Mamurras, patrulla konfliktohet me 4 persona, polici nxjerr armën dhe plagos 2 kolegët e 1 të përfshirë! 7 të shoqëruar nga fisi i ish-deputetit Mhill Fufi

Efektivët e forcave "Shqiponja" kanë bërë të mundur shoqërimin e dy personave në ambientet e Spitalit të Traumës në Tiranë, të cilët dyshohet se kanë lidhje me ngjarjen në Mamurras, ku u plagosën 2 policë dhe Nikoll Vorfi (Fufi). Të shoqëruar janë Alfred Prenga dhe Gjon Fufi. Ky i fundit është vëllai i të plagosurit Nikoll Vorfi (Fufi).

Ky është Ilir Zeka njëri prej efektivëve të policisë që ka mbetur i plagosur aksidentalisht nga kolegu i tij, pas përplasjes së tyre me 4 persona të tjerë në Mamurras.

Dy efektivët e policisë që mbetën të plagosur në Mamurras janë dërguar në Spitalin i Traumës. Report Tv mëson se Flamur Lleja dhe Ilir Zekaj, fillimisht ishin dërguar në një spital privat, por më pas u sollën te Trauma. Ndërkohë, i pranishëm është edhe Drejtori i Departamentit të Sigurisë në DPPSH, Gjovalin Loka. (Gruaja që shihet në video, teksa qan, nuk ka lidhje me 2 efektivët e plagosur). 

Efektivë të Forcave Shqiponja kanë mbërritur në spitalin e Traumës ku ndodhet i shtruar Nikoll Fufin (e ka ndryshuar mbiemrin në Vorfi), i cili mbeti i plagosur si pasojë e të shtënave me armë në Mamurras.

Policia jep njoftimin zyrtarë për ngjarjen në Mamurras. Patrulla u përfshi në konflikt, 1 nga policët plagosi 2 kolegë dhe një nga të përfshirët në sherr.

"Rreth orës 13:35, në qendër të qytetit të Mamurrasit disa persona janë konfliktuar me punonjësit e Policisë të Patrullës së Përgjithshme që ishte me shërbim në qytet.

Një nga punonjësit e Policisë ka nxjerrë armën e shërbimit dhe ka qëlluar dhe për pasojë janë plagosur dy kolegët e tij, I. Z. dhe F. LL., si dhe një nga personat e përfshirë në konflikt, shtetasi N. V., të cilët ndodhen jashtë rrezikut për jetën.

Është krijuar menjëherë një grup i posaçëm hetimor, i përbërë nga Specialistë të Hetimit në Shërbimin për Çështjet e Brendshme dhe Ankesat në Ministrinë e Brendshme dhe Specialistë të Hetimit në Drejtorinë Vendore të Policisë Lezhë, dhe nën drejtimin e drejtuesit të Prokurorisë së Rrethit Gjyqësor Kurbin, vijon puna intensive në vendin e ngjarjes, duke administruar çdo provë dhe po marrin dëshmi, me qëllim sqarimin në mënyrë të plotë dhe të gjithanshme të kësaj ngjarjeje.

Informacion më të detajuar do të japë Shërbimi për Çështjet e Brendshme dhe Ankesat, në përfundim të veprimeve të para hetimore", njofton Policia. 

Autorët që qëlluan policët u shoqëruan mëngjesin e sotëm në polici dhe më pas u liruan. Mëngjesin e sotëm u shoqëruan 3 vëllezërit Gentian Fufi, Besmir Fufi (Gjoni) dhe Rudolf Fufi. Më pas rreth orës 14:00 u përplasën me policët. I përfshirë në këtë ngjarje është edhe  Nikoll Fufi (Vorfi) i cili mbeti i plagosur nga përplasja.

Nikoll Vorfi (Fufi) është njëri nga autorët e përplasjes me armë zjarri në Mamurras me dy efektivët e policisë Flamur Lleja dhe Ilir Zekaj. Fufi ka mbetur edhe vetë i plagosur nga përplasja dhe ndodhet në spitalin e Traumës në Tiranë. Në makinë bashkë me të kanë qenë edhe 3 persona të tjerë.

Report Tv mëson se lidhur me plagosjen e 3 personave në Mamurras mes tyre 2 policë janë shoqëruar në polici 7 persona nga fisi i ish deputetit Mhill Fufi. 
Ata janë në komisariatin e Laçit.

Forcat të shumta policie dhe RENEA kanë mbërritur në Mamurras, pas plagosjes me armë të dy efektivëve dhe një qytetari mesditën e sotme.

Detaje të reja zbardhen nga plagosja e 2 efektivëve të policisë në Mamurras.

Efektivët e policisë kanë qenë në patrullim në qendër të qytetit dhe kanë tentuar të ndalojnë makinën e autorëve për verifikim. Këta të fundit nuk i janë bindur urdhërit për kontroll dhe janë përplasur fizikisht me policët, me pas sherri ka degraduar në përdorimin e armëve.

Sipas të dhënave ata janë identifikuar autorët por emrat nuk bëhen ende me dije. Ata kishin dhe armë me vete. Në vendin e ngjarjes ndodhen forca të shumta policie, ata të RENEAS dhe një autoblind. Po bëhet edhe kontroll i kamerave te sigurisë së bizneseve.

Dy policët e mbetur të plagosur sot janë qëlluar nga një makinë të cilën e kishin ndaluar teksa ishin në krye të detyrës.

Nga shkëmbimi me armë zjarri  në Mamurras mes policisë dhe personave të tjerë, mbetën të plagosur tre persona, dy efektivë dhe një qytetar kalimtarë. Nga pamjet e siguruara nga Report Tv shihet se plumbat gjatë shkëmbimit të zjarrit kanë prekur edhe një makinë të parkuar në zonë. Makina ka marrë goditje nga dy plumba në pjesën e parakolpit.

Pas përqasjes me armë zjarri në Mamurras ku kanë mbetur të plagosur edhe 2 policisë të Komisariatit të Kurbinit janë nisur drejt vendngjarjes nga Tirana Forca të Ndërhyrjes së Shpejtë.

Drejt vendngjarjes gjithashtu është nisur edhe Drejtori i Përgjithshëm i Policisë së Shtetit, Ardi Veliu dhe drejtori i Policisë Kriminale, Tonin Vocaj.

Report Tv ka siguruar pamjet nga vendi i ngjarjes në Mamurras ku pas shkëmbimit të zjarrit kanë mbetur të plagosur 2 policë dhe një qytetar.

Në qendrën e Mamurrasit janë plagosur me armë zjarri punonjësit e policisë të patrullës Flamur Lleja dhe Ilir Zekaj dhe një qytetar, Nikoll Vorfi.