cenon parimet e lirinë e medias.”

Më tej thotë se televizioni është institucion i interesit publik. Sa për dështimin, shkruhet se ka një sërë faktorësh që kanë ndikuar drejtpërdrejt në funksionimin e tij. Në deklaratë theksohet se reforma duhet të vijë përmes një analize të thellë dhe dialogut me profesionistët e medias.

“Asociacioni i Gazetarëve të Shqipërisë shpreh shqetësim të thellë lidhur me deklaratat e Kryeministrit Edi Rama mbi Radio Televizioni Shqiptar (RTSH), të bëra më 16 janar, ku televizioni publik u cilësua si “dështim” dhe u hodhën në tavolinë opsione ekstreme si mbyllja, privatizimi apo partneriteti.

AGSH vlerëson se retorika politike që stigmatizon median publike dhe sugjeron zgjidhje drastike, pa një analizë të thelluar dhe pa garanci për pavarësinë editoriale, cenon parimet themelore të shërbimit publik mediatik dhe standardet evropiane për lirinë e medias.

Televizioni publik nuk është thjesht një ndërmarrje financiare, por një institucion i interesit publik që duhet të garantojë informim të paanshëm, kulturë, edukim dhe akses të barabartë për qytetarët.

 Është e papranueshme që përgjegjësia për dështimet strukturore të RTSH-së t’i faturohet vetëm institucionit, duke anashkaluar faktin se për vite me radhë ndërhyrjet politike, emërimet e kontestuara, mungesa e transparencës dhe paqëndrueshmëria financiare edhe përmes abuzimit të të emëruarve politikë kanë ndikuar drejtpërdrejt në funksionimin e tij.

Refuzimi i financimit publik si mjet presioni politik përbën një rrezik serioz për pavarësinë e medias publike.

AGSH thekson se çdo reformë e RTSH-së duhet të ndërtohet mbi dialog të gjerë me gazetarët, shoqërinë civile dhe ekspertët e medias, duke respektuar praktikat më të mira evropiane dhe rekomandimet e organizatave ndërkombëtare.

 Opsionet si mbyllja apo privatizimi i një transmetuesi publik janë masa ekstreme që do të dëmtonin rëndë pluralizmin mediatik dhe të drejtën e publikut për informim.

 Asociacioni i Gazetarëve të Shqipërisë për vite me radhë ka bërë thirrje për reforma të thella në RTSH, që lidhen kryesisht me zgjedhjen e anëtarëve të Këshillit Drejtues e më pas me Drejtorin e Përgjithshëm, si dhe një reformë e brendshme strukturore”, përmbyll deklarata

 

 

P.J/Shqiptarja.com