Shkodër/ Sekuestrohen 51 kg kanabis, trafikantët i 'ikin' policisë (VIDEO)

SHKODËR- Dy të rinj nga fshati Plan i Shkodrës janë shpallur në kërkim gjatë një operacioni të policisë kundër veprimtarisë së lëndëve narkotike.

Burime zyrtare bëjnë me dije se bëhet fjalë për 27-vjeçarin me iniciale K.L dhe 24-vjeçarin M.L. Mësohet se të rinjtë sapo kanë kuptuar që ndiqeshin nga policia, janë larguar me shpejtësi nga banesa ku u gjet drogë, duke shfrytëzuar edhe terrenin e vështirë malor në të cilën ndodhej kjo godinë.

Gjatë kontrollit, uniformat blu kanë sekuestruar 100  fishekë të kalibrit 7.62 mm dhe një telefon celular.

Deklarata e plotë e policisë
Sekuestrohen 51 kg lëndë narkotike Cannabis Sativa dhe një sasi fishekësh luftarakë. Shpallen në kërkim dy persona, të cilët për shkak të terrenit të vështirë malor mundën të largohen.

Specialistët e Seksionit për Hetimin e Trafiqeve dhe Narkotikët në DVP Shkodër, në bashkëpunim me FNSH Shkodër, në vijim të punës për goditjen e veprimtarisë kriminale në fushën e narkotikëve dhe në bazë të informacioneve të marra në rrugë operative, kanë finalizuar operacionin policor të koduar “Pult”, si rezultat i të cilit, gjatë kontrolleve të ushtruara në ndërtesat e pa banuara në fshatin Plan, janë gjetur e sekuestruar në cilësinë e provës materiale 51 kg lëndë e dyshuar narkotike Cannabis Sativa, 100  fishekë të kalibrit 7.62 mm dhe një telefon celular.

Si rezultat i operacionit dhe veprimeve hetimore është bërë identifikimi dhe shpallja në kërkim e dy shtetasve K. L. 27 vjeç dhe M. L. 24 vjeç, të dy banues në fshatin Plan, Shkodër.

Për shkak të terrenit të vështirë malor, në momentin që kanë kuptuar që po ndiqen nga Policia, këta dy shtetas kanë arritur të largohen, por po punohet intensivisht për kapjen dhe ndalimin e tyre.

Materialet iu referuan Prokurorisë pranë Gjykatës së Shkallës Parë Shkodër, për veprat penale “Prodhimi dhe shitja e lëndëve narkotike” e kryer në bashkëpunim dhe “Mbajtja pa leje e armëve dhe e municionit”. 

B.K./Shqiptarja.com

TAG:
• Shkoder
• kanabis