Tension në prezantimin e projektit të Lungomares, banorët njoftohen me vonesë (VIDEO)

Në ambientet e Fondit Shqiptar të Zhvillimit në Vlorë u zhvillua takimi për prezantimin e vazhdimit të projektit të Lungomares nga zona e Tynelit në Ujë të Ftohtë në drejtim të Rradhimës.

Takimi ka nisur mes polemikave, pasi banorët e zonës janë njoftuar 15 minuta me vonesë për nisjen e prezantimit të projektit.

Ndërkohë që projekti prezantohej, banorët prisnin poshtë ndërtesës pa e ditur, duke nxitur irritimin e tyre.

“Kemi tre muaj që bëjmë kërkesa me shkrim dhe nuk na lajmëroni”, është shprehur njëri nga banorët.

Mbledhja për shumë minuta ka vazhduar mes tensioneve midis banorëve, përfaqësuesve të bashkisë së Vlorës si dhe përfaqësuesve të fondit shqiptar të zhvillimit.

Armando Cakrani, përfaqësuesi ligjor i banorëve të cilët preken nga projekti i Lungomares, ka thënë se është absurde të prezantosh projektin e zhvillimit të zonës ndërkohë që mungojnë banorët.

Sipas  avokatit Cakrani zgjidhja që banorët kërkojnë është të bëhen dëgjesa publike në zonën e tyre, të merren mendimet e banorëve dhe më pas të hartohet një projekt që nuk skualifikon pa të drejtë pronën e tyre.

“Mbledhja për prezantimin e projektit për realizimin e fazës së dytë të Lungomares nga zona e tynelit deri në Rradhimë nuk arriti të përfundojë,  pasi banorët kundërshtuan zhvillimin e saj, po prezantohet një projekt fiktiv pa marrë parasysh mendimin dhe ankesat e banorëve. Ne po prisnim poshtë shkallëve dhe kur hymë shikojmë që kishte filluar", është shprehur Cakrani.

Mbledhja për prezantimin e projektit nuk arriti të përfundojë, pas situatës tensionuese me banorët.

TAG:
• tensione
• Lungomare
• Banorët