Sot Fitër Bajrami, mijëra besimtarë myslimanë falin namazin në sheshin ‘Skënderbej’! Kreu i KMSH: Të rinjtë mos të braktisin vendin! Ndalni dhunën ndaj grave

Presidenti i Republikës së Shqipërisë, Bajram Begaj, përcolli sot urime për festën e Fitër Bajramit nga qyteti i Elbasanit. 

Presidenti Begaj vizitoi xhaminë e “Ballies" në qendër të qytetit, e ndërtuar në vendin ku ndodhej xhamia shekullore, e cila u shemb nga regjimi i kohës në 1967-ën.

Ai u shpreh se në këtë ditë feste besimtarët myslimanë kanë arsye të gëzojnë, pasi përmbushën me kënaqësi agjërimin, me qëllimin e vetëm që të bëhen njerëz më të devotshëm e të denjë për veten dhe shoqërinë. 

Një urim të veçantë Presidenti i Republikës u përcolli qytetarëve të Elbasanit për harmoninë mes njëri-tjetrit në respekt të besimeve të ndryshme. 

'Jam këtu për të uruar të gjithë besimtarët myslimanë: gëzuar festën e Fiter Bajramit! 
Pas muajit të madhërueshëm të Ramazanit, ndaj të cilit besimtarët u përkushtuan, besoj se me lutjet  tyre të pranuara, ata janë më afër Zotit. Besoj se do të jenë qytetarë të denjë jo vetëm për veten e tyre, por edhe për shoqërinë. Jam këtu në këtë xhami të mrekullueshme të qytetit të Elbasanit, të rindërtuar në të njëjtin vend ku në vitin 1608 Hasan Balliu e ndërtoi për herë të parë. Në vitin 1967 u shkatërrua, dhe falë Zotit, u rindërtua përsëri në të njëjtin vend.

Jam në Elbasan, ku është një traditë e shkëlqyer, ku përveç objekteve të shumta të kulteve të ndërtuara, besimtarët jetojnë në harmoni, si në të gjithë Shqipërinë. Është një vlerë e madhe njerëzore, vlerë të cilën duhet ta ruajmë, ta promovojmë dhe ta trashëgojmë. Unë uroj çdo të mirë dhe begati për çdo shqiptar, për çdo besimtar. 
Gëzuar, dhe një herë, Fitër Bajramin!', tha Begaj.

Kryetari i Partisë së lirisë, Ilir meta për Fitër Bajram ka zhvilluar një vizitë në Komunitetin Mysliman Shqiptar. Meta uroi të gjithë besimtarët myslimanë për këtë ditë të rëndësishme, për më shumë paqe e begati.

Ndërkohë, kreu i Partisë së Lirisë u ndal edhe tek çështja e pronave për komunitetet fetare, ku kërkoi që t’u jepet zgjidhje pa vonesa.

“Të kujtojmë porosinë e profetit Muhamed; të nxitojmë për punë të mira dhe të bëjmë të gjitha sakrificat dhe iu shpërblefshin sakrificat atyre që kanë agjëruar dhe njëkohësisht paqe dhe begati në familjen e çdo shqiptari.

Më duhet të theksoj në këtë ditë, se do kemi më shumë mbarësi nëse i japim zgjidhje çështjes së pronave të besimeve të komuniteteve fetare. Që në vitin e parë si president, duke parë raportet ndërkombëtare për çështjet e pronave dhe moskthimin e tyre, të marra nga komunizmi apo të mbërthyera nga korrupsioni, kam kërkuar gjendjen reale nga ministria e Drejtësisë, të atyre pronave. Por kurrë nuk mora asnjë përgjigje. Dikush më tha; është e lehtë të flasësh. Por është me e lehtë të veprosh. Në këtë mënyrë u dha edhe leja e Katedrales edhe pse kundërshtohej nga aktorë të rëndësishme politikë të kohës, njëri prej tyre vijon të jetë në pushtet sepse mendonte të bënte një kullë atje, siç ka bërë ne vende të tjera.

Të zgjidhet njëherë e përgjithmonë çështja e pronave për komunitetet fetare në Shqipëri pa vonesa dhe pa asnjë përjashtim”, tha Meta.

Ambasada e SHBA në Tiranë ka uruar të gjithë besimtarët myslimanë, të cilët festojnë sot Fitër Bajramin.

Në një postim të ndarë në rrjetet sociale, ambasada uron shëndet dhe paqe për të gjithë ata që festojnë këtë ditë të veçantë.

“Ambasada e SHBA në Tiranë uron përzemërsisht të gjithë ata që festojnë sot Fitër Bajramin.  Duke shënuar fundin e Ramazanit, Fitër Bajrami është një festë e rrënjosur në falënderim, mirësi dhe dhurim, sjellë përmes lutjes dhe akteve të bamirësisë. Paqja dhe shëndeti qofshin me të gjithë ata që festojnë në këtë ditë të veçantë”, shkruan ambasada.

Kryeparlamentarja Lindita Nikolla ka uruar të gjithë besimtarët myslimanë me rastin e festës së Fitër Bajramit, që shënjon edhe fundin e muajit të Ramazanit. 

“Pas një muaji sakrificash, solidariteti, vetëreflektimi e gëzimesh, besimtarët myslimanë kremtojnë festën e Fiter Bajramit.  
Bajrami i Madh, si një festival humanizmi, na rikujton se sa pasuri e pamasë është dhimbsuria e Zotit, liria e besimit, dashuria për familjen e për njerëzit, shërbimi për të dobtit.
Diversiteti i besimeve dhe patriotizmi i komuniteteve fetare është një pasuri e çmuar për Shqipërinë.
Gëzuar Fiter Bajramin, vëllezër muslimanë!”, ishte urimi i Nikollës.

Pas 30 ditësh agjërim të muajit të Ramazanit, Besimtaret Mysliman në Lezhë kremtuan festen e Fitër Bajramit. Falja e namazit u bë për herë të parë në sheshin "Gjergj Kastrioti", ku ritualit fetar ju bashkuan dhjetëra besimtar.

Teksa foli për rëndësinë e Fitër Bajramit, Myftiu i Lezhës Sadetin Kotrri tha se kjo është një ditë gëzimi për të gjithë besimtaret.

Pas faljes së namazit të Fitër Bajramit, besimtaret mysliman të Lezhës ju drejtuan shtëpive të tyre për kremtimin e kësaj feste vijon me dreken në familje dhe me vizita tek njëri tjetri.

Lutja e Fitër Bajramit është kryer në pedonalen e qytetit të Beratit. Vasin e mbajti Qeramudin Durdia ish-myftiu i parë i Beratit i ftuar. Ndërsa Hyben u ligjërua nga myftiu i Beratit, Bilbil Tallab.

Lutja filloi në orën 6:30 ku qindra besimtar mes tyre shumë të rinj u falën në pedonalen e qytetit.

'E lus Zotin e gjithësisë në këtë ditë feste në këtë ditë feste në këtë ditë Fiter Bajramit të sjell mirësi, mbarësi në zemrat e myslimanëve mbarë vatrat Shqiptare e kudo në Botë. Allau i gjithësisë e lus na sjell festën e Bajramit  me gëzim hare me mirësi me begati.', u shpreh ndër të tjera myftiu i Beratit.

Në përfundim të muajit të shenjtë të Ramazanit, kryetari i Bashkisë së Tiranës, Erion Veliaj uroi të gjithë besimtarët gëzuar Fitër Bajramin.

Përmes një postimi në rrjete sociale, Veliaj shkruan: “Pas një muaji reflektimi dhe sakrifice, ju uroj gëzuar Bajramin me zemrat plot begati, paqe dhe harmoni në familjet tuaja”. Ndërkaq, për faljen e besimtarëve, parkingu në sheshin “Skënderbej” mëngjesin e sotëm ka qenë pa pagesë.

Qindra besimtarë myslimanë falin namazin për festën e Fitër Bajramit edhe në Sarandë e Vlorë.

Në qytetin e Vlorës Falja është kryer në sheshin e Flamurit shumë pranë xhamisë së qytetit, nën drejtimin e myftiut të Vlorës Armand Asllani

Kjo është një festa më e rëndësishme për besimtarët myslimanë.

Festa e Bajramit është kremtuar nga besimtarët myslimanë orët e para të mëngjesit të sotëm edhe në Fushë-Krujë dhe Durrës. Në Fushë-Krujë falja e Namazit u krye në stadiumin e K.F Ilirias 'Redi Maloku'.

Besimtarët myslimanë në Durrës morën pjesë në faljen e Fitër Bajramit, duke kryer faljen e namazit në orën 06:55 në Xhaminë e madhe të qytetit, por edhe në xhamitë e tjera nën drejtimin e drejtuesve më të rëndësishëm të këtij komuniteti në Durrës. 

Ajo që vihet re është një numër më i lartë i besimtarëve, sesa herët e tjera dhe prej kohësh tashmë drejtuesit e besimit islam në Durrës kanë hedhur idenë për ndërtimin e një tjetër xhamie, pasi objektet aktuale të kultit nuk e përballojnë fluksin e besimtarëve që duan të kryejnë ritet fetare në xhami.

Qindra besimtarë myslimanë kanë kremtuar festen e Fiter Bajramit në faljen e mbajtur në qendër të qytetit në Shkodër. Myftiu i Shkodrës Imam Muhamed Sytari në fjalën e tij në faljen e Fiter Bajramit, përcolli mesazhin e harmonisë dhe solidaritet për të gjithë besimtaret të cilët vijnë në këtë festë të begate pas një muaji sakrifice në muajin e madhërueshëm të Ramazanit.

Gjate fjalës se tij Myftiu Sytari u ndal edhe tek fenomenet negative qe kane përfshire shoqërinë tonë, te cilat vijnë edhe për shkak të devijimit dhe largimit të shoqërisë nga tabani i fesë…..

Të gjithë myslimanët në Shqipëri dhe në mbarë botën festojnë sot Fitër Bajramin. Mijëra besimtarë shqiptarë kryen faljen e namazit që nisi në orën 06:55 në të gjitha qytetet, nëpër xhami e sheshe kryesore.

Në Fier Falja e Namazit për të dytin vit radhazi është bërë në sheshi Qendror të Qytetit. Edhe në Lushnjë besimtarët myslimanë kanë falur Namazin e Fiter Bajramit në sheshin kryesor të qytetit.

Besimtarët myslimanë kremtojnë festën e Fitër Bajramit, pas 30 ditësh agjërimi në muajin e shenjtë të Ramazanit. Në këtë ditë të shënuar besimtarët nuk harrojnë të ndihmojnë edhe familjet në nevojë duke dhuruar pjesë nga ushqimi i tyre ose në të holla.

Kryeministri Edi Rama ka uruar të gjithë besimtarët myslimanë për Fitër Bajramin.

"MIRËMËNGJES, GËZUAR FITËR BAJRAMIN", shkruan Rama. 

Kryetari i KMSH, Bujar Spahia pas faljes së namazit ka uruar të gjithë besimtarët myslimanë për Fitër Bajramin. Spahia bëri thirrje për më shumë tolerancë mes njëri tjetrit, ndërsa tha se lutjet shkojnë për paqe e drejtësi në gjithë botën.

“Gëzuar festën e Fitër Bajramit, kjo festë qoftë një. Paqe mirësi e begati në familjet tona. Lutjet shkojnë për një Shqipëri sa më të mirë dhe të begatë. I lutem Zotit që vendimet tonë t’i sjellë begati dhe anë e kënd botës paqe dhe drejtësi. Sot kemi të drejtën për të gëzuar dhe festuar dhe për ta ndarë këtë mirësi e begati që Zoti na ka dhënë pas këtij përkushtimi, ta ndajmë me familjen e shoqërinë. Gëzuar shqiptarëve e popujt anë e kënd botës.

Edhe këtë vit, besimtarët myslimanë në Shqipëri nuk u falën në Xhaminë e Namazgjasë, e cila pret ende të inaugurohet. Spahia tha se shpreson që shumë shpjet kjo xhami të hapë dyert.

“Bajramet janë festa që duhen falur nëpër sheshe. Shpresojmë që edhe ajo xhami do mbarojë dhe do falemi edhe aty. Sheshet janë të dendura, nuk ka xhami në asnjë vend të botës që t’i zërë njerëzit”, tha Spahia.