Duket se protesta që po zhvillohet prej tre muajsh në Tiranë, është ndarë përfundimisht në 2 grupe.

Përçarja mes protestuesve është thelluar edhe më tej, pas përplasjeve fizike të ndodhura gjatë javëve të fundit.

Sot në bulevard kanë qenë prezente dy grupime, pra protestuesit nuk kanë qenë të grumbulluar si zakonisht para godinës së Kryeministrisë.

Gjatë mbrëmjes, njëri grupim qëndronte në vendin e zakonshëm ku mbahen fjalimet para godinës së Kryeministrisë, ndërsa grupimi tjetër, i drejtuar nga Visuar Dalipi, i cili njihet ndryshe edhe si ‘Banka e Fundit’, është vendosur në kryqëzimin e urës së Lanës, duke bllokuar edhe qarkullimin e automjeteve.

Gjithashtu, protestuesit kanë goditur automjetin e një qytetari te kryqëzimi i urës së Lanës pasi ai u kërkoi të lironin rrugën.

Përçarja mes protestuesve vjen pasi ditën e djeshme protestuesit u përplasën me efektivët e Policisë dhe deputetët para Kuvendit të Shqipërisë, duke hedhur ndaj tyre edhe një sasi të madhe vezësh.

Rendit zhvillimet sipas orarit:
Ora 22:24
Kërkoi t'i lironin rrugën, protestuesit godasin makinën e qytetarit (VIDEO)

 

Një tjetër incident është regjistruar gjatë protestës së mbrëmjes në Tiranë, ku një qytetar i cili ndodhej në automjetin e tij dhe po përpiqej të kalonte te kryqëzimi i Urës së Lanës, është përballur me protestuesit. Ai u ka kërkuar t'i lirojnë rrugën, por situata është tensionuar dhe disa prej tyre i janë afruar duke goditur mjetin.

Incidenti vjen në një moment kur protestuesit kanë tentuar në disa pika të kryeqytetit të bllokojnë qarkullimin.

P.J/Shqiptarja.com