Temperaturat nën 0, në Vlorë vijon pezullimi i lundrimit! Në aksin Kukës-Shishtavec kërkohet pajisja me zinxhirë për makinat! Rama: Kini kujdes

Kryeministri Edi Rama ka reaguar për temperaturat e ulëta që kanë prekur vendin. Rama këshillon qytetarët të kenë kujdes.

“Vendi është përfshirë nga temperatura shumë të ulëta.

Kujdes! Përdorni goma dimri në zonat ku ka borë dhe ngrica, respektoni sigurinë rrugore dhe ulni shpejtësinë.”- thuhet në njoftim.

 Pogradeci është tërësisht i ngrirë për shkak të temeperaturave të ulëta që kanë prekur vendin. Siç shihet nga pamjet e siguruara nga Report Tv, liqeni i Pogradecit, madje edhe mjetet janë tërësisht të ngrira.

Temperaturat nën zero në Kukës kanë krijuar ngrica dhe probleme ditën e djeshme. Por, po vazhdon të punohet për kriposjen e rrugës në mënyrë që të shmangen aksidentet. Rrugët janë të qarkullueshme.

Ulja e ndjeshme e temperaturave  në 24 orët e fundit ka bërë që në pjesën malore të qarkut Kukës, në lartësinë mbi 800 metra, të ketë  reshje dëbore dhe ngrica të shoqëruara edhe me erë. Komisioni I Mbrojtjes Civile I Prefekturës Kukës, njofton se furnizimi me energji elektrike është normal në gjithë territorin e Qarkun Kukës, përveç Nj.Ad Ujmisht, Bushtricë dhe Grykë- Çajë, Bashkia Kukës, fshatrat  Kishaj dhe Pogaj të Nj.Ad  Gjinaj, fshatrat Cahan dhe Mujaj-Dajç të Nj.Ad Qendër Krumë, fshatrat Vlahen, Perollaj, Helshan dhe Kosturr të Nj.Ad Golaj Bashkia Has,Nj.Ad Lekbibaj, dhe fshatrat Zogaj, Kepenek, Kam të Nj.Ad Bytyq Bashkia Tropojë. Rrugët nacionale dhe bashkiake janë të qarkullueshme normalisht dhe nga subjektet kontraktore po punohet gjatë gjithë kohës për pastrimin, kriposjen dhe mbajtjen funksionale të rrugëve që kanë kontratë. Për shkak të borës e ngricave probleme të konsiderueshme pati të dielën në zonën e Shishtavecit në Kukës. Temperaturat atje arrijnë në -10 gradë ndërsa rruga që lidh këtë zonë me doganën e Shishtavecit, është bollkuar disa herë nga erërat e forta.Megjithatë autoritetet njoftojnë se rruga Kukës- Shishtavec dhe ajo e doganës është e hapur dhe qarkullimi kryhet pa probleme.Për drejtuesit e mjeteve që kalojnë në këtë aks rekomenadiohet përdorimi i gomave dimërore dhe pajisja me zinxhirë.

Kryetari i Bashkisë së Tiranës, Erion Veliaj, u bën thirrje qytetarëve që të tregohen të kujdesshëm këtë javë kur temperaturat parashikohen të jenë nën zero. Përmes një postimi në rrjete sociale, Veliaj u kërkon qytetarëve që për çdo emergjencë ose nëse shohin persona të pastrehë të telefonojnë në nr. 112.

Bashkia e Tiranës ka marrë të gjitha masat për strehimin e këtyre të fundit.

“Java që vjen parashikohet me temperatura të ulëta, nën zero. Ju lutem, tregoni kujdes! Për çdo emergjencë apo nëse shihni persona të pastrehë a në nevojë, telefononi 112 ose kontaktoni me Qendrat Sociale të Tiranës”, shkruan Veliaj.