Të gatuajmë me zonjën Vjollca: Kurabie të buta me mollë dhe Sallatë festive (Cheesecake i kripur). Sot edhe quizi "Sa kushton receta?"

Kurabie të buta me mollë

Përbërësit:

2 kokrra vezë

100 gr sheqer

100 gr gjalp (ambienti)

350 gr miell

1 pako pluhur pjekës

2 mollë të mëdha

Sheqer pluhur

Përgatitja:

Në një tas rrahim me rrahëse elektrike 2 vezë të plota. Shtojmë 100 gr sheqer dhe vazhdojmë përzierjen derisa sheqeri të shkrijë plotësisht. Shtojmë gjalpin të zbutur në temperaturë ambienti dhe I trazojmë së bashku derisa të formohet një masë homogjene.

Shtojmë pak nga pak miellin e situr dhe vazhdojmë përzierjen. Pasi të kemi hedhur gjysmën e miellit shtojmë pluhurin pjekës dhe mollët e prera në copa dhe vazhdojmë trazimin në lugë druri pasi kosistenca e brumit fillon dhe rëndohet, kështu vazhdojmë derisa të përfundojë komplet mielli.

Shtrojmë një letër pjekje në një tepsi dhe me ndihmën e një luge gjelle ndajmë kurabiet (do mjaftonte një lugë gjelle e mbushur për 1 kurabie). Vendosim tepsinë në furrë në temperaturë 180 gradë Celsius për 20 minuta. I nxjerrim dhe pasi të ftohen pak, i pudrosim me sheqer pluhur.

 

Sallatë festive (Cheesecake i kripur)

Përbërësit:

200 gr bukë e thekur (intergrale)

100 gr gjalp i tretur

200 gr krem djathi

200 gr salcë kosi

100 gr parmixhan I grirë

50 ml qumësht

6 gr xhelatinë

60 gr rukola

150 gr domate qershi

Rigon

Kripë, piper i zi

Vaj ulliri

Përgatitja: Grijmë bukën e thekur dhe shtojmë gjalpin e tretur në temperaturë të ulët sa të lëngëzohet dhe I përziejmë mirë së bashku. E vendosim në një tepsi keku dhe e ngjeshim mirë bazën e sallatës.

Vendosim xhelatinën në ujë të ftohtë. Pasi e shohim që xhelatina është zhytur, vendosim qumështin të ngrohet dhe shtojmë xhelatinën të shkrijë.

Në një tas vendosim kremin e djathit, salcën e kosit, grijmë shumë imët rukolan dhe ia shtojmë brenda në krem duke ruajtur disa gjethe për dekor. Shtojmë parmixhanin, qumështin me xhelatinën e shkrirë dhe i përziejmë mirë të gjithë përbërësit.

Shtojmë kremin e përgatitur mbi bazën, e nivelojmë dhe e fusim në frigorifer për 2 orë.

Ndajmë domatet në dysh, me pak vaj i kalojmë për 5 minuta më tigan, shtojmë rigon dhe kripë. Nxjerrim sallatën tortë të kripur nga frigoriferi dhe pasi shtojmë disa gjethe rukola, e zbukurojmë me domate qershi.

D.M./b.ha./Shqiptarja.com
Komento