Takimi me Ramën, Blinken: Kënaqësi të festojmë 100 vjetorin e marrëdhënieve SHBA-Shqipëri! Mezi presim 100 vitet e ardhshme

SHBA– Sekretari amerikan i shtetit Antony Blinken ka ndarë pamjet nga takimi i djeshëm që zhvilloi me kryeministrin Edi Rama. Me anë të një postimi në ‘Tëitter’, Blinken shkruan se ishte kënaqësi që priti Ramën, takim ky i cili vjen në kuadër të 100 vjetorit të marrëdhënieve mes SHBA dhe Shqipërisë.

“Gëzohem të pres kryeministrin shqiptar dhe te feston 100 vjetorin e marrëdhënieve diplomatike SHBA-Shqipëri. Mezi presim 100 vitet e ardhshme”, shkruan Blinken.

Një reagim ka pasur edhe nga ana e Ambasadës Shqiptare ka zbardhur temat kryesore në të cilat është fokusuar edhe takimi Rama-Blinken.

“Sekretari i Shtetit Antony J. Blinken u takua me kryeministrin shqiptar Edi Rama në Uashington DC. Sekretari Blinken dhe kryeministri Rama festuan 100-vjetorin e marrëdhënieve diplomatike SHBA-Shqipëri dhe Sekretari vlerësoi traditën e vazhdueshme të Shqipërisë për ofrimin e një porte të sigurt për ata në nevojë duke pritur afganët në rrezik. Sekretari vuri në dukje bashkëpunimin tonë të fortë në NATO dhe në Këshillin e Sigurimit të OKB-së dhe falënderoi kryeministrin Rama për mbështetjen e qartë të Shqipërisë për sovranitetin dhe integritetin territorial të Ukrainës kundër agresionit rus. Sekretari përsëriti mbështetjen e SHBA për pranimin e Shqipërisë në BE dhe integrimin ekonomik rajonal, ndërsa theksoi nevojën për të zbatuar plotësisht reformën në drejtësi dhe për të luftuar korrupsionin”, shkruhet në njoftimin e plotë.

Kryeministri Edi Rama takoi ditën e djeshme për 45 minuta sekretarin Amerikan të Shtetit, Antony Blinken. Në përfundim të takimit, Rama tha se Blinken vlerësoi angazhimin dhe kontributin e Shqipërisë ndër vite, në organizma të shumta të Kombeve të Bashkuara, në të mirë të paqes dhe mirëkuptimit mes vendeve. Pas takimit, kreu i qeverisë zhvilloi një intervistë tek “Zëri i Amerikës”, duke u ndalur në disa çështje kryesore të vendit, si hetimet për inceneratorët, situatën në PD apo edhe luftën ndaj korrupsionit. Më herët,  Rama u takua me sekretarin e përgjithshëm të OKB-së, Antonio Guterres. Më herët nën ritmet e muzikës tradicionale shqiptare, në një sallë të mbushur me përfaqësues të 193 vendeve anëtare të OKB, Shqipëria organizoi një pritje gala në New York me rastin e fillimit të mandatit 2-vjeçar të Shqipërisë në Këshillin e Sigurimit të OKB-së.

B.K./Shqiptarja.com

TAG:
• Antony Blinken
• edi rama
• SHBA