Durrës/ Skemë mashtrimi me TVSH, nën akuzë 4 biznesmenë ndërtimi në Fushë-Krujë! Një në pranga, 3 në kërkim e 3 nën hetim! 127 milionë lekë dëm shtetit (EMRAT)

Tiranë- Dy biznesmenë ndërtimi të rinj në moshë, 19 dhe 22 vjeç, dyshohet se janë në krye të një skemë mashtrimi me TVSH-në. Në bashkëpunim edhe me 2 biznesmenë të tjerë ndërtimi në Fushë-Krujë, ata kanë lëshuar fatura fiktive shitjeje tek kompani gjithashtu fiktive, me qëllimin  e vetëm për të përfituar TVSH-në. Përllogaritur nga tatimet, dëmi në buxhet mbi këtë skemë, është mbi 127 milionë lekë të rinj.

1.3 milionë euro dëm i kanë shkaktuar buxhetit të shtetit këta 4 biznesmenë ndërtimi, përmes një skeme mashtrimi me TVSH.  Ata kanë biznese në Fushë-Krujë, e më i riu mes tyre është vetëm 19 vjeç. Indrit Allamani 48 vjeç është i vetmi i arrestuar, ndërsa 3 bashkëpunëtorët e tij, Indrit Visha 35 vjeç, Redion Sefa 22 vjeç e Lovjano Topi 19 vjeçar, janë në kërkim me vendim të gjykatës së Durrësit e cila caktoi në mungesë masën “arrest me burg”.

Sipas hetimeve, me firmat e tyre të ndërtimit “R S” dhe “L” në pronësi të dy më të rinjve, Redion Sefës dhe Lovjano Topit, janë bërë disa shitje fiktive, në total në vlerën 448.6 mln lekë, të faturuara te kompania e ndërtimit me administrator Indrit Vishën, “3D Construction”.

Por në të vërtetë, nga verifikimet që Prokuroria ka bërë bashkë me drejtorinë e tatimeve, është zbuluar se kompania “3D Construction” në emrin e së cilës janë lëshuar fatura fiktive me qëllim për të përfituar TVSH-në, kishte në pronësi vetëm 5 automjete luksoze të markave Benz AMG Porsche Cayenne, Land Rover apo BMW X5. Pra në vend të kampionëve e makinave të tonazhit të rëndë për ndërtim, kjo kompani kishte në pronësi vetëm mjete luksi.

Nga analizimi i faturave të deklaruara, shitjet totale, punësimet dhe marrëdhëniet me bizneset e tjera, administrata tatimore ka bërë llogaritjen e tatimit mbi vlerën e shtuar si dhe Tatim Fitimin për çdo subjekti, dhe ka rezultuar në total një dëm i shkaktuar ndaj shtetit në vlerën 127 milionë lekë të rinj.

Si pjesë e kësaj skemë, gjykata caktoi arrest shtëpie edhe një 36-vjeçare, Albana Paja, dhe detyrim paraqitje për 2 të tjerë, Aldo Myftari dhe Brikena Çela 34 vjeç.

Policia ka zbatuar masat e Gjykatës dhe urdhrat e Prokurorisë për 4 persona, kur 3 të tjerë u shpallën në kërkim. Policia bëri me dije se janë ekzekutuar masat për Albana Paja, 36 vjeçe, banuese në Krujë, "arrest në shtëpi", Brikena Çela, 34 vjeçe, banuese në Fushë-Krujë, “detyrim paraqitjeje”, Aldo Myftari, 34 vjeç, “detyrim paraqitje" dhe Indrit Allamani, 48 vjeç, “arrest me burg”.

Kurse për shtetasit e mëposhtëm është vendosur masa e sigurisë "arrest me burg", si persona të dyshuar për kryerjen e veprës penale "krijimi i skemave mashtruese, lidhur me tatimin mbi vlerën e shtuar" dhe janë shpallur në kërkim 3 personat: Indrit Visha, 35 vjeç, nga Gjirokastra dhe banues në Nikël të Fushë-Krujës, Redion Sefa, 22 vjeç, banues në Fushë-Krujë dhe Lovjano Topi, 19 vjeç, nga Nikla.

Njoftimi i prokurorisë së Durrësit:

"Prokuroria pranë Gjykatës së Shkallës së Parë të Juridiksionit të Përgjithshëm Durrës kërkoi caktimin e masës ‘Arrest me burg’ për katër shtetas të cilët drejtojnë biznese në Fushë Krujë pasi hetimet zbuluan një skemë mashtrimi me TVSH-në, duke i shkaktuar shtetit një dëm në vlerën 127,551,874 lekë.

Prokuroria në bashkëpunim me oficerët e hetimit tatimor në Drejtorinë e Përgjithshme të Tatimeve zbuluan skemën e mashtrimi me TVSH-në në të cilën përfshiheshin të paktën gjashtë subjekte që operonin në fushën e ndërtimit.

Grupi hetimor, nën drejtimin e Prokurorisë, ka verifikuar shitjet e subjektit “R S”, i cili ka vetëdeklaruar në vlerë total shitjeje prej 286,301,702 lekësh për periudhën Dhjetor 2023 dhe subjektit “L”, që ka vetëdeklaruar një total shitje 162,302,300 lekë gjatë Dhjetorit të vitit 2023. Në total, këto subjekte kanë kryer shitje që përllogaritet në 448,604,002 lekë, vlera për të cilat Prokuroria dyshon të jenë fiktive dhe janë faturuar te subjektet që operojnë në fushën e ndërtimit “3D C” dhe I.V FP.

Administrata tatimore ka kryer verifikimin e faturave të deklaruara, shitjet totale, historikun e punësimit të shoqërive të ndërtimit dhe marrëdhëniet me bizneset e tjera. Nga analizimi i të dhënave të deklaruara si shitjet totale për çdo subjekt, është kryer llogaritja e tatimit mbi vlerën e shtuar si dhe Tatimi Fitimi për çdo subjekti, dhe ka rezultuar në total një dëm i shkaktuar ndaj shtetit në vlerën 127,551,874 lekë.

Pas hetimeve të kryera Gjykata e Shkallës së Parë të Juridiksionit të Përgjithshëm Durrës ka miratuar kërkesën e Prokurorisë së Durrësit për caktimin e masës “arrest me burg” për katër shtetas të cilët drejtonin bizneset me adresë në Fushë-Krujë, ndërsa ka kërkuar “arrest në shtëpi” dhe “detyrim paraqitje” për tre shtetas/se të tjerë.

Gjithashtu grupet hetimore kanë kryer verifikimet e pajisjeve dhe automjeteve që zotëronin shoqëritë e ndërtimit nga ku ka rezultuar se subjekti “3D C” kishte në pronësi vetëm automjete luksoze, Mercedes benz AMG 63, Mercedes benz AMG  GT 43, PorscheCayenne,  Land Rover apo BMW X5. Asnjë prej këtyre automjeteve nuk përdoret për aktivitetin e ndërtimit".

Kliko per te lexuar dokumentin e plote

 

Kliko këtu për të lexuar dokumentin e plotë

 

S.G/Shqiptarja.com

TAG:
• Indrit Visha
• Indrit Allamani
• Lovjano Top
• Redion Sefa
• Durres