Të gatuajmë me zonjën Vjollca/ Mish turli me perime dimri (në furrë) dhe Ëmbëlsirë me mollë dhe qumësht

Mish turli me perime dimri (në furrë)

Përbërësit:

600 gr mish

2 qepë

3 karrota

3 speca, 1 spec pikant

8 thelpinj hudhra

2 finok

4 patate

perime të tjera sipas dëshirës

vaj ulliri

kripë dhe piper i zi

1 lugë gjelle salcë

Përgatitja:

Presim mishin në racione ose kubikë sa një kafshatë, sipas preferencës suaj.

Në një tenxhere me pak vaj kaurdisim mishin sa të zverdhet pak, shtojmë ujë të valuar dhe e lëmë të ziejë për 30 minuta.

Të gjitha perimet i presim në madhësinë që ju dëshironi. Pasi të kalojnë 30 minuta largojmë mishin nga tenxherja duke lënë në të vetëm lëngun.

Shtojmë në tenxhere të gjitha perimet, duke përjashtuar specat dhe hudhrat. I ziejmë 2-3 minuta. Vendosim tepsinë ku kemi hedhur pak vaj të ngrohet në furrë dhe shtojmë në të fillimisht hudhrat, specat dhe copat e mishit. Mbi to shtojmë perimet e ziera. Në fund pasi kemi larguar perimet, shtojmë për të zierë patatet, dhe ato 3-4 minuta.

Pasi i largojmë me sitë,i vendosim dhe ato mbi perimet e tjera në tepsi, i spërkatim me pak vaj, kripë dhe rozmarinë.

Nga lëngu i tenxheres marrin 2 garuzhde, shkrijmë në të salcën dhe e spërkasim mbi perime.

Vendosim tavën në furrë, në temperaturë 200 gradë Celsius, për 35 minuta.

 

Ëmbëlsirë me mollë dhe qumësht

Përbërësit:

3 mollë

1 pako biskota pa yndyrë

100 gr arra

1 lugë çaji kanellë

40 gr gjalp i tretur

400 ml qumësht

2 lugë gjelle niseshte

1 lugë gjelle miell

70 gr sheqer

vanilje

100 ml pana ëmbëlsire

Përgatitja:

Lajmë mollët, i qërojmë dhe i grijmë ato në rende ( nga ana më e trashë e rendes.)

Shtojmë në tasin ku kemi grirë mollët një pako biskota të thërrmura, 100 gr arra të copëtuara, gjalpin e tretur, kanellën dhe I përziejmë me dorë derisa të na formohet një masë e lidhur si brumë.

Me kupën e akullores marrim nga masa e brumit dhe i vendosim në një tepsi porcelani kupa-kupa  njëra pas tjetrës, (8-10 kupa), por mund të bëjmë dhe një bazë shtrese me brumin e përgatitur.

Në një tigan salce ngrohim qumështin, sheqer, niseshte, miell të holluar më parë me qumësht të ftohtë, e vendosim përësi në zjarr për të marrë valë dhe kur masa të trashet dhe të valojë, e largojmë nga zjarri.

E lëmë të ftohet pak duke e trazuar me tel dore vazhdimisht derisa muhalebia të vaket. Më pas me një lugë mbulojmë topthat me mollë dhe arra dhe e lëmë të ftohet. Para se ta shërbejmë e spërkatim sipër me arra apo fistekë të grirë.

D.M.//Shqiptarja.com

TAG:
• rrezedielli
• zonjavjollca