Sylvinho i lë stafetën trajnerit Rolando Maran, italiani firmos deri në vitin 2028 dhe prezantohet në Kombëtare: Fola me De Biasin, mund të shkojmë në Botëror

Rolando Maran dhe ndihmësit që do të marrë në kombëtaren shqiptare të futbollit do të përfitojnë 400 mijë euro në vit (si staf), që e përkthyer në muaj do të thotë diçka më shumë se 33.330 euro, kjo sipas mediave. Veç Maran, i konfirmuar si një nga ndihmësit e tij është edhe Christian Maraner.

Federata Shqiptare e Futbollit është rikthyer te pagat e para 'epokës së Sylvinhos', pasi braziliani dhe stafi i tij kishin një pagë të majme prej afro 1 milion eurosh në vit si total.

Kështu, Maran dhe stafi i tij do të ndajnë 400 mijë euro në vit, me kontratat që janë individuale dhe të përcaktuara qartë. Nëse bëjmë një llogari të thjeshtë, FSHF-së stafi i ri do t'i kushtojë diçka më shumë se 1.100 euro në ditë.

27 marsi i vitit 2023 është i paharruar për Jasir Asanin, me anësorin e sulmit që bëri debutimin me fanellën e Kombëtares edhe pse në moshën 28-vjeçare. Në stol ishte Sylvinho, trajneri që besoi te Asani dhe e afroi për herë të parë në ekip.

Në lamtumirën e trajnerit nga Shqipëria, Asani ka reaguar i pari ndër futbollistët duke e falenderuar brazilianin. Shkupjani thotë se do t'i jetë përjetë mirënjohës trajnerit.

"Faleminderit mister për gjithçka. Kemi bërë një rrugëtim shumë të bukur dhe të gjatë bashkë, me plot momente që nuk do t’i harroj kurrë. Jam shumë mirënjohës për besimin dhe mundësinë që më dhe për të përfaqësuar Kombëtaren. Do të të jem falënderues gjithë jetën. Suksese në vazhdim, mister", shkruan Jasir Asani në kanalet e komunikimit.

Sot Jasiri feston 31 vjetorin dhe ka marrë një 'dhuratë' jo shumë të këndshme me lajmin e largimit të Sylvinhos nga stoli i Kombëtares. Asani pritet që në verë të bashkohet me Getafen në La Liga.

Rolando Maran do të jetë trajneri i ri i kombëtares shqiptare të futbollit. 62-vjeçari italian prej korrikut të vitit 2025 është i papunë, teksa drejtoi Brescian në 15 takime në Serie B, ekip që në fund u rrëzua në Serie C. Më herët Maran ka qenë edhe trajneri i Cittadellas, Pisas, Genoas, Cagliarit, Chievos, Catanias, Barit apo Vareses në Itali. Kjo është hera e parë që Maran do të jetë në stolin e një ekipi kombëtar.

Trajneri ka drejtuar katër klube në Serie A të Italisë, Catanian, Chievon, Cagliarin dhe Genoan, teksa përvojën tjetër e ka në Serie B, përjashtuar nisja e karrierës me Cittadellan në Serie C1.

Në 702 ndeshjet që ka drejtuar në stol, Maran ka siguruar më shumë humbje sesa fitore; përkatësisht 223 fitore, 214 barazime dhe 265 humbje.

Karriera

Maran e ka nisur karrierën në vitin 2000 si trajneri i Cittadella U-19, për të marrë pas dy vitesh ekipin e parë të këtij klubi të cilin e drejtoi për 105 ndeshje. Puna e mirë bëri që ai më pas të kalonte te Brescia për sezonin 2005-06, ekip që e drejtoi për herë të parë për 35 ndeshje. Maran më pas kaloi te Bari për 25 ndeshje, Tristina (2007-2009) për 89 ndeshje, Vicenza (2009-2011) për 85 ndeshje apo Varese në sezonin pasardhës për 39 ndeshje.

Në sezonin 2012 - 13 ai drejtoi Catanian për 50 ndeshje, për t'u rikthyer sërish te ky ekip për tre muaj në vitin 2014.

Viti 2014 solli kalimin e tij te Chievo Verona, ekip që e drejtoi për katër vite dhe 148 ndeshje. Më pas karriera e tij vijoi te Cagliari (2018-20) për 69 ndeshje, Genoa në vitin 2020 për 15 ndeshje, për të vijuar te Pisa me 7 ndeshje. Në vitin 2023 ai u ul në stolin e Brescias për 45 ndeshje, për t'u rikthyer po te Brescia në Serie B për 15 ndeshje nga 28 janari i vitit 2025 deri në fundin e sezonit të shkuar, aty ku Brescia u rrëzua në Serie C.

Rolando Maran nuk do të vijë vetëm te Shqipëria. Një nga ndihmëstrajnerët e Kombëtares do të jetë 56-vjeçari Christian Maraner. I lindur në Rovereto, Maraner është besniku i Maran që nga viti 2006 pasi ka qenë ndihmësi i tij edhe te Bari, Varese, Catania, Chievo, Cagliari, Genoa, Pisa dhe Brescia.

Rolando Maran është trajneri i pestë italian që do të drejtojë kombëtaren shqiptare të futbollit. Më parë në stolin kuqezi kanë qenë Giuseppe Dossena, Gianni De Biasi, Christian Panucci dhe Edy Reja.

Giuseppe Dossena - Trajneri më jetëshkurtër në historinë e kombëtares. Firmosi kontratën në qershor të 2002. Pasi qëndroi në pankinë vetëm për dy ndeshje, u largua në mënyrë të njëanshme në muajin nëntor.

Gianni De Biasi - Trajneri me jetëgjatë, nga 2011 deri në 2017. I pari që çoi Shqipërinë në finalet e Europianit 2016. Drejtoi skuadrën për 52 ndeshje.

Christian Panucci - Nuk qëndroi as dy vjet në pankinën e kombëtares shqiptare. Nga korriku 2017 deri në mars 2019, nën drejtimin e tij, ekipi shqiptar luajti 15 ndeshje.

Edy Reja - Mori drejtimin e kombëtares në prill të vitit 2019 dhe e udhëhoqi skuadrën në 38 ndeshje. U largua pas 3 vitesh e gjysëm, në nëntor 2022.

Presidenti i Federatës Shqiptare të Futbollit, Armand Duka foli në prezantimin e trajnerit të ri të kombëtares së futbollit, Rolando Maran. Duka e nisi me një falenderim për Sylvinhon që ashtu i Maran e kishte në krah, ndërsa tregoi edhe objektivin për kualifikimin në Euro 2028.

"Sot është një ditë e rëndësishme për ekipin kombëtar. Dua të falenderoj Sylvion dhe stafin e tij, kemi qeshur dhe kemi qarë së bashku. Në futboll ka disa cikle. Në një mirëkuptim me Sylvion dhe stafin e tij kemi rënë dakord për të mbyllur këtë kapitull dhe për të hapur një cikël të ri, jo me një trajner të ri në moshë, por me përvojë si Rolando Maran.

Objektivat tona mbeten të ditura, ne kemi arritur një standart. Maran është një emër i njohur në botën e futbollit, ka një CV të pasur në Serinë A dhe B në Itali. Jam i bindur se do bëjmë mirë në Nation League dhe në kualifikuese.

Kontrata? Kjo është një zgjedhje e menduar dhe e konsultuar. Kemi biseduar me disa alternativa, nuk është etike t'i them. Edhe Maran e di. Kontrata u firmos vetëm 30 minuta më parë se prezantimi. Maran firmosi pa e lexuar, shpresoj mos ketë probleme (qesh). Kontrata është deri në vitin 2028, duam vendin e parë në Ligën e Kombeve dhe për t'u kualifikuar për në Euro 2028.

Aspekti ekonomik? Edhe nëse do të kishim më shumë lekë do kishim bërë të njëjtën zgjedhje", tha Duka.

Rolando Maran ka folur fjalët e para si trajneri i kombëtares shqiptare të futbollit. Në prezantimin para medieve, 62-vjeçari u shoqërua nga presidenti i FSHF-së, Armand Duka. Maran u pa i emocionuar dhe tha se ekipi përfaqëson një popull krenar, të cilën ai do ta përçojë në fushë. Maran shtoi se ka folur me De Biasin, ish-trajnerin e Shqipërisë.

"Dua të falenderoj presidentin Duka për besimin e dhënë dhe fjalët e thëna. Kam një falenderim për Sylvinhon, e kam ndjekur ekipin dhe ka bërë një punë shumë të mirë. Shqipëria është ekipi i një populli shumë krenar. Dua të transmetoj në fushë këtë krenari për fanellën. Për mua është një impenjim moral, jam pak i emocionuar sepse ndjej një mision të fortë. Këtë që përfaqësoni ju dua ta transmetoj në fushë.

Kam folur me De Biasin, është një mik i imi dhe një trajner që e vlerësoj. Më ka dhënë disa vlerësime që mundohem t'i përfaqësoj.

Botërori? Kjo është ëndrra juaj, si edhe e imja. Nëse jam këtu kam bindjen se me përkushtimin dhe profesionalizmin dhe pak fat, kjo gjë mund të bëhet.

Do jetoni në Shqipëri si Sylvinho, apo nuk e keni vendosur ende? Me siguri do të transferohem këtu. Është gjëja e parë që fola me presidentin. Mendoj se nëse dua të trajnoj mirë këtë ekip, nëse dua të jem pjesë integrale e skuadrës, kam nevojë dhe dëshirë për të jetuar këtu. Dua të jem afër realitetit tim, që është realiteti juaj", tha Maran.

Maran do të fillojë menjëherë punën për dy miqësoret që Shqipëria do të luajë në qershor në Tiranë, më 3 qershor kundër Izraelit dhe në datën 6 kundër Luksemburgut.

Ish-trajneri i kombëtares shqiptare të futbollit, Sylvinho, foli në prezantimin e teknikut të ri të Shqipërisë, Rolando Maran. Ai u pa i prekur.

"Edhe për mua janë dy minuta me shumë emocion. Kemi vendosur që të mbyllim një cikël pas tre vitesh e gjysmë që kemi përfaqësuar këtë komb që na ka pritur shumë mirë. Unë e njoh shumë mirë Tiranën dhe vendin, dua t'ju falenderoj të gjithëve. Janë mbi 100 njerëz që punojnë dhe kam pasur mundësi t'i njoh, dua të falenderoj stafin dhe futbollistët që për tre vite e gjysmë kemi bërë mirë. Tifozët janë shumë dashamirës me Kombëtaren.

Në 9 janar 2023 kam thënë se shpirti dhe djersa nuk duhet të mungojnë, këtë kemi bërë. Edhe sot kam emocione. Dua t'i uroj shumë suksese trajnerit Rolando Maran", tha Sylvinho para largimit.

Rolando Maran do të jetë trajneri i ri i kombëtares shqiptare të futbollit. 62-vjeçari italian prej korrikut të vitit 2025 është i papunë, teksa drejtoi Brescian në 15 takime. Më herët Maran ka qenë edhe trajneri i Pisas, Genoas, Cagliarit, Chievos, Catanias, Barit apo Vareses në Itali. Kjo është hera e parë që Maran do të jetë në stolin e një ekipi kombëtar.

Presidenti i FSHF-së, Armand Duka e kishte lënë topin 'në fushën' e Sylvinhos për rinovimin e kontratës. Trajneri brazilian u duk i gatshëm për një rinovim, por me terma më të përmirësuara financiare.

Një gjë e tillë ishte e papërballueshme për Federatën e futbollit duke bërë që fundi të ishte i pashmangshëm. Rreth 1 milionë euro në vit përfitonte trajneri Sylvinho me dy ndihmësit Doriva dhe Zabaleta.