Negociatat/ Gati mbyllja e 3 kapitujve, KE ia çon Këshillit Evropian, Costa: Jeni në rrugën e duhur! Rama: 100% dakordësi me BE

Presidenti i Këshillit Evropian Antonio Costa në konferencën e përbashkët me kryeministrin Edi Rama, tha se Komisioni Evropian i ka propozuar Këshillit, mbylljen e 3 kapitujve me Shqipërinë.

Costa: Unë mendoj që ne mund të punojmë qartazi se jemi në rrugën e duhur. Kemi krijuar grupin e punës për të filluar përpilimin e traktatit të anëtarësimit të Malit të Zi. Kemi kushtet për të filluar mbylljen e disa kapitujve. Dje Komisioni i ka sjellë Këshillit propozime për mbylljen e 3 kapitujve.

Po ecet përpara dhe këtu duhet të përqendrohemi. Shqipëria ka një synim shumë ambicioz për përfundimin e negociatave në fund të vitit 2027. Jemi në qershor 2026 dhe kemi edhe 1 vit e gjysmë përpara, ndaj duhet të punojmë fort. A është e vështirë? Po. A është e pamundur? Jo.

Presidenti i Këshillit Europian, Antonio Costa në konferencë me kryeministrin Edi Rama vlerësoi progresin e Shqipërisë në rrugën drejt anëtarësimit në Bashkimin Europian. Me mbajtjen e konferencës ndërqeveritare, Costa tha se Shqipëria i ka përmbushur piketat e ndërmjetme për grupkapitullin e parë të çështjeve themelore.

Costa tha se Shqipëria ka hyrë në një fazë vendimtare të negociatave, ndërsa theksoi se lufta kundër korrupsionit, krimit të organizuar dhe forcimi i institucioneve demokratike mbeten kyçe për anëtarësimin në BE.

“Kënaqësi që të vij në Tiranë. Sot përgëzoj vendosmërinë e Shqipërisë për tu bërë pjesë e BE dhe kjo në veçanti rolit të tuaj Edi dhe angazhimit tuaj personal në këtë proces. Javën e shkuar, ne e pamë ecurinë e Shqipërisë dhe i ka përmbushur piketat e ndërmjetme për grupkapitullin e parë të çështjeve themelore. Shtete anëtarë kanë kuptuar dhe kanë vlerësuar angazhimin e Shqipërisë në rrugëtimin drejt BE. Ky është fillimi i një faze impenjative. Këto reforma, më shumë se sa kushte, janë zgjedhje nga ana juaj për të ndërtuar institucione të forta demokratike, angazhim për ruajtjen e një pushteti gjyqësor të pavarur, janë themelore. Përshpejtoni luftën kundër krimit dhe korrupsionit. BE është partneri më i besueshëm i BE dhe Shqipërisë. Është investuesi kryesor dhe parteneri më i rëndësishëm tregtar. BE mbështet ecurinë e Shqipërisë, si qasja që kanë në SEPA dhe po integroheni në tregun e BE. Zgjerimi është domosdoshmëri gjeostrategjike për Europën, investim tek paqja, stabiliteti. Me kërshëri prej të ritakohemi shumë shpejt në samitin BE-Ballkani Perëndimor të premten në Tivat. Samiti do jetë shenjë e qartë e vendosmërisë për ta çuar më tej bashkëpunimin tonë dhe për të ecur më tej”, tha Costa.

Presidenti i Republikës, Bajram Begaj, priti këtë të hënë në Tiranë Presidentin e Këshillit Evropian, Antonio Costa, në një takim ku në fokus ishte ecuria e Shqipërisë në rrugën drejt anëtarësimit në Bashkimin Evropian.

Gjatë bisedës, u vlerësua progresi i Shqipërisë në procesin e negociatave me BE-në, përfshirë zhvillimin e Konferencës së 8-të Ndërqeveritare BE-Shqipëri, e cila konfirmoi përmbushjen e kritereve ndërmjetëse për Kapitullin 1 “Themeloret”.

Begaj i përcolli Costës vendosmërinë e Shqipërisë për të përmbushur objektivat për mbylljen e grupkapitujve brenda vitit 2027.

“Reforma në drejtësi, forcimi i shtetit të së drejtës, lufta kundër korrupsionit dhe krimit të organizuar, si dhe përputhja e plotë me Politikën e Përbashkët të Jashtme dhe të Sigurisë së BE-së dëshmojnë se Shqipëria është një partner i besueshëm dhe vullnetplotë për të qenë pjesë e familjes evropiane”, u shpreh Presidenti.

Kreu i Shtetit theksoi se zgjerimi i Bashkimit Evropian në Ballkanin Perëndimor është një investim strategjik për paqen, sigurinë dhe stabilitetin e kontinentit, ndërsa falënderoi Antonio Costan për prioritizimin e procesit të zgjerimit gjatë mandatit të tij.

“Shqipëria është mirënjohëse për mbështetjen e fuqishme që Këshilli dhe Komisioni po i japin vendit tonë në këtë rrugëtim. Shqipëria do të vijojë me ritëm të shpejtë dhe rezultate konkrete në rrugën e saj drejt anëtarësimit në Bashkimin Evropian. Jemi të bindur se reformat nuk i bëjmë vetëm si kërkesa të BE-së, por mbi të gjitha për qytetarët tanë”, deklaroi Begaj.