POP 5

Lajmet më të lexuara të 5 minutave të fundit

Kultura

‘Të lirë’, Lea Ypi vlerësohet me çmimin ‘Lumo Skëndo’: Lidhja mes librit tim dhe veprës së Mid’hat Frashërit dhe ndryshimi tek orientimi politik

Mes 5 finalistëve, çmimi “Lumo Skëndo” i është dorëzuar shkrimtares Lea Ypi për librin “Të lirë”. Shkrimtarja shpreh mirënjohjen për vlerësimin dhe rrëfen ndasitë e të përbashkëtat me shkrimtarin Mid’hat Frashëri.

I rikthyer nga Qendra Kombëtare e Librit dhe leximit, me synimin për të vendosur një institucion gjykimi për veprën më të mirë publicistike, eseistike a studimore, çmimi “Lumo Skëndo” iu dorëzua shkrimtares e pedagoges së Teorisë Politike në Londër, Lea Ypi, për librin “Të lirë”, që përsiatet mes autobiografisë letrare e filozofisë politike.

“Ajo që gjithashtu më ngroh jashtëzakonisht është lidhja midis temës së librit dhe veprës së Lumo Skëndos. Libri ka si temë konceptin e lirisë dhe si ide kryesore faktin që liria ndonjëherë na shfaqet si iluzion, ndonjëherë na shfaqet si ideal, asnjëherë si realitet institucional në shoqëritë në të cilat jetojmë”, u shpreh shkrimtarja Lea Ypi.

Ky libër u përzgjodh nga juria e drejtuar nga studiuesi Uran Butka me motivacionin “për vlerat e shquara në trajtesën origjinale, artistike e filozofike të konceptit të lirisë në kohën e diktaturës komuniste dhe të tranzicionit demokratik në Shqipëri, nëpërmjet kujtimeve të fëmijërisë dhe adoleshencës, dhënë me vërtetësi, sinqeritet, ndjeshmëri, humor, meditim politik e filozofik bashkëkohor”.

“Pavarësisht se Lumo Skëndo ka marrë një orientim krejt tjetër nga i imi, unë mendoj që Shqipëria është një shtet shumë i vogël dhe me një traditë intelektuale shumë të shkurtër, që ta ketë luksin e këtyre ndarjeve politike, që të pengojnë ecurinë e përbashkët intelektuale”, shtoi më tej Ypi.

Mes 50 veprave të gjykuara nga juria, Ypi kryesoi mes 5 finalistëve, ku në garë ishin shkrimtarët Fatos Lubonja me “Jetë burgu”, Fatmir Toçi me “Arbëreshët”,  Rubens Shima me “Posteri shqiptar” dhe Kujtim Shala me librin  “Zbulimi i Zef Pllumit”.

“Për të nxjerrë saktësisht fituesin u votua disa herë gjatë procesit dhe përfundimisht fituesja rezultoi Lea Ypi me librin ‘Të lirë”, por edhe të tjerët që  u përmendën këtu janë fitues”, u shpreh studiuesi Uran Butka, drejtor i Institutit “Lumo Skëndo”

Çmimi synon të  sjellë në vëmendje kontributin e shumanshëm si publicist shkrimtar e albanolog të Mid’hat Frashërit dhe ka vlerën monetare prej 200 mijë lekësh.

SI.E./B.K./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    23 Dhjetor, 23:33

    Opozita proteston duke paralizuar 3 orë Tiranën, si e vlerësoni?

Lajme të tjera



×

Lajmi i fundit

Krishtlindjet/ Shqiptarët për Report Tv: Gëzuar, mbarësi e harmoni për të gjithë

Krishtlindjet/ Shqiptarët për Report Tv: Gëzuar, mbarësi e harmoni për të gjithë

24 Dhjetor, 23:29