Shqiptarja qëlloi mjekun grek me armë zjarri në bark pas problemeve për kujdestarinë e fëmijës, vajza e tronditur: Mami ngriti armën dhe qëlloi babin

Ish-partneri i Klodiana Celos, gruas që qëlloi me 4 plumba mjekun grek për shkak të problemeve me kujdestarinë e vajzës së tyre, tha se gruaja shqiptare ishte obsesive dhe shihte kudo armiq.

Duke folur për mediat greke ai tregoi se Klodiana mendonte se çdo njeri ishte i përfshirë në një plan për t’i marrë vajzën, duke e bërë atë të ngrinte padi ndaj shumë personave.

“Çdo njeri e konsideronte armik. Kushdo që e kundërshtonte atë, gjente belanë, ashtu edhe unë. Ajo ka hedhur në gjyq të gjithë botën, babin e vajzës, gruaja e tij, mua, nënën dhe motrën e saj. Kishte obsesione që i kalonin kufijtë.”, ka thënë ai.  

Burri tregoi se me Klodianën janë njohur në fillim të viti 2016, ndërsa tha se edhe e ka mbështetur gjatë periudhës kur mjeku i mori kujdestarinë e vajzës. Burri gjithashtu zbuloi se ajo është shtruar dy herë në spiral për shkak të problemeve mendore, ndërsa shtoi se gjendja e saj u përkeqësua me kalimin e kohës.

“Fatkeqësisht, Klodiana është shtruar në spital të paktën dy herë. Unë isha partneri i saj dhe një burrë që i qëndrova shumë pranë gjatë periudhës kur babai i vajzës së saj i mori kujdestarinë e vajzës. Në atë periudhë shëndeti i saj mendor u përkeqësua, u bë agresive ndaj meje ashtu edhe ndaj personave të tjerë.”, tha ai.

E dëshpëruar pasi prej kohësh nuk i kishte parë sytë vajzës, Klodiana Celo, nëna shqiptare e cila ditën e djeshme qëlloi me 4 plumba babain e fëmijës së saj në Athinë, 1 vit e gjysmë më parë ka folur për dramën që përjetonte prej 2016 në gazetën greke “Espresso”.

Me dhimbjen e një nënë që i kanë rrëmbyer dritën e syve, fëmijën e vetme, ajo ka treguar mes drithërimave sesi doktori George Neos i mori vajzën dhe nuk i lejoi asnjë komunikim me të.

Duke shpalosur prapaskenat e ngjarjeve, Klodiana ka treguar përpjekjet për të parë vajzën e saj me të cilën kishte humbu çdo kontakt dhe mjedisin që po rritej ajo nën presionin e manipulimeve të babait të saj.

“Kanë krijuar një lojë, madje kanë paguar edhe avokatët, në mënyrë që vendimi gjyqësor të ishte kundra meje, ndërsa kërcënimet ndaj meje janë të vazhdueshme.”, ka thënë ajo.

Siç shkruan gazeta greke, nëna e re, është shprehur se një nga avokatët që mori përsipër ta përfaqësonte e tradhtoi duke u paraqitur vetë në gjykatë si bashkëshorti i saj, duke paraqitur dokumente të falsifikuara.

“Jeta ime ka ndalur që kur më morën vajzën”, ka thënë ajo mes lotëve.

Ajo tregoi se vajzën e vogël, frytin e lidhjes së saj jashtëmartesore me mjekun, i cili në atë kohë ka qenë i martuar, ka lindur në vitin 2009 dhe është rritur me të për shtatë vitet e para të jetës së saj.

Sipas saj, mjeku fillimisht nuk e ka njohur, pasi dyshonte mbi atësinë e saj, megjithatë testi i ADN-së konfirmoi se ai ishte babai i saj biologjik. Pas kësaj ai filloi të takohej me vajzën e mitur, ndërsa në fillim të vitit 2016 arriti ta merrte kujdestarinë e fëmijës.

Në këtë moment nis Odiseja e nënës në një “luftë” të cilën zgjodhi ta përfundonte me armë, pasi organet e drejtësisë i kthyen kurrizin.

“Ai shpif për mua, duke munduar të më nxjerrë të çmendur”, tregoi ajo.

Klodiana tha se 5 muaj pasi ia morën vajzën, ajo ra në koma dhe sërish nuk e lejuan ta shihte.

“Vajza ime jeton me dy persona nga 70 vjeç, në vend që të jetë duke jetuar me nënën e saj. Po shuhem pa vajzën time”, ka thënë gruaja.