Hamasi breshëri raketash mbi Izraelin, 250 të vdekur, 164 pengje! Netanyahu: Do ta shkatërrojmë, jemi në luftë! Jeruzalemi sulm ajror mbi Gaza! 232 viktima, 1,600 të plagosur

Forcat paqeruajtëse të OKB-së në Libanin jugor po lëvizin drejt kufirit me Izraelin, por janë ndaluar nga simpatizantët lokalë të Hezbollahut që bllokojnë rrugët.

Komandanti i njësisë së forcave speciale të Izraelit Nachal, Kol Yehonatan Steinberg është vrarë në përballje me militantët e Hamasit, ka konfirmuar forcat mbrojtëse të vendit, raporton Sky News.

Në një fjalim televiziv nga Zyra e Shtypit e Qeverisë së Izraelit të shtunën vonë, Kryeministri i izraelit Benjamin Netanyahu tha se: “Ajo që ndodhi sot nuk është parë kurrë në Izrael. Ne do të marrim hak të fuqishëm për këtë ditë të zezë.”

“Izraeli do të arrijë çdo vend ku Hamasi fshihet,” tha Netanyahu, duke iu referuar grupit militant pas sulmeve. “Unë u them njerëzve të Gazës që të largohen nga ato vende tani.”

“Unë i them Hamasit, ju jeni përgjegjës për mirëqenien e robërve. Izraeli do të zgjidhë hesapet me këdo që i dëmton ata.”

Sekretari amerikan i Shtetit Antony Blinken ka diskutuar me zyrtarët në vend, për të marrë masa për të forcuar sigurinë e Izraelit

Antony Blinken foli me presidentin izraelit Isaac Herzog dhe ministrin e Jashtëm Eli Cohen në telefon duke nënvizuar se SHBA vazhdon ta mbështesë.

“Sekretari nënvizoi mbështetjen e palëkundur të Shteteve të Bashkuara për të drejtën e Izraelit për të mbrojtur veten”, tha departamenti amerikan ishtetit.

Pas fjalimit të Joe Biden që i siguroi mbështetje të plotë për t’u vetëmbrojtur, një një deklaratë të fundit kryeministri izraelit Benjamin Netanyahu tha se Izraeli do ta mundë Hamasin.

“Ushtria izraelite do të përdorë menjëherë fuqinë e saj të plotë për të shkatërruar Hamasin”.

Kryeministri izraelit u bëri thirrje banorëve të Rripit të Gazës që të largohen menjëherë nga territori i pushtuar.

Ai tha se Izraeli do të hakmerret për këtë "ditë të zezë" dhe do ta kthejë Gazën në një "qytet rrënojash".

“Lufta e Izraelit kundër Hamasit do të marrë kohë dhe do të jetë e vështirë”, tha kryeministri.

Presidenti amerikan Joe Biden në podiumin e Shtëpisë së Bardhë tha se "Izraeli ka të drejtë të mbrojë veten dhe popullin e tij".

Biden ripohoi mbështetjen e plotë të SHBA-së për Izraelin, duke thënë se mbështetja e tij është "e fortë dhe e palëkundur".

Teksa përshkruan ngjarjet në Izrael, ai thotë se ajo që po ndodh është një "tragjedi në nivel njerëzor... është zemërthyese".

"Të pikëlluar për ata që kanë humbur të dashurit e tyre", thotë ai.

Në përgjigje të bombardimeve të kullës në qendër të Gazas, militantët e Hamasit kanë vijuar sulmin me raketa në Izrael duke goditur drejtpërdrejt shumë vende brenda Izraelit, duke përfshirë Tel Avivin, sipas shërbimit të shpëtimit të Izraelit Magen David Adom (MDA).

“Në përgjigje të bombardimeve të kullave në qendër të Gazës  Hamasi ka vijuar sulmin me raketa. 150 në #TelAviv thuhet në deklaratën e Hamasit

Sirenat e alarmit kanë rënë kudo në Tel Aviv dhe në zonat qëndrore të Izraelit ndërsa janë dëgjuar shpërthime të shumta dhe qielli flakërin nga sulmet me raketa.

Ndërkohë autoritetet e shëndetësisë flasin për 232 izraelë të vrarë dhe mbi 1100 të plagosur. Ndërkohë në Gaza autoritetet flasin për 200 palestinezë të vrarë dhe më shumë se 1600 të plagosur.

Dhjetra izraelitë janë tashmë në duart e Hamas, bëri të ditiru Abu Obeida, zëdhënësi  Organizatës duke pretenduar se pengjet janë në "vende të sigurta" dhe në tunele nën kontrollin palestinez.

Ndërkohë kreu i Hamas, Saleh Al-Arouri it ha Al Jazeera se kishin marrë peng një numër të madh pengjesh mes tyre edhe zyrtarë të lartë.

Sipas al-Arouri, Hamasi ka mjaft të burgosur izraelitë që do të detyrojë Izraelin të lirojë të gjithë të burgosurit palestinezë në burgjet e tij. "Ne arritëm të vrasim dhe kapim shumë ushtarë izraelitë. Luftimet janë ende në vazhdim. Dhe të burgosurve tanë u them se liria juaj është afër. Ajo që kemi në duart tona do t'ju çlirojë. Sa më gjatë të vazhdojnë luftimet, aq më i madh është numri i të burgosurve.”, tha zyrtari i Hamasit

Marrja e pengjeve konfirmohet edhe nga Tel Aviv. Sipas Izraelit janë marrë peng edhe qytetarë izraelitë në Rripin e Gazës dhe në në Beeri dhe Ofakim, qytete në jug të Izraelit rreth njëzet kilometra larg kufirit me rajonin palestinez. Fotografitë e publikuara nga agjencia amerikane e lajmeve Associated Press tregojnë se tre civilë izraelitë, dy prej tyre gra, janë transferuar në Gaza. Një udhëheqës i lartë i Hamasit, Saleh al-Arouri, i tha transmetuesit arab Al Jazeera se pengjet mund të përdoren për shkëmbimin e të burgosurve: Qëllimi do të ishte lirimi i palestinezëve të mbajtur në burgjet izraelite

Avionët e luftës izraelite kanë sulmuar kullën palestineze, një kullë rezidenciale 14 kate në lagjen Al-Rimal në qytetin e Gazës duke e kthyer në gërmadh, bën të ditur agjencia palestineze Wafa.

Korrespondenti i tyre raportoi se avionët luftarakë izraelitë shënjestruan Kullën Palestineze me të paktën gjashtë raketa, duke e rrëzuar në tokë.

Sipas agjencisë palestineze, deri më tani ka pasur të paktën 198 palestinezë të vdekur në Gaza, shumica prej tyre civilë dhe 1000 të tjerë të plagosur. Ndërkohë Ministri i Energjisë, Yisrael Katz urdhëroi Korporatën Elektrike të Izraelit të ndalojë furnizimin me energji elektrike në Gaza

Përfaqësuesi për Politikë të Jashtme i Bashkimit Evropian, Josep Borrell, ka deklaruar se BE dënon sulmet e dhunshme ndaj Izraelit nga militantët e Hamas. 

"BE bën thirrje për ndërprerje të menjëhershme të këtyre sulmeve të pakuptimta, të cilat rrisin më tej tensionet në rajon dhe minojnë seriozisht aspirata për paqe të popullit palestinez. BE-ja qëndron në solidarizim me Izraelin që ka të drejtë ta mbrojë veten në linjë me ligjet ndërkombëtare, në përballje me dhunën e tillë dhe sulmet”, tha ai.

Edhe Presidenti i SHBA-së Joe Biden deklaroi se i ka thënë gjatë një bisede kryeministrit të Izraelit Benjamin Netanyahu se SHBA se ishte gati të ofronte “të gjitha mjetet e duhura të mbështetjes” pasi grupi islamik palestinez Hamas nisi një sulm ndaj Izraelit.

“Izraeli ka të drejtë të mbrojë veten dhe popullin e tij. I kam bërë të qartë kryeministrit Netanyahu se ne jemi të gatshëm të ofrojmë të gjitha mjetet e duhura të mbështetjes për Qeverinë dhe popullin e Izraelit”, tha Biden

Nëpër rrjete sociale janë publikuar pamje filmike në zonën kufitare ku tregojnë momentin e kapjes së një ushtari izraelit nga militantët, të cilin e dhunojnë dhe më pas e marrin me vete në një motoçikletë.

Për herë të parë që në 2007 kur Izraeli ndërtoi kufirin fortifikues, i cili nuk ishte arritur të thyhej asnjëherë militantët e Hamasit arritën sot ta thyejnë dhe të përleshen me forcat e mbrojtjes izraelite në disa lokacione në jug.

Pyetja që lind është si arritën militantët të kalojnë këtë mur fortifikues?

Përmes deltaplanëve (Parashuta me motorë).

Falë tyre luftëtarët e Hamasit të armatosur mendohet se kanë arritur të kalojnë fortifikimin dhe të zbresin në vende të pambuluara nga kamerat.

Një video e shpërndarë nga Hamas tregohet se pikërisht këta luftëtarë që kanë zbritur me deltaplanë lufte kanë goditur tankun që qëndronte në kufi, ndërsa të tjerë flasin për një dron të telekomanduar.

Tanku u godit nga një mjet shpërthyes ndërkohë që janë goditur me mitralozë ushtarët izraletë që vraponin nga bazat.

Deltaplanët dhe parashutat e motorizuara kanë qenë protagonistë të konflikteve të Lindjes së Mesme për më shumë se dyzet vjet: Disa ditë më parë disa milici kurdë thuhet se i përdorën ato kundër një patrulle turke në Siri.

Në mars 1981 një palestinez i vetëm nga Libani arriti në brigjet e Haifës, duke vazhduar të hidhte granata derisa i mbaroi benzina. Sulmi më i rëndë ndodhi natën e 25 nëntorit 1987, kur njerëz të armatosur arritën të depërtonin në një kamp të ushtrisë izraelite. Në pak minuta ai vrau gjashtë ushtarë dhe plagosi tetë të tjerë. Ata i përkisnin krahut pro-sirian të rezistencës palestineze të themeluar nga Ahmed Jibril.

Më shumë se 100 njerëz janë vrarë në Izrael që nga sulmi i befasishëm i grupit militant Hamas nga toka, deti dhe ajri nga Gaza që nisi prej mëngjesit. Më shumë se 900 njerëz janë të plagosur, citojnë mediat izraelite burime nga spitalet të cilat janë në gatishmëri.

Në të njëjtën kohë, luftimet dhe bombardimet izraelite vazhdojnë. Numri i të vdekurve në Gaza është 198 të vdekur dhe të paktën 1600 të plagosur, duke përfshirë të paktën njëzet milicë. Spitalet në Rripin Palestinez janë gjithashtu në gatishmëri përballë sulmeve të vazhdueshme nga Izraeli, i cili e ka quajtur operacionin e tij ushtarak hakmarrës "Shpatat e Hekurta".

Kancelari gjerman, Olaf Scholz i ka dënuar sulmet e militantëve të Hamasit kundër Izraelit.

"Lajme tmerruese na mbërrijnë sot nga #Israel. Goditjet me raketa nga Gaza dhe shkallëzimi i dhunës na trondisin thellësisht. Gjermania i dënon këto sulme të Hamasit dhe qëndron në krah të Izraelit", shkroi Scholz në platformën X.

Sulmi është dënuar edhe nga ministrja e Jashtme gjermane, Annalena Baerbock.

"Unë i dënoj ashpërsisht sulmet terroriste nga Gaza mbi Izraelin. Dhuna dhe raketat kundër të pafajshmëve duhet të ndalin menjëherë. Izraeli ka solidaritetin tonë të plotë dhe të garantuar nga e drejta ndërkombëtare që të mbrohet kundër terrorit", shkroi Baerbock në platformën X, ish-tëitter.

Një reagim ka pasur edhe nga presidenti francez, Emmanuel Macron.

 "I dënoj fuqishëm sulmet terroriste që po zhvillohen kundër Izraelit. Po ashtu reagime vijnë Bashkimi Europian, që dënoi sulmet e Hamasit radikal-islamik. BE ka shprehur solidaritetin me Izraelin. "Unë i dënoj ashpërsisht sulmet e kryera nga terroristët e Hamasit kundër Izraelit. Bëhet fjalë për terrorizëm në formën e tij më të shëmtuar", shkroi presidentja e Komisionit Europian, Ursula von der Leyen në platformën X. Kurse i ngarkuari i BE për Politikën e Jashtme, Josep Borrell deklaroi se "BE shpreh solidaritetin me Izraelin në këtë kohë të vështirë". Edhe presidenti i Këshillit të BE, Charles Michel i dënoi sulmet.

Ministri i Jashtëm britanik, James Cleverly i quajti "sulme të tmershme" të Hamasit ndaj civilëve izraelitë. 

Edhe SHBA e ka dënuar sulmin me raketa dhe ka kërkuar "nga të gjitha palët që të heqin dorë nga dhuna". Ministri amerikan i Mbrojtjes, Lloyd Austin tha se duan të sigurojnë se "Izraeli i ka të gjitha mjetet e nevojshme për vetëmbrojtje".

Reagime ka pasur edhe nga Ukraina.

Këshilli i Sigurimit të Kombeve të Bashkuara, ka thirrur një takim urgjent në OKB për të diskutuar krizën midis Hamasit dhe Izraelit. Takimi do të mbahet të dielën. Edhe Malta kërkuar mbledhje urgjente të Këshillit të Sigurimit pas sulmeve me raketa nga Gaza.

Pentanoni do të punojë për të siguruar që Izraeli "të ketë të gjithë atë që i duhet për tu mbrojtur" Këtë e ka konfirmuar ministri i Mbrojtjes Amerikane Lloyd Austin, bëjnë të ditur mediat amerikane.

 Ndërkohë edhe SHBA ka dënuar sulmin e terristëve të Hamasit kundër civilëve izraelitë

“Nuk ka kurrë justifikime për akte terroriste. Ne qëndrojmë fort përkrah qeverisë dhe popullit të Izraelit”, tha Adrienne Watson, zëdhënëse e Këshillit të Sigurisë Kombëtare të Shtëpisë së Bardhë.

Sulmi u dënua edhe nga OKB e cila u  bëri thirrje palëve të tërhiqen

“Është një greminë e rrezikshme” tha  koordinatori special i OKB-së për procesin e paqes në Lindjen e Mesme, Tor Ëennesland, duke shprehur shqetësim të thellë për civilët. "Dënoj ashpër sulmin e shumëfishtë të mëngjesit të sotëm," shtoi ai. Sulmi rezultoi në "skena të tmerrshme dhune dhe shumë vdekje dhe plagosje të izraelitëve. Këto janë sulme të neveritshme kundër civilëve dhe duhet të ndalen menjëherë."

Një video e publikuar në rrjete sociale tregon terrorin që po përjetojnë izraelitët në qendrat e banuara afër Rripit të Gazës. Grupe palestinezësh të armatosur të Hamasit sulmojnë njerëzit nëpër rrugë e hyjnë në shtëpi duke vrarë civilë dhe rrëmbyer civilë të tjerë për ti marrë në Rripin e Gazës si pengje me qëllim që t’i shkëmbejnë më pas me të burgosur.

Zona e zgjedhur nga Hamasi për këtë bastisje të paprecedentë është Sderot.

Imazhet janë tepër brutale, tregojnë trupa njerëzish që vriten me gjakftohtësi në një ndalesë autobusi apo teksa ishin në makina e tyre.

Në një video është gjithashtu trupi i një ushtari të çuar në territorin palestinez që shkelet nga turma, i cili gjithashtu do të përdoret si një objekt i mundshëm shkëmbimi pengjesh.

Rritet bilanci i përleshjeve. Shërbimet e urgjencës  kanë raportuar se mbi 40 izraelitë kanë vdekur si pasojë e luftës së nisur nga Hamasi. Të lënduarit, sipas të njëjtit burim, janë 740.

Ndërkohë ministria e Shëndetësisë palestineze thotë se nga sulmi izraelit në Rripin e Gazës janë 161 të vdekur dhe 931 të plagosur.

Jeruzalemi u përgjigj me sulm ajror në Gaza mësymjes së militanëve të Hamasit në Izrael.

 Dhjetra luftëtarë me motora dhe dhe makina kanë arritur të kalojnë kufirin e fortifikuar që ishte ndërtuar nga Izraeli dhe rrethonte Rripin e Gazës. Një shfaqje masive të forcës që e kapi Izraelin të papërgatitur. Ende nuk është e qartë si skuadrat kanë arritur të kalojnë kurifin.

Luftëtarët e Hamasit duket se kanë arritur të përfitojnë dhe nga sulmet intensive me raketa nga Gaza drej Izraelit që nisi mëngjesin e sotëm në orën 07:00. Më pas në një moment të dytë me deltaplan automjete e motoçikleta njerëz të armatosur u panë tek kalonin portat e hapura dhe përparuan me kilometra brenda. Në atë zonë në rrethana normale nuk ishte e mundur që palestinezët e Gazës të bënin një hap, por të gjitha skemat e mbrojtjes izraelite - të cilat ishin të fortifikuara prej 2007 - u shembën.

Në fillim të sulmit, të paktën një deltaplan me një luftëtar të Hamasit u pa duke kaluar kufirin e fortifikuar në zonën e Sderotit. Më pas ekipet e Hamasit me kamionçina u shpërndanë në të gjithë zonën dhe filluan të qëllonin civilë.  Më pas erdhën dhe të tjerë me motora. Në shumë video, palestinezët shihen në bordet e makinave izraelite të kapura, gjë që mund të ketë rritur konfuzionin dhe ngadalësuar reagimin e ushtrisë izraelite.

“Përgëzojmë luftëtarët palestinezë” tha këshilltari i liderit suprem iranian Ali Khamenei, Rahim Safavi, pas sulmeve të Hamasit ndaj Izraelit.

"Ne do të qëndrojmë pranë luftëtarëve palestinezë deri në çlirimin e Palestinës dhe Jeruzalemit," tha ai, citon agjencia gjysmëzyrtare iraniane të lajmeve ISNA.
 

Një video e publikuar në rrjetet sociale tregon momentin kur militantët e Hamasit hipin mbi tank, Merkava 4 të forcave mbrojtëse të izraelit dhe nxjerrin me forcë nga atje ushtarin izraelit. Imazhet vijnë nga Gaza aty ku Hamasi ka ndërmarrë një sulm të paprecedentë kundër Izraelit.

Në video duket që luftëtarët e Hamasit kanë kaluar përtej kufirit të fortifikuar dhe kanë pushtuar fshatrat më të afërt.

Pasi e nxjerrin ushtarin nga tanku ata e qëllojnë me shkelma në tokë.

Kanali televiziv izraelit Reshet 13 raporton se militantët palestinezë po mbajnë robër izraelitë në qytetin jugor Ofakim. Mediat palestineze dhe izraelite kanë raportuar rrëmbime. Këto raporte janë për momentin të pakonfirmuara.

Mediat izraelite raportuan se Hamasi aktualisht ka 33 pengje, duke përfshirë civilë dhe ushtarë. Autoritetet izraelite kanë thënë se nuk do të komentojnë për këtë.

Zëdhënësi i Hamasit, Khaled Qadomi tha për Al-Jazeera se nuk kanë marrë "pengje" por "të burgosur lufte.

"Ne duam që komuniteti ndërkombëtar të ndalojë mizoritë në Gaza, kundër popullit palestinez, vendeve tona të shenjta si Al-Aksa. Të gjitha këto janë arsyet pas fillimit të kësaj beteje. Ata nuk janë pengje, ata janë robër lufte. Është një luftë kundër pushtuesve,” tha ai.

545 persona të plagosur janë shtruar në spitalet izraelite që nga sulmi i nisur nga Rripi i Gazës mëngjesin e sotëm. Kjo është bërë e ditur nga Ministria e Shëndetësisë e cituar nga Times of Israel.

Sa i takon viktimave, deri më tani raportohet për të paktën 22  të vdekur.

Kryeministri izraelit Benjamin Netanyahu ka reaguar për sulmin e ndërmarrë nga Hamasi mëngjesin e sotëm, për të cilin ka paralajmëruar qytetarët se janë në luftë. 

“Qytetarë të Izraelit, ne jemi në luftë dhe nuk është vetëm një operacion, është një luftë”.

Ai shtoi se i kishte dhënë urdhër ushtrisë që të tërhiqte rezervistët dhe t'i përgjigjej luftës me vrull dhe një shkallë që armiku nuk e ka njohur deri më tani.

"Armiku do të paguajë një çmim që nuk është dashur ta paguajë kurrë. Ne do të fitojmë

Ka të paktën gjashtë persona kanë humbur jetën , ndërsa 200 të tjerë kanë mbetur të plagosur për shkak të sulmeve me raketa nga Rripi i Gazës që goditën zonën Kuseife, në jug të Izraelit, rreth 65 kilometra nga Rripi i Gazës.

Presidentja e Parlamentit Evropian, Roberta Metsola ka dënuar ashpër sulmin e ndërmarrë nga Rripi i Gazës, të cilët kanë sulmuar me mijëra raketa Izraelin mëngjesin e sotëm.  

Metsola e ka konsideruar të tmerrshëm sulmin ndaj njerëzve të pafajshëm në Izrael, teksa ka theksuar se terrori nuk do të mbizotërojë kurrë.

"Të tmerruar nga sulmet e vazhdueshme kundër Izraelit. Ne dënojmë terrorin dhe dhunën ndaj njerëzve të pafajshëm. Mendimet e mia shkojnë për të gjithë ata që e gjejnë veten nën zjarr, për të gjithë ata që mbrojnë veten nga këto sulme brutale. Terrori nuk do të  mbizotërojë kurrë", ka shkruar Roberta Metsola.

Bashkimi Evropian ka shprehur solidaritetin e tij me Izraelin në këto momente të vështira.

Kreu i diplomacisë evropiane, Josep Borrell përmes një postimi në rrjetin social “X” dënoi sulmin dhe dhunën e tmerrshme ndaj civilëve.

"Ne po ndjekim me ankth lajmet që vijnë nga Izraeli. Dënojmë pa mëdyshje sulmet e Hamasit. Kjo dhunë e tmerrshme duhet të ndalet menjëherë. Terrorizmi dhe dhuna nuk zgjidhin asgjë", ka shkruar Borrell.

Lideri i Hamasit, Ismail Haniy thotë se sulmi i papritur ndaj Izraelit u bë për të mbrojtur xhaminë Al-Aksa në Jerusalem.

"Grupi palestinez Hamas po bën një fushatë heroike që synon mbrojtjen e xhamisë Al-Aksa, vendeve të shenjta dhe të burgosurve", u shpreh lideri i grupit palestinez. 

Kështu, arsyeja kryesore e sulmit sipas tij është agresioni ndaj xhamisë Al-Aksa nga izraelitët, i cili ka zgjatur për shumë muaj dhe është intensifikuar ditët e fundit.

Sulmi i paprecedentë kundër Izraelit nga Rripi i Gazës, filloi mëngjesin e sotëm. Ky është sulmi më i madh ndaj Izraelit në vite, ku përveç mijëra raketave të lëshuara edhe njerëz të armatosur depërtuan brenda në Izrael.

Kreu i këshillit rajonal të Shaar Hanegev,rajoni i Izraelit në kufi me Rripin e Gazës u vra në një përleshje me terroristët e Hamasit. Këtë e raporton Times of Israel.

Autoritetet lokale deklaruan se "Ofir Liebstein u vra teksa po shkonte për të mbrojtur qytetin e tij gjatë sulmit terrorist". Zëvendësi i tij në Këshill, Yossi Keren, u thirr për të menaxhuar urgjencën.

Më shumë se 100 persona janë plagosur në Izrael për shkak të sulmeve me raketa nga Rripi i Gazës kundër zonave jugore dhe qendrore të vendit.

Sipas “The Times of Israel”, Qendra Mjekësore Soroka në Beer Sheva tha se kishte marrë 80 persona të plagosur, disa në gjendje të rëndë.

Ndërsa. Qendra Mjekësore Assaf Harofeh, pranë Tel Avivit, po ofron kujdes për 17 pacientë, dy prej të cilëve janë në gjendje të rëndë. Në Qendrën Mjekësore Kaplan në Rehovot janë gjithashtu 21 të lënduar, dy në gjendje të rëndë.

Izraeli i është përgjigjur Gazës me sulm ajror, pasi kjo e fundit lëshoi mëngjesin e sotëm mijëra raketa. 

"Dhjetëra avionë izraelitë po sulmojnë një numër objektivash të Hamasit në Rripin e Gazës ." Këtë e ka bërë të ditur zëdhënësi ushtarak.

Sipas asaj që u njoftua nga milicët e Hamasit, të paktën pesë ushtarë izraelitë janë rrëmbyer gjatë operacionit që Hamasi nisi mëngjesin e sotëm nga Gaza kundër Izraelit. Videot në mediat sociale të postuara nga vetë milicët tregojnë ushtarë izraelitë me duar të lidhura dhe gjoks të zhveshur të shtrirë në tokë.

Ka të paktën katër të vdekur dhe disa të plagosur për shkak të sulmeve me raketa nga Rripi i Gazës që goditën zonën Kuseife, në jug të Izraelit, rreth 65 kilometra nga Rripi i Gazës. Kjo u raportua nga Times of Israel.

Duke sulmuar në befasi Izraelin këtë mëngjes , Hamasi bëri një "gabim të rëndë": tha Ministri izraelit i Mbrojtjes Yoav Gallant.

"Hamasi bëri një gabim të rëndë këtë mëngjes dhe filloi një luftë kundër shtetit të Izraelit. Ushtarët e Forcave të Mbrojtjes të Izraelit po luftojnë armikun në të gjitha vendet ku janë infiltruar. Do ta fitojë këtë luftë”, premtoi ai.

Izraeli është "nën sulm masiv nga Rripi i Gazës" dhe është "në gjendje lufte". Këtë e deklaroi kreu i policisë izraelite në një deklaratë.

"Aktualisht ka 21 vende aktive konflikti në Izraelin jugor. Njësia kundër terrorizmit Yamam është në vend. I gjithë rajoni jugor është i mbyllur për lëvizjen civile."

Forcat e Mbrojtjes të Izraelit thonë se po shpallin "gjendje gatishmërie për luftë" në përgjigje të sulmit të befasishëm nga Gaza.

Ministri i Mbrojtjes ka miratuar një thirrje për rezervistët ushtarakë.

Ushtria izraelite ka nisur të kryejë sulme hakmarrëse ajrore në Rripin e Gazës dhe ka paralajmëruar se Hamasi do të paguajë një çmim shumë të rëndë.

Ambasada e SHBA-së në Izrael dënon "hedhjen pa kriter të raketave nga terroristët e Hamasit kundër civilëve izraelitë". E ngarkuara me punë Stephanie Hallett deklaroi në mediat sociale se ajo ishte "në kontakt me autoritetet izraelite dhe mbështet plotësisht të drejtën e Izraelit për t'u mbrojtur nga këto akte terrorizmi".

“Nëse keni armë, nxirreni. Kjo është koha për ta përdorur atë. Nxirrni kamionë, makina, sëpata, sot fillon historia." Kështu thotë komandanti ushtarak i Hamasit, Mohammad Deif në mesazhin e regjistruar në të cilin ai bën thirrje për një revoltë të përgjithshme kundër Izraelit. Kjo u raportua nga CNN.

Duke filluar nga ora shtatë e mëngjesit, grupi palestinez Hamas filloi një sulm të paprecedentë kundër Izraelit nga Rripi i Gazës, nga toka dhe nga ajri. Ky është sulmi më i madh ndaj Izraelit në vite, një sulm të befasishëm që përveç qindra raketave të lëshuara edhe njerëz të armatosur depërtuan brenda në Izrael. 

Në Izrael, të paktën një i vdekur dhe 15 të plagosur u raportuan pas breshërisë së raketave të lëshuara nga Rripi i Gazës.

Faqja izraelite e lajmeve Ynet raporton vdekjen e një gruaje 70-vjeçare në një sulm me raketa të lëshuar nga Gaza që goditi Kfar Aviv, afër Ashdodit.

Ministri izraelit i Mbrojtjes Yoav Gallant ka shpallur një gjendje të jashtëzakonshme në jug të vendit, brenda 80 kilometrave nga Rripi i Gazës. Kjo i lejon atij të kufizojë grumbullimet dhe të mbyllë disa zona, e cila përfshin gjithashtu qytetet e Tel Avivit dhe Beersheba.

Sot, si çdo të shtunë që nga fundi i vitit të kaluar, ishin planifikuar demonstrata kundër qeverisë Netanyahu dhe reformës në drejtësi.