Kurban Bajrami/ Mijëra besimtarë falin namazin në bulevardin ‘Dëshmorët e Kombit’! Kreu i KMSH: Dita e solidaritetit dhe ndihmës ndaj njëri-tjetrit! PAMJET ME DRON

Në festën e Kurban Bajramit një urim të veçantë për myslimanët e pati edhe Kryepeshkopi Joan. Ai e vuri theksin te harmonia dhe bashkëjetesa fetare dhe tha se janë gjithnjë pranë njëri-tjetrit si në gëzime, edhe në vështirësi.

“Kemi ardhur për të përshëndetur vëllezërit tanë në festën e tyre dhe gjithmonë jemi bashkë, si në gëzime, edhe në vështirësi dhe besoj që ky është një shembull shumë i mirë për të treguar që njerëz me besime të ndryshme mund të jetojnë së bashku në harmoni dhe ta duan njëri-tjetrin. U uroj të gjithëve gëzuar e për shumë vjet ditën e festës së tyre!”, tha Kryepeshkopi Joan.

Besimtarët myslimanë në Shkodër kanë festuar festën e Kurban Bajramit. Në hytben e mbajtur, myftiu i Shkodrës, imam Muhamed Sytari, foli për çështjen e pronave. Ai tha se po shohim dita-ditës një tendencë të çuditshme për të hequr kufijtë e pronave legjitime.

Duke u ndalur tek kulla që po ndërtohet në qendër të qytetit të Shkodrës, imam Sytari u shpreh se është një vakëf i grabitur dhe poshtërimi i Zotit do të jetë mbi ato që lejojnë këtë barbarizëm në zemër të Shkodrës.

Sipas myftiut të Shkodrës, nuk mund të ecë para një vend i cili nuk respekton pronën. Myftiu Sytari bëri thirrje për reflektim, kthim tek vlerat dhe respektim të pronës dhe besimit.

Qindra besimtarë myslimanë në Elbasan kanë falur mëngjesin e sotëm Kurban Bajramin në sheshin “Gensher.” Edhe këtë vit u vu re një pjesëmarrje e lartë e besimtarëve nga grupmosha të ndryshme, përfshirë dhe fëmijë. Besimtarët përcollën mesazhe urimi mes njëri-tjetrit.

Festa e Kurban Bajramit u kremtua edhe në Lezhë. Me mesazhe paqeje e harmonie për njëri-tjetrin, si dhe lutje për më shumë begati, dhjetëra besimtarë myslimanë falën namazin në xhaminë e qytetit.

Teksa foli për simbolikën e kësaj feste, myftiu i Lezhës, Sadetin Kotrri, përcolli mesazhe paqeje, solidariteti dhe dashurie ndaj njëri-tjetrit. Ai theksoi rëndësinë shpirtërore të kësaj dite dhe rolin që ajo ka në forcimin e lidhjeve njerëzore dhe të besimit.

Pas faljes së namazit, besimtarët uruan njëri-tjetrin për festën, duke vijuar me vizitat tradicionale në familje dhe te të afërmit gjatë gjithë ditës. Kurban Bajrami është një nga dy festat më të mëdha të Islamit, që simbolizon sakrificën, mirësinë dhe përkushtimin ndaj Zotit.

Në Durrës falja u krye në sheshin para Xhamisë së Madhe në qendër të qytetit. Në fjalën e tij teologu dhe imami pranë kësaj xhamie bëri thirrje për dashuri, mirëkuptim dhe paqe e harmoni.

Qindra besimtarë në Korçë e Pogradec kanë falur mëngjesin e sotëm namazin e Kurban Bajramit. Kjo është festa e dytë me rëndësishme në kalendarin mysliman ndërsa thirrjet janë për më shumë devotshmëri ndaj Zotit e më shumë afrim e solidaritet për njerëzit në nevojë.

Besimtarët myslimanë në qytetin e Beratit kanë festuar sot Kurban Bajramin, duke mbushur pedonalen “Republika” për faljen e madhe të kësaj feste të shenjtë. Falja nisi në orën 06:20 dhe u drejtua nga Bilbil Talla.

Qindra besimtarë u bashkuan në lutje për më shumë paqe, mirësi, shëndet dhe harmoni në familjet e tyre. Gjatë mesazhit të tij, Myftiu i Beratit theksoi se Kurban Bajrami është dita e sakrificës, sinqeritetit dhe solidaritetit njerëzor, duke apeluar për më shumë kujdes ndaj jetimëve dhe njerëzve në nevojë, si edhe për respekt e dashuri mes njëri-tjetrit.

Sipas traditës islame, pas riteve të faljes vijon prerja e kurbanit, dreka tradicionale familjare dhe vizitat tek të afërmit, miqtë dhe shokët. Besimtarët myslimanë kanë si obligim që mishin e kurbanit ta ndajnë në tre pjesë: për familjen, për të afërmit dhe për familjet në nevojë.

Kjo ditë simbolizon sakrificën e profetit Ibrahim, besimin ndaj Zotit dhe dashurinë për njeriun. Pas faljes së madhe, besimtarët përcollën edhe urimet tradicionale për paqe, begati dhe mirësi në çdo familje.

Qindra besimtarë myslimanë në Kukës u mblodhën në xhamitë e qytetit për të falur namazin e Kurban Bajramit, një prej festave më të rëndësishme të besimit islam. Atmosfera e festës dhe lutjeve bashkoi qytetarë të shumtë në xhaminë kryesore të qytetit, ku u përcollën mesazhe paqeje, solidariteti dhe mirëkuptimi.

Kryeimami i Kukësit, Emirjon Vataj, uroi besimtarët me rastin e Kurban Bajramit, duke vlerësuar domethënien e kësaj feste si simbol i sakrificës, devotshmërisë dhe ndihmës ndaj njerëzve në nevojë.

“Sot është një ditë e gëzuar për të gjithë botës islame. Kurban Bajrami është një festë që na mëson sakrificën. Është festa kur njerëzit duhet të solidarizohen dhe të afrohen me njëri-tjetrin e të gjenden pranë. Kam mesazhin e paqes dhe të lumturisë. Ju uroj të gjithë besimtarëve gëzuar dhe për shumë vite Kurban Bajmranin”, tha Emirjon Vataj.

Në qendër të mesazheve të kësaj dite ishte fryma e solidaritetit dhe mbështetja për familjet në vështirësi ekonomike, si një prej vlerave themelore që përcjell Kurban Bajrami. Pas faljes së namazit, shumë familje kuksiane iu drejtuan përgatitjeve për therjen e kurbanit, rit që simbolizon besimin, përkushtimin dhe gatishmërinë për të ndarë me të tjerët.

Menjëherë pas faljes së namazit të Kurban Bajramit, qindra qytetarë nga Kosova po udhëtojnë drejt vendit tone për të festuar festën por edhe për të kaluar disa ditë pushimi në bregdet dhe zonat turistike të vendit. Fluksi i lartë i lëvizjeve është reflektuar menjëherë në pikën kufitare të Morinës, ku gjatë orëve   të fundit është regjistruar shtim i ndjeshëm i hyrjeve ne doganen e Morinit.

Qytetarët e Kosovës kanë përcjellë urime për besimtarët myslimanë në të gjitha trojet shqiptare me rastin e Kurban Bajramit. Përveç vizitave tek të afërmit, ata shprehen se zgjedhin të shfrytëzojnë këto ditë edhe për pushime në bregdetin shqiptar apo në zonat malore turistike. Sinkron. Atmosfera festive, afërsia mes dy vendeve dhe lehtësimi i procedurave kufitare kanë ndikuar që çdo vit numri i vizitorëve nga Kosova drejt Shqipërisë gjatë festave të jetë gjithnjë në rritje.

Besimtarët myslimanë shqiptarë kremtuan sot Kurban Bajramin me një falje në bulevardin ‘Dëshmorët e Kombit’.

Këto janë edhe pamjet me dron nga bulevardi, ku mijëra besimtarë falën namazin nën drejtimin e kreut të KMSH, Bujar Spahia.

Për besimtarët kjo ditë shënon shpërndarjen e lëmoshës, solidarizimin me të varfrit në mënyrë që të gjithë të kenë mundësi ta gëzojnë së bashku këtë festë.

Qindra besimtarë myslimanë janë mbledhur mëngjesin e sotëm në xhaminë e Sarandës për të falur namazin e Kurban Bajramit, një nga festat më të rëndësishme të besimit islam. Atmosfera u karakterizua nga qetësia, besimi dhe urimet mes familjarëve e qytetarëve që morën pjesë në ceremoninë fetare.

Për shkak se Myftiu i Sarandës, Bledar Mullai, ndodhet në Mekë për kryerjen e ritualit të Haxhit, falja e namazit u drejtua nga Banart Pajollari. Në fjalën e tij para besimtarëve, ai përcolli mesazhe paqeje, harmonie, mirëkuptimi dhe vëllazërie mes njerëzve, duke theksuar rëndësinë e solidaritetit dhe respektit reciprok në shoqëri.

Qindra besimtarë mysliman në Vlorë janë mbledhur në pallatin e sportit "Flamurtari" për të falur namazin e Kurban Bajramit. Përveç besimtarëve të Vlorës, ka pasur dhe prezencë të besimtarëve me kombësi të huaj. Falja e Namazit të Kurban Bajramit po drejtohet nga Myftiu i Vlorës, Ardit Hoxhllaku.

Qindra besimtarë myslimanë në Fier kanë falur në orët e para të mëngjesit të kësaj të mërkure, namazin e Kurban Bajramit në Sheshin Qendror të qytetit. Ritit të faljes i ka paraprirë me fjalën e tij kreu i  Myftinisë Mikele Hazizolli, i cili në fjalën e tij ka theksuar se Kurban Bajrami është një ndër festat më të rëndësishme të besimit islam që simbolizon sakrificën, solidaritetin dhe ndërgjegjësimin shpirtëror.

“Kurbani është përkushtim, sakrificë, sinqeritet dhe nënshtrim ndaj vullnetit hyjnor. Kurban Bajrami është dita kur ne shërojmë plagët që i kemi shkaktuar njëri-tjetrin me buzëqeshje, gëzim e paqe. Kurban Bajrami është simbol i heroizmit, sakrificës, dhe sinqeritetit e devotshmërisë dhe përkushtimit ndaj zotit. Kurbani është një mjet që na afron më shumë me Zotin”, tha Myftiu Mikele Hazizolli.

Ashtu si çdo vit besimtarët kanë kryer ritin e faljes dhe kanë shkëmbyer mesazhet e dashurisë vëllazërore e të mirëqenies në çdo familje. Sipas zakonit, në këtë ditë të rëndësishme për myslimanët, besimtarët kanë prerë kurban e një pjesë ua kanë shpërndarë njerëzve në nevojë, ndërsa në orët në vazhdim  pritet të shtrojnë drekën e kësaj feste me të gjithë miqtë dhe familjarët. Nga viti në vit kjo festë në Fier po bëhet edhe më masive pasi çdo ditë e më shumë besimtarë të të gjitha grupmoshave po i bashkohen besimit islam.