Të gatuajmë me zonjën Vjollca/ Lakër me mish të grirë e oriz dhe Tortë me biskota dhe kungull

Lakër me mish të grirë dhe oriz

Përbërësit:

1.2 kg lakër e bardhë

2 qepë mesatare

100 gr pançetë

400 gr mish i grirë

1 filxhan kafeje oriz

Kripë dhe piper i zi

Dafinë

1 lugë gjelle salcë

Vaj ulliri

2 lugë gjelle uthull

Përgatitja:

Pastrojmë lakrën, e shpëlajmë atë dhe i japim një valë për 5 minuta me kripë dhe 2 lugë gjelle uthull. E largojmë dhe ujin e derdhim.

Në një tigan të thellë ngrohim vajin, qepën e grirë shumë hollë, shtojmë pançetën dhe i kavardisim së bashku me qepën derisa panceta të nxjerrë yndyrën dhe të bëhet krokante. Shtojmë mishin e grirë dhe i trazojmë së bashku derisa mishi të thërmohet dhe të skuqet pak. Shtojmë orizin dhe vazhdojmë përzierjen. Rregullojmë shijen me kripë, pipet të kuq, piper të zi, 1 lugë gjelle salcë, i përziejmë së bashku dhe shtojmë një gotë ujë. I lëmë të ziejnë pak.

Në një tenxhere vendosim në bazë 1/3 e lakrës të prerë si për gjellë. Vendosim mbi të si shtesë ½ e kimës së përgatitur. Përsëri shtojmë lakrën. Vendosim kimën e mbetur dhe e mbulojmë me lakër. Shtojmë përsëri 1 gotë ujë por jot ë mbulojmë nivelin e lakrës, port ë jetë baraz me lakrën. Ulim temperaturën dhe e lëmë të ziejë dhe për 20 minuta të tjera. E fikim dhe e lëmë të pushojë 15 minuta. E servirim të shoqëruar me 1 fetë limon.

Tortë me biskota dhe kungull

Përbërësit:

1 kg kungull të verdhë

1.5 gota uji sheqer (225 gr)

1 gotë uje (200 ml)

3 pako biskota (pa yndyrë)

3.5 gota qumësht (700 ml)

3 lugë gjelle miell

1/2 gotë sheqer

1 pako vanilje

150 gr arra

Përgatitja:

Qërojmë kungullin, e presim tulin e tij në kubikë dhe e vendosim në një tenxhere ku do të shtojmë 1.5 gotë sheqer, 1 gotë ujë. Vendosim kapakun dhe e lëmë kungullin të ziejë derisa të jetë zbutur plotësisht. Vendosim copat e kungullit në blender dhe e kthejmë në pure. ( E lëmë mënjanë të ftohet).  

Ndërkohë vendosim qumështin në tenxhere, shtojmë në të 3 lugë gjelle miell, gjysmë gote sheqer, e përziejmë mirë dhe e lëmë të ziejë derisa të na formohet një masë e lidhur, shtojmë vaniljen dhe pasi të marrë një valë e largojmë nga zjarri.

Në një tepsi xhami vendosim në të gjithë sipërfaqen biskotat. Shtojmë mbi të gjithë sipërfaqen e biskotave kremin muhalebi duke e niveluar mirë. Sipër kremit vendosim sërish biskota.Mbulojmë rreshtin e dytë të biskotave me purrenë e kungullit dhe e nivelojmë mirë të gjithë sipërfaqen Kështu veprojmë edhe 2 herë të tjera: një herë me muhalebinë dhe një herë me purenë e kungullit.

Grijmë arrat në copëza të dukshme dhe mbulojmë komplet sipërfaqen e tortës. Mbulojmë tepsinë me celefon dhe e vendosim në frigorifer për 2 orë. Më pas e shërbejmë.

D.M./b.ha./Shqiptarja.com

TAG:
• rrezedielli
• zonjavjollca
• Lakër me mish të grirë e oriz
• Tortë me biskota dhe kungull