Tavolinë pokeri në lokal, arrestohen tre persona në Shkodër! Në kërkim dy pronarët, procedohen penalisht 9 të tjerë

Policia e Shkodrës ka arrestuar 3 persona ndërsa ka proceduar penalisht 9 të tjerë në kuadër të operacionit të koduar ‘Fati i Lojërave’. Mësohet se në lokalin e dy vëllezërve me inicialet L.P., dhe G.P., të cilët janë shpallur në kërkim, ushtrohej aktiviteti i paligjshëm i lojërave të fatit.

Në pranga kanë përfunduar A.A., 37 vjeç, i cili kishte rolin e shpërndarësit të letrave, E.H., 32 vjeç i cili kishte rolin e manaxherit të lokalit dhe F. K., 19 vjeç, për veprën penale "Prodhimi dhe shitja e narkotikëve" pasi në lokal u gjet edhe kanabis.

Në përfundim të veprimeve u proceduan në gjendje të lirë edhe 9 persona të tjerë që u gjetën në ambientet e lokalit duke luajtur lojëra fati, për veprat penale ‘Organizimi i lotarive të palejuara’ dhe ‘Moskallëzimi i krimit’.

Sakaq, policia ka sekuestruar një tavolinë pokeri, çipsa dhe letra që shërbenim për lojërat e fatit dhe një sasi lënde e dyshuar kanabis sativa.

Njoftimi i Policisë
Vijon operacioni policor i koduar “Fati i lojërave”. Operacioni i zhvilluar nga Seksioni i Hetimit të Krimit Ekonomik dhe Financiar në DVP Shkodër, për goditjen e veprimtarisë së paligjshme të lojërave të fatit. Arrestohen në flagrancë 3 shtetas, procedohen penalisht 9 shtetas të tjerë. Shpallen në kërkim 2 pronarët e lokalit që ishte përshtatur për organizimin e lojërave të fatit dhe përdorimin e lëndëve narkotike. Sekuestrohen një tavolinë pokeri, çipsa, letra që shërbenim për lojërat e fatit dhe një sasi lënde e dyshuar narkotike cannabis sativa.

Në vijim të punës për goditjen e veprimtarisë kriminale në fushën e lojërave të fatit, specialistët e Seksionit të Hetimit të Krimit Ekonomik dhe Financiar në DVP Shkodër, në kuadër të operacionit “Fati i lojërave”, kanë goditur një tjetër rast të ushtrimit të kësaj veprimtarie të paligjshme. Bazuar në informacionet e marra në rrugë operative se në fshatin Bajzë, Malësi e Madhe, në një lokal, ushtrohej aktiviteti i paligjshëm i lojërave të fatit, menjëherë shërbimet e Policisë kanë ushtruar kontroll në lokalin me pronarë shtetasit L. P. dhe G. P. (vëllezër),  i cili rezultoi  i paregjistruar në organet tatimore.

Gjatë kontrollit në lokal, shërbimet e Policisë gjetën dhe sekuestruan në cilësinë e provës materiale një tavolinë pokeri, çipsa, letra për lojën e pokerit dhe një sasi lënde narkotike canabis sativa.

Në vijim të veprimeve hetimore u arrestuan në flagrancë shtetasit:

A. A., 37 vjeç, i cili kishte rolin e shpërndarësit të letrave dhe E. H., 32 vjeç i cili kishte rolin e banakierit/manaxherit të lokalit, për veprat penale “Organizimi ose ushtrimi i veprimtarive të lojerave te fatit” dhe “Moskallëzimi i krimit”;

F. K., 19 vjeç, për veprën penale "Prodhimi dhe shitja e narkotikëve".

Gjithashtu u bë shpallja në kërkim dhe po punohet për kapjen e pronarëve të lokalit, shtetasve L. P. dhe G. P., për veprat penale “Pastrimi i produkteve të veprës penale ose veprimtarisë kriminale”, “Organizimi ose ushtrimi i veprimtarive të lojerave të fatit”, “Vënia në dispozicion e lokaleve për lojëra të palejuara”, “Përshtatja e lokalit për përdorim droge”, “Fshehja e të ardhurave”, “Ushtrimi i aktivitetit tregtar të paligjshem ose parregjistruar“ dhe “Punësimi i paligjshëm“.

Në përfundim të veprimeve u proceduan në gjendje të lirë edhe 9 shtetas të tjerë që u gjetën në ambientet e lokalit duke luajtur lojëra fati, për veprat penale “Organizimi i lotarive të palejuara” dhe "Moskallëzimi i krimit".

Materialet procedurale në ngarkim të shtetasve të lartpërmendur i kaluan Prokurorisë pranë Gjykatës së Shkallës së Parë Shkodër, për veprime të mëtejshme.

TAG:
• Shkoder