POP 5

Lajmet më të lexuara të 5 minutave të fundit

Ekonomi

Si i shpëtuan gjobës 5 mln euro oligarkët e miellit? Konkurrenca ‘vulosi’ shkeljet, por u fali gjobën

Edhe pse hetimi zbuloi shkeljet e 5 ndërmarrjeve të miellit në Shqipëri, Autoriteti i Konkurrencës vendosi të mos vendosë asnjë gjobë. Kështu, 5 oligarkë që monopolizuan tregun duke rritur çmimin e miellit ja hedhin paq përballë gjobës 5 milionë euro që propozoi Sekretariati i Konkurrencës. Shefi  kabinetit të këtij institucioni na zbulon detaje të këtij hetimi 1-vjeçar dhe detyrimet që nuk përmbushën bizneset. 

TIRANË-5 anëtarë të Komisionit të Autoritetit të Konkurrencës unanimisht kanë vulosur me votë pro shkeljet që 5 kompani të importit dhe përpunimit të grupit kanë bërë duke monopolizuar tregun e duke përcaktuar në bllok çmimin, por t’i ndëshkuar me gjobë rreth 5 milionë euro në total, 3 anëtarë janë tërhequr. Kështu, ndërmarrjet Agro Blend, Miell Tirana, Bloja, Atlas sh.a dhe Atlas Mills, edhe pse u hetuan nga Konkurrenca për më shumë se 1 vit, nga 2020-a, i shpëtuan gjobës, ndërkohë që nga gjithë kjo situatë qytetarët sot po vuajnë rritjen e çmimit të bukës.

“Gjatë monitorimit janë konstatuar shkelje që janë përmbledhur ne raportin e monitorimit që përgatiti Sekretariati që është miratuar nga të gjithë anëtarët. Raporti i është dërguar palëve për tu dëgjuar në seancë dhe në përfundim dilet me një vendim për sjelljen e ndërmarrjeve. Edhe pse raporti është miratuar nga të gjithë anëtarët e komisionit me të gjitha shkeljet e konstatuara nga Sekretariati në vendimin përfundimtar nuk është arritur shumica për të marrë një sanksion siç është propozuar”, u shpreh Indrit Reka drejtori i Kabinetit të Autoritetit të Konkurrencës.

Gjoba e propozuar nga Sekretariati sipas drejtorit të Kabinetit të Autoritetit të Konkurrencës Indrit Reka, do të ndahej mes kompanive jo në mënyrë të barabartë.

“Vlera varionte nga 3.2 deri ne 10% të xhiros totale të vitit të kaluar, vlera ishte e konsiderueshme, rreth 500 milion...

 “Gjoba do të ndahej në bazë të veprimtarisë dhe shkeljes së bërë”,  shprehet drejtori i kabinetit të Autoritetit të Konkurrencës. 

Por çfarë detyrash i kishte vendosur Autoriteti i Konkurrencës oligarkëve të miellit, të cilët përgjatë fazës 1-vjeçare të monitorimit, nuk zbatuan asnjërën prej tyre.

Katër detyrat e lëna nga Konkurrenca pas një monitorimi 1 vjeçar ishin:

1. Të mos caktojnë, në mënyrë të drejtpërdrejtë ose të tërthortë, çmimet e blerjes ose të shitjes.

2. Të mos kufizojnë ose kontrollojnë prodhimin, tregjet, zhvillimin teknik ose investimet;

3. Të mos ndajnë tregjet ose burimet e furnizimit;

4. Gjatë periudhës së monitorimit të raportojnë çdo 3 (tre) muaj pranë Autoritetit të Konkurrencës.

Por a ka mundësi që ky vendim të apelohet?

“Çështja është përfunduar sepse është marrë vendim për të mos vijuar më tej, ndryshe nga vota e kryetares dhe anëtares për sanksionimin me gjobe në bazë të shkeljeve. Nëse është marrë vendim për mos sanksionim nuk mund të vijohet me procesin pasi është i mbyllur hetimi, është bërë dhe hetimi i thelluar është bërë dhe monitorimi dhe nuk ka procedurë të mëtejshme”, pohon drejtori Reka. 

Raporti i monitorimit u hartua nga Sekretariati me të gjitha shkeljet që vijonin të ishin në treg, dhe ju dërgua më pas komisionit të Konkurrencës dhe u miratua nga të gjithë anëtarët, dhe më pas i njëjti raport iu është dërguar kompanive për të marrë reagime nga ata ose me shkrim ose me seancë dëgjimore.

Pas përfundimit të kësaj procedure është zhvilluar mbledhja e 29 shtatorit, ku 3 anëtarët kishin ndryshuar qëndrim dhe votuan kundër vendosjes së gjobës.

Bazuar mbi raportin e Sekretariatit që evidentonte rezultatet e hetimit ndaj ndërmarrjeve, 3 anëtarë të Komisionit të Autoritetit të Konkurrencës, Adriana Berberi, Denar Biba dhe nënkryetarja Leida Matja votuan kundër në mbledhjen e 29 shtatorit, përballë vetëm 2 votave pro të kryetares Juliana Latifi dhe Eduard Ypit.

 

Intervista e plotë

K.T./KT/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    26 Dhjetor, 08:05

    Si ka qenë për ju viti 2024?

Lajme të tjera



×

Lajmi i fundit

Veliaj: Shpërblime për fundvit për 4360 mijë punonjës të shërbimeve mbështetëse

Veliaj: Shpërblime për fundvit për 4360 mijë punonjës të shërbimeve mbështetëse

26 Dhjetor, 17:52