Të përndjekurit,456 trashëgimtarët
që duhet të dorëzojnë dokumentet

Ministria e Financave ka publikuar një tjetër listë me ish të përndjekurit politike të cilët duhet të dorëzojnë dokumentat për të marrë dëmshpërblimin. Bëhet fjalë për trashgimtarët të cilët ende nuk kanë dorëzuar të gjitha dokumentat.

Ministria e Financave thotë se një pjesë e trashgimtarëve kanë problemeve me dokumentat, duke filluar që nga certifikatat, por edhe dokumenta të tjera që nuk janë në dosje. Janë 456 trashgimtarë të cilët nuk kanë marrë këstin e parë apo të dytë dhe që duhet që brenda 3 muajve të dorëzojnë dokumentat pranë sektorit të dëmshpërblimeve, në të kundërt humbasin marrjen e këstit brenda 2017-së.

Pagesa do të kryhet për të gjithë trashëgimtarët e ish të dënuarit politik. Trashëgimtarët duhet të dorëzojnë dokumentet e kërkuara sipas dispozitave  ligjore në fuqi. Të gjithë trashëgimtarët e ish të dënuarit duhet të sigurohen pranë bankës në të cilën kanë hapur llogarinë, që llogaria e tyre është aktive.

Në rast se llogaria nuk është aktive, shuma e dëmshpërblimit kthehet mbrapsht në buxhet duke sjellë vonesa dhe ndërlikime të panevojshme.

Kur kemi ndryshim të identitetit, Emër/Mbiemër, apo në rastet kur në certifikatë ndryshon emri ose mbiemri, qoftë edhe me një gërmë të vetme në krahasim me dëshminë e trashëgimisë apo prokurës, kartës së identitetit dhe çdo dokumenti tjetër të nevojshëm, duhet medoemos që në të gjitha dokumentet emrat të jenë të njëjtë me atë që është shkruar në certifikatën e lëshuar nga gjendja civile.

Në raste se ka transkriptime të gabuara gjatë kohës nga një certifikatë e një periudhe të caktuar, atëherë këto ndryshime duhet të pasqyrohen brenda formatit të certifikatës apo edhe të një vërtetimi të veçantë të lëshuar nga zyra e gjendjes civile.

Në rastet e ekzekutimeve kapitale pa gjyq, është i domosdoshëm një vendim fakti gjykate që vërteton vdekjen, plus një certifikatë negative të lëshuar nga zyra e gjendjes civile.

Në rastet kur për arsye të njohura në gjendjen civile nuk ekzistojnë dokumente të periudhës përkatëse dhe ky fakt vërtetohet nga gjendja civile, i interesuari është i detyruar të bëj një gjyq fakti, të cilin edhe në këtë rast si në pikën më lart, duhet ta shoqërojë me një certifikatë negative.