'Revoltë' pas përjashtimeve/ Demokratët i shkojnë në seli, Berisha i shpërfill! Burgija: Noka shkeli statutin, u eksitua nga protestat

TIRANË- Dy demokratët që u përjashtuan nga grupi i PD në Këshillin Bashkiak të Durrësit, Dritan Burgija dhe Arlind Boshku, kundërshtojnë vendimin që mban firmën e Flamur Nokës. Bashkë me një grup demokratësh të Durrësit të revoltuar nga kjo vendimmarrje, Burgija u shfaq në selinë e PD-së ku dorëzoi pranë Komisionit të Apelimit ankimin ndaj vendimit për përjashtim, që u mor pasi ata mbështetën publikisht foltoren e organizuar nga Ervin Salianji.

Burgija tha para gazetarëve se vendimi i përjashtimit shkel statutin. Në kërkesën e tyre dërguar Komisionit të Apelimit, Burgija dhe Boshku e akuzojnë Nokën se ka qenë në lajthitje në momentin që ka firmosur vendimin. Sipas tyre, Noka ka marrë kompetencat e Kryesisë dhe se kjo vendimmarrje është marrë nga eksitimi i tij për shkak të suksesit të Protestës Kombëtare të zhvilluar më 22 mars.

“Ne kërkuesit jemi të bindur që Sekretari i Përgjithshëm ka qenë në lajthim pasi nuk ka pasur të qartë kompetencat e tij dhe se ka menduar që mund të zëvendësojë kompetencat e organeve kolegjiale apo të Kryesisë së PDSH-së. Ne jemi të bindur që kjo vendimmarrje ka ardhur si pasojë e një lajthimi momental të Sekretarit të Përgjithshëm i cili i eksituar nga suksesi i Protestës Kombëtare të zhvilluar nga PDSH në datën 22.03.2026 ka menduar që mund të marrë kompetencat e Kryesisë apo të Kryesisë së Degëve të PDSH-së dhe vetë ky me gjykimin e tij (i eksituar nga suksesi) mund të vendos se kush do të largohet nga strukturat e PDSH-së", thuhet në kërkesë. 

LEXO EDHE:
Bamir Topi ‘sulmon’ ashpër kryetarin e PD: Me përjashtimin e Salianjit tregoi hapur që është komunist! Berisha bën autogola në shërbim të Ramës, i ka ardhur fundi politik

Në mungesë të ballafaqimit me Sali Berishën, i cili i injoroi thirrjet poshtë zyrës së tij, Burgija rrëzoi pretendimet e PD se kanë punuar për kandidatët e PS më 11 maj apo për përfitime personale. Përjashtimi, për ta e ka arsyen krejt gjetkë, te mbështetja që i dhanë Ervin Salianjit. 

“Është gënjeshtër shumë e madhe. I bëmë ftesë Berishës të ngjitemi lart dhe të na vër në dijeni se për çfarë  e ka marrë aktin e përjashtimit, në daljen e fundit ka thënë që kemi votuar buxhetin e Sakos. Ja ku e keni qëndrimin tim në votimin për buxhetin e bashkisë Durrës”, vijoi Burgija.

Sali Berisha jo vetëm që nuk i priti në takim, por një koment mbi ardhjen e demokratëve të Durrësit në seli e shmangu edhe në fjalën e tij para mediave, në nisje të mbledhjes së grupit parlamentar.

Për të kompesuar këto përjashtime, e vetmja porosi që kishte, ishin anëtarësimet e reja në parti, që në klimën e përplasjeve në prag të luftës për karrige duket gjithnjë e më e vështirë.

Pjesë nga prononcimi i Dritan Burgijës

Do dorëzojmë kërkesën pranë Komisionit të Apelimit me insistimin e këtyre demokratëve, janë drejtues strukturash, pasi unë person dhe lidership këtu u detyrohemi shpjegime për sa ka ndodhur me rastin e përjashtimin tim dhe kolegut tim Boshku. Kam qenë këtu para jush edhe në 2021-shin, për të njëjtën gjë pasi në atë kohë dilja dhe kërkojë dinjitetin e Berishës pasi u përjashtua nga partia. Sot jam këtu para jush për të marrë shpjegime dhe për të kërkuar dinjitetin tim. Nuk është çështje pozite, por dinjiteti, në kërkesë kam shpjeguar se çdo resht i vendimit është antistatutor. Kam kërkua ballafaqim me lidershipin këtu, kam kërkuar fakte dhe prova që çuan në çuan në vendimin e shkarkimit tim. Kërkojmë nëse është e mundur, të bëjmë ballafaqim me zotin Berisha. Jemi rënduar shumë me akuzat, janë akuza të rënda për mua dhe kolegun tim, mos të dalim njëri nga një mikrofon dhe tjetri në mikrofon të tjetër të bëjmë monolog, ja ku jemi, të ballafaqohemi dhe ti sqarojmë këto gjëra.

A keni bashkëpunuar me PS?

Nuk diskutohet që jo, është gënjeshtër shumë e madhe. Parkimi është pronë private ku unë jam pjesëtar i asaj prone me një pjesë, shumë mirë bëtë se ka qarkulluar nën zë. Do iu vë në dispozicion certifikatën e pronësisë ku unë jam pronar i asaj prone. Nëse është ky shkaku, kanë gabuar rëndë, si mund të faktojë kjo? Është pronë private që shfrytëzohet për parkim, nesër mund të bëhet diçka tjetër.

Rezultatet e mia ndër vite, rekordet, janë aty t'i hapin. Në ditën më të zezë të PD, ne kemi pasur rezultatet më të mira nga 2013 deri më sot që flasim.

Ne do dorëzojmë kërkesën, i bëmë ftesë Berishës të ngjitemi lart dhe të na vër në dijeni se për çfarë  e ka marrë aktin e përjashtimit, në daljen e fundit ka thënë që kemi votuar buxhetin e Sakos. Ja ku e keni qëndrimin tim në votimin për buxhetin e bashkisë Durrës.

Foltorja i bëri shumë mirë PD-së se i vuri në lëvizje. U vu partia në lëvizje, nisën të dalin deputetët. I thonin lidershipit nuk na vijojnë njerëzit, ne i treguam lidershipit këtu që njerëzit janë aty, por nuk u vijnë deputetëve të Durrësit. Pse nuk vijnë në Durrës, ka ardh Berisha në Sukth, pse nuk vijnë në Durrës? Unë kam qenë zëri më i fuqishëm në Durrës edhe kur u përjashtua Berisha, ne u ngritëm për padrejtësisë që iu bënë Berishës, premtuam që do kemi vlerësim meritash. Berisha edhe e ka artikuluar se s’do këtë përjashtime në PD. Jo se jam përjashtuar unë, nëse unë kam bërë diçka ta bëjnë publike dhe i marr unë përsipër fajet e mia. 

A do dalë e drejta?

Do dalin fiasko me mu, s’jam demokrat prej Berishës apo Nokës, jam demokrat me breza. Çfarëdo lloj akuze do t’i hedh poshtë.

Me biznesin tim kam vite që kontribuoj edhe tek PD e Durrësit. Kurrë skam përfituar, nëse ka diçka që kam përfituar ta bëjnë publike. Parkimi është pronë private, kam patur luftë unë me bashkinë. Bashkia e ka mbajt me të padrejtë dhe e shfrytëzonin jo pronarët e ligjshëm, është pronë private, iu vë në dispozicion certifikatën ku janë jam anëtar. Kurrë s’kam përfituar, përkundrazi jam goditur në bizneset e mia.

Rendit zhvillimet sipas orarit:

Të Fundit Të Parat