Zgjedhjet në Serbi, Brnabiç shpall fitoren: Marrim më shumë se 125 deputetë! Projeksionet nxjerrin partinë e Vuçiç fituese, shqiptari Shaip Kamberi ruan mandatin

Forca politike e Aleksandër Vuçiç me shumë gjasa do të vazhdojë të jetë forcë qeverisëse e shtetit serb edhe për një mandat tjetër, kjo e parashikuar nga sondazhet në Serbi.

Kompania e sondazheve ‘IPSOS’, në exit-pollin e saj, deri më tani nxjerrin fitues Vuçiçin, pasi sipas projeksioneve forca e tij politike pritet të marrë 126 mandate në parlamentin serb.

Edhe projeksionet e “Serbia nuk duhet të ndalojë”, reflektojnë qëndrimin në pushtet të partisë së Vuçiçit.

Po ashtu, deputeti shqiptar nga Lugina e Preshevës, Shaip Kamberi, ka probabilitet të lartë të ruajë mandatin e tij dhe të vazhdojë advokimin në Parlamentin e Serbisë, për respektimin e të drejtave të shqiptarëve në Luginë.

Kryeministrja dhe anëtarja e Kryesisë së Partisë Progresive Serbe, Ana Brnabiq, ka folur pas mbylljes së votimit për zgjedhjet parlamentare dhe ato loakle në Serbi. Në një deklaratë për mediat, Brnabiç shpalli fitoren duke thënë se partia e tyre do të marrë më shumë se 125 vende parlamentare

“Vetëm lista jonë do të ketë më shumë se 125 mandate parlamentare”, theksoi kryeministri.

Branbiq hodhi poshtë akuzat e opozitës për parregullsi dhe blerje votash, dhe ndikimin e SNS-së te votuesit, dhe në të njëjtën kohë akuzoi partitë opozitare për shkelje të rregullave zgjedhore.

Pastaj kanë gënjyer se nuk kanë kërkuar letërnjoftime në Vraçar. Të cilat janë të gjitha gënjeshtra brutale dhe gënjeshtra famëkeqe, lehtësisht të verifikueshme. Para së gjithash, kontrollorët e SNS-së nuk mund të ndikojnë në këto gjëra, dhe opozita kishte 80 për qind të kontrollorëve - tha ajo.

Ajo thotë se e vetmja parregullsi ka qenë incidenti në Oxhaci.

- Personi është ndaluar, sipas rregullores. Një brutalitet i tillë i thyerjes së heshtjes zgjedhore nuk është parë kurrë - thotë kryeministri.

Gazetarja Ardita Saqipi ka folur për Report Tv lidhur me procesin zgjedhor në Serbi, ku shqiptarët garuan me dy lista të ndara. Gazetarja Saqipi thotë se interesimi i qytetarëve për të votuar ka qenë më i lartë se një vit më parë.

Sa i takon partive shqiptare, ajo thotë se është shumë e vështirë që të sigurojë dy vende në parlamentin serb, ndërsa gjasat janë që të fitojnë vetëm një.

“Interesimi i qytetarëve ishte i jashtë, në gjithë territorin është shënuar një rritje prej 47% e daljes së qytetarëve, krahas 41% që ishte një vit më parë. Edhe në komunn  e Preshevës ishte i konsiderueshëm, mbi 15% edhe duke e ditur që ka kaluar gati gjysmë ore që ka nisur numërimi. Në Bujanovc, mbi 30%, numri më i rritur krahas komunës së Preshevës. Në Luginën e Preshevës nuk janë evidentuar parregullsi.

Gjasat janë të konsiderueshme, të sigurohet një vend. Edhe pak kohë ka mbetur për verifikimin e rezultateve, nëse do sigurohet një ulëse, mbase edhe dy. Gjasat janë të ulëta të sigurohen dy vende.

Serbi

Procesi i votimit në zgjedhjet parlamentare dhe lokale në Serbi është mbyllur në orën 20:00. Raportohet se pjesëmarrja në votime ka qenë 55.9% dhe se ka nisur procesi i numërimit të votave.

Fillimisht do të numërohen votat për Parlamentin, më pas ato lokale.

Pika kufitare mes Kosovës dhe Serbisë në Merdare

Zgjedhjet në Serbi kanë sjellë nevojën për shtimin e forcave të policisë së Kosovës në kufirin mes dy vendeve.

Mediat kosovare bëjnë me dije se shkak i këtij vendimi janë qarkullimet e shumta të serbëve të Kosovës, të cilët shkojnë drejt Serbisë për të votuar në zgjedhjet parlamentare dhe lokale, që po mbahen sot.

“Të gjitha angazhimet policore në terren, përfshirë ato kufitare do të zbatohen sipas procedurave të parapara ligjore, me qëllim të ofrimit të sigurisë, ruajtjes së rendit e qetësisë publike si dhe mundësimit të qarkullimit dhe lëvizjes së lirë të qytetarëve”,- bën me dije Policia e Kosovës.

“Për shkak të fluksit të qytetarëve dhe procedurave kufitare, ka ndikuar në krijimin e disa pritjeve të kalimit kufitar në disa pikë kalime kufitare që lidhin Republikën e Kosovës me Serbinë, ku për të shmangur këto pritje Policia e Kosovës ka angazhuar personel shtesë, në mënyrë që të kemi një menaxhim sa më efikas të kufijve shtetëror ashtu siç parashihet edhe me MIK, (menaxhimi i integruar i kufirit)”,- thekson ajo.

Foto nga momentet e dyshimta ndaj fotografimit të votës në Serbi

Nga hapja e qendrave të votimeve deri në orën 09:00, vëzhguesit e Kreni-Promenit kanë vërejtur parregullsi serioze në votimet e qytetarëve në Beograd, Krajevë, Loznicë dhe Novi Sad.

“Në Beogradin e Ri ka pasur presion mbi votuesit dhe “trenin bullgar”, të cilët paraqesin një formë më të rëndë të parregullsive zgjedhore. Një grup burrash u pa duke zbritur nga një xhip dhe duke iu afruar votuesve me letra. Pas raportimit të ngjarjes, menjëherë kemi njoftuar organet kompetente”, është bërë e ditur nga Kreni-promeni.

Lëvizja ka publikuar edhe një video nga Beogradi i Ri nga rruga Mileva Marić Einštajn në rrjetet sociale. Krahas kësaj, Kreni-promeni thekson se janë evidentuar edhe një sërë parregullsish të tjera zgjedhore dhe se në shumë raste anëtarët e komisioneve zgjedhore nuk ndjekin procedura të rëndësishme për ushrtuar votën.

“Parregullsitë e vërejtura nga vëzhguesit tanë janë shkelje të rënda të procesit zgjedhor, në shumë qendra votimi filloi dita e votimit pa futur fletën e kontrollit në kutinë e votimit në qendrën e votimit në Stari Grad, shumë kuti nuk ishin fare të vulosura (Stari Grad, Banjica, Kraljevë) dhe votuesit në vendvotime, kanë bërë fotografi të fletëve të votimit, që është shkelje e fshehtësisë së votës”, njoftuan nga Kreni-promeni dhe shtuan se vëzhguesit e tyre i kanë regjistruar këto të dhëna sipas rregullave ligjore.

Kreni-promeni tha gjithashtu se gjatë ditës së zgjedhjeve do të vazhdojnë të informojnë opinionin për parregullsitë që vërejnë vëzhguesit e tyre. Krahas 233 vëzhguesve të akredituar, Kreni-pereni organizoi trajnimin dhe regjistrimin e 1000 kontrollorëve të opozitës.

Komisioni i Qytetit të Zgjedhjeve në Beograd ka deklaruar se janë krejtësisht të pasakta pretendimet për parregullsi në qendrat e votimit, ku thuhet se votimi ka filluar pa vulosur kutitë e votimit dhe se fleta e kontrollit nuk është futur më parë.

Të gjitha kutitë e votimit janë vulosur para fillimit të votimit dhe në to është vendosur një fletë kontrolluese e mbushur siç duhet, raporton GIK.

Gjithashtu, GIK nuk ka marrë informacion nga asnjë komision votimi nga territori i Beogradit të Ri për parregullsi në vetë vendvotimet, si dhe rreth vendvotimeve, thuhet në komunikatë.

Ju kujtojmë, lista Serbia kundër dhunës njoftoi se përfaqësuesja e tyre në komisionin zgjedhor lokal në Ruski Krstur, në komunën e Kulës, u sulmua pasi kishte vërejtur persona të paakredituar.

Kandidati për deputet në Kuvendin e Serbisë, Shaip Kamberi i Listës “Beteja politike e shqiptarëve vazhdon”, tashmë ka hedhur votën e tij në zgjedhjet që po mbahen atje.

Në një postim në Facebook, Kamberi u ka bërë thirrje të gjithë shqiptarëve të Luginës së Preshevës, që të shfrytëzojnë të drejtën e tyre për të votuar.

“Ftoj Shqiptarët e Luginës së Preshevës të shfrytëzojnë masovikisht të drejtën e tyre të votës dhe të sigurojnë përfaqësim parlamentar”, ka shkruar Kamberi.

Ndërsa në deklaratën e tij para mediave ai është shprehur se Kosova dhe Shqipëria nuk kanë faj që shqiptarët po garojnë në këto zgjedhje me dy lista.

“Të shohim ndoshta moti i ftohtë, dimri, dita e shkurtër çfarë ndikimi mund të ketë. Megjithatë, unë besoj që ne do të arrijmë të kalojmë censusin e nevojshëm për të pasur një mandat….Sot është koha e zgjedhjeve, sot është koha për të motivuar njerëzit, për të mos kërkuar fajtorin. Gjithë ata që marrin pjesë duhet të bindin elektoratin e vet për rëndësinë e pjesëmarrjes dhe t’i ftojë ata të dalin. As Kosova dhe as Shqipëria nuk mund të ketë faj, se edhe Kosova edhe Shqipëria kanë bërë përpjekje, në radhë të parë Kosova që ka nisur këtë proces, për të unifikuar një listë, nuk është arritur dhe tash nuk kemi kohë të vajtojmë sot”, shkroi më tej Kamberi.

Ai u shpreh optimist se do të arrijë të fitojë votat e mjaftueshme për t’u zgjedhur deputet shqiptar në Parlamentin e Serbisë. Kamberi theksoi se në politikë nuk ka vend për pesimizëm, ose duhet ta lësh profesionin.

Kryetari në detyrë i Preshevës, Shqiprim Arifi nga lista “Alternativa Demokratike Shqiptare – Lugina e Bashkuar” votoi në fshatin Tërnavë, nga ku foli për një numër të vogël të shqiptarëve për të votuar.

Arifi tha se kjo ndodh për shkak të përçarjeve mes shqiptarëve në Luginë, ndërsa u shpreh pesimist se shqiptarët do të kenë përfaqësues në Parlamentin e Serbisë.

“Është fatkeqësi që ne e shohim sot, kemi kaluar tani mbi tre orë që janë hapur vendvotimet edhe ajo të cilën edhe e kam paralajmëruar edhe më herët, që shqiptarët qysh në 2022 kanë bojkotuar (zgjedhjet), sepse kemi qenë të përçarë. Po duket qe sivjet edhe një herë më shumë po duket që po bojkotojnë përçarjen tonë të cilën e kemi me dy lista në zgjedhje. Është një fatkeqësi siç po e shihni dhe ju vet nuk ka kurrfarë grumbullimi, kështu është edhe në 38 vendvotimet tjera”, tha Arifi.

Bojkoti, siç tha ai, është faturë ndaj lidershipit shqiptar. Në Serbi sot (17 Dhjetor) po mbahen zgjedhjet e parakohshme parlamentare, në të cilat shqiptarët po garojnë të ndarë në dy lista zgjedhore.

Presidentja e Kosovës, Vjosa Osmani, u ka dërguar një mesazh shqiptarëve të Luginës së Preshevës, Medvegjës e Bujanocit, me rastin e zgjedhjeve që po mbahen sot atje.

Osmani ka theksuar se pjesëmarrja sa më masive e bashkëkombësve tanë në Preshevë, Medvegjë e Bujanoc në zgjedhjet e sotme parlamentare është kundërpërgjigja më e duhur dhe demokratike kundër politikës së Beogradit.

POSTIMI I PLOTË:

Mesazh nga Presidentja Vjosa Osmani për shqiptarët e Preshevës, Medvegjës e Bujanocit:

Pjesëmarrja sa më masive e bashkëkombësve tanë në Preshevë, Medvegjë e Bujanoc në zgjedhjet e sotme parlamentare është kundërpërgjigja më e duhur dhe demokratike kundër politikës shoviniste të Beogradit, e cila, para syve të botës, vazhdon ta realizojë spastrimin etnik kundër shqiptarëve të Luginës nëpërmjet masave administrative.

Prandaj, ftoj të gjithë bashkëkombësit tanë në këto treva, që ta shfrytëzojnë të drejtën e tyre themelore për të votuar, edhe pse kjo e drejtë e tyre vazhdon të jetë nën sulm nga regjimi në Beograd.

Shqiptarët e Luginës garojnë këtë herë me dy lista: “Beteja politike e shqiptarëve vazhdon – Shaip Kamberi” që udhëhiqet nga Shaip Kamberi dhe “Alternativa Demokratike Shqiptare-Lugina e Bashkuar”, e Shqipërim Arifit. Në përbërjen e kaluar parlamentare, Shaip Kamberi ka qenë përfaqësuesi i vetëm i komunitetit shqiptar. 

Kryetari i komunës së Preshevës, Shqiprim Arifi ka votuar në zgjedhjet që po zhvillohen këtë të dielë (17 Dhjetor) në Serbi.

Arifi kryeson listën “Alternativa Demokratike Shqiptare-Lugina e Bashkuar”.

Ekziston rreziku që shqiptarët të mos arrijnë të marrin asnjë deputet, kjo për shkak të ndarjes me dy lista.

Lista “Beteja politike e shqiptarëve vazhdon – Shaip Kamberi’ udhëhiqet nga Shaip Kamberi.

Liderët politikë nga Shqipëria dhe Kosova kanë bërë thirrje për pjesëmarrje masive të shqiptarëve në zgjedhjet e të dielës në Serbi.

Presidenti i Serbisë, Aleksandër Vuçiç, ka votuar këtë të diel (17 Dhjetor) në kuadër të zgjedhjeve parlamentare dhe lokale që po zhvillohen në Serbi.

Vuçiç tha se Serbia në të ardhmen do të kishte shumë punë të rëndësishme. 

Po ashtu ai shprehu mendimin e tij duke thënë se kjo ishte një detyrë e rëndësishme, një kërkesë madhore që Serbia të vazhdojë në rrugën e përparimit dhe suksesit.

“Pres një pjesëmarrje shumë të mirë. Ne krijuam një turmë këtu, më të madhe se sa do të ishte zakonisht. Pres një pjesëmarrje të mirë dhe një fitore vendimtare. Shpresoj që të gjithë të përfshirë në zgjedhje të sillen në mënyrë racionale dhe të përgjegjshme, edhe pse nuk jam i sigurt për këtë. Unë pres që Serbia në të ardhmen do të ketë shumë punë të rëndësishme. Ka shumë për të bërë. Kur them ‘fitore vendimtare’ besoj se aleanca “Serbia nuk duhet të ndalet” (aleanca zgjedhore ku bën pjesë edhe Partia Progresive Serbe e Vuçiçit) do të ketë ose do të jetë afër shumicës absolute. Mendoj se kjo është një detyrë e rëndësishme, një kërkesë madhore që Serbia të vazhdojë në rrugën e përparimit dhe suksesit”, tha Vuçiç.