Një grup i strukturuar kriminal në fushën e trafikut të drogës nga Shqipëria drejt Gjermanisë, është kapur nga policia shqiptare, në një super-aksion që ka çuar në ndalimin e 4 personave në Tiranë. Leonard Duka 33 vjeç dyshohet të jetë koka e këtij grupi, ndërsa bashkë me të u arrestuan Elvis Gaçaj 44 vjeç, Oltion Loga 38 vjeç dhe Dritan Agaj 38 vjeç.

Aksioni u mësua ekskluzivisht nga Report Tv, ndërsa ishte duke u zhvilluar, ndërsa më tej policia e Tiranës, përmes një njoftimi tha se u sekuestruan një mjet të blinduar, një armë zjarri pistoletë me krehër me fishekë, 46 fishekë luftarak, si dhe doza me lëndë narkotike kanabis. Një automjet i blinduar, BMW seria 7 është me targa të Rusisë, foton e të cilës Shqiptarja.com e siguron ekskluzivisht, u kap nga policia pranë shkollës "Partizani", nga skuadra operacionale, dhe i përket pikërisht të arrestuarit Elvis Gaçaj.

Aksioni i sotëm u krye për të parandaluar një vrasje e cila ishte planifikuar dhe do kryhej nga ky grup personash.

Makina blind me targa ruse e sekuestruar

Policia thotë se gjatë kontrollit të ushtruar në banesën me qira pranë shkollës "Partizani" ku të arrestuarit jetojnë, disa prej tyre kanë tentuar të largojnë sendet e kundraligjshme duke hedhur pistoletën nga ballkoni i banesës

Pistoleta e hedhur nga ballkoni nga te arrestuarit

Policia thotë se aksioni nisi falë bashkëpunimit me qytetarët për të luftuar krimin, pas informacioneve se këta persona mbanin në banesë sende të kundraligjshme.

Urdhër-arrestet janë firmosur nga Prokuroria e Tiranës, ndërkohë që janë kryer një sërë kontrollesh në disa banesa në kryeqytet. Procedimi ka nisur nga sektori i Anti-drogës dhe më pas ka hyrë në lojë Prokuroria e Tiranës. Veprat penale në ngarkim të tyre janë “Prodhimit dhe shitjes së lëndëve narkotike” dhe “Prodhim dhe mbajtja pa leje e armëve e municionit luftarak e kryer në bashkëpunim"

Elvis Gaçaj i forti me BMW seria 7 të blinduar me targa ruse, i shpetoi 3 atentateve...Pronar i parcelave te droges ne Shengjergj

Elvis Gaçaj, ne 2015 ka qenë objektiv i një atentati tek "Lulishte 1 Maji" në Tiranë, ku mbetën të vrarë gabimisht dy persona, ndërsa ai u plagos.  Ai akuzohet edhe për parcelat e hashashit në zonën e Shëngjergjit, si personi që i disponon dhe financon parcelat me lëndë narkotike.

Në atentatin tek Lulishte "1 Maji"  u vranë gabimisht Aurora Oskian dhe Kevin Rugova. Nga atentati shpëtoi shoqja e Aurorës, Eda Gjura. Për këtë atentat, në muajin tetor të vitit 2016, togat e zeza të kryeqytetit dënuan me burg përjetë Sael Sulajn dhe për shkak të gjykimit të shkurtuar do të vuajë 35 vite burg. Ndërsa bashkëpunëtori i tij, Vasiel Çavo u dënua me 30 vite burgim dhe për shkak të gjykimit të shkurtuar do të vuajë 20 vite burg. Sipas autorëve, shkaku i konfliktit mes tyre ishte sepse disa muaj para ngjarjes, i arrestuari në aksionin e sotëm, Elvi Gaçaj, u kishte propozuar që të punonin për të për të shpërndarë drogë, hashash, në zonën e Tiranës së Re dhe kompleksin sportiv “Dinamo”.

Dy të pandehurit nuk kanë pranuar, ndërsa Gaçaj i kishte dhunuar. Elvis Gaçaj u gjykua i veçuar nga dy të pandehurit të akuzuar si autorë të masakrës. Ai u dënua me 3.4 vite burg për akuzën e “prodhimit dhe shitjes së narkotikeve”. Sipas gjykatës, ai është zotëruesi i një sasie prej 3.8 gr kokainë, e sekuestruar në banesën e viktimës Rugova pas ngjarjes. Origjina e lëndës narkotike u sqarua nga Kristjana I., e cila u gjet e mbyllur në banesën e Rugovës. Ajo shpjegoi para hetuesve se bashkëjetonte me Rugovën që prej gjashtë muajsh. Sipas saj, kokaina i ishte dhënë Kevinit nga Elvis Gaçaj.

Elvis Gaçaj u gjykua i veçuar nga dy të pandehurit të akuzuar si autorë të masakrës. Ai u dënua me 3.4 vite burg për akuzën e “prodhimit dhe shitjes së narkotikeve”. Sipas gjykatës, ai është zotëruesi i një sasie prej 3.8 gr kokainë, e sekuestruar në banesën e një prej viktimave në atentatin e lulishtes '1 Maji'.

Elvis Gaçaj, 44 vjeç, brenda viteve 2013-2015 u ka shpëtuar edhe dy atentateve të tjera, ndërkohë që sulmet e mëparshme për ta eliminuar ishin kryer me eksploziv.

Ne atentatin e parë u plagos lehtë nga shpërthimi i një sasie tritoli në makinë. Atentati i dytë mbeti në tentativë, pasi lënda plasëse nuk shpërtheu.

Elvis Gaçaj ka kryer një vrasje në vitin 1992 dhe një plagosje në vitin 2008. Eshtë një personazh shumë i njohur në trafikun e drogës në kryeqytet.

Kreu i bandes dhe vellai i tij, te kerkuar per atentatin...qe u shkoi 'huq'

Ndërkohë, kreu i bandës, Leonard Duka 33 vjeç, së bashku me vëllain e tij, ishin shpallur në kërkim pas një atentati që i bënë një personi me inicialet E.D, më 20 mars të 2017-ës. E.D mori plumb në gjoks, por i shpëtoi vdekjes.