U shpall kampion me Tiranën dhe fitoi ftesën e Edi Rejës, mbrojtësi firmos në Gjeorgji

Ardit Toli ka lënë Vorskla Poltava dhe është futbollisti më i ri i Torpedo Kutaisi në Gjeorgji. 25-vjeçari luan në mbrojtje dhe në mesin e fushës, teksa do jetë në huazim për gjashtë muajt që vijnë, para se të kthehet në Ukrainë.

Mungesa e hapësirave në elitën e Ukrainës dhe vetëm 10 ndeshjet e zhvilluara, ka bërë që Toli të kërkojë një tjetër skuadër për të vijuar karrierën. Palët kanë gjetur akordin për huazimin, me rrogën që do paguhet nga klubi gjeorgjian.

Kështu, mbrojtësi i Kombëtares shqiptare ka mundësi për më shumë minuta në një tjetër ligë. Ardit Toli nuk ka humbur kohë dhe është bashkuar me ekipin e ri në fazën përgatitore, me kampionatin gjeorgjian që fillon në fundin e shkurtit. Sezonin e shkuar Torpedo zuri vendin e pestë, pa mundur të zërë një vend në Kupat e Europës.

Toli u bë i njohur në Shqipëri për aktivizimin me Tiranën, aty ku në sezonin 2021-22 u shpall kampion, duke marrë një ftesë nga ish-trajneri i Shqipërisë, Edy Reja. Kujtojmë se mbrojtësi ka dalë nga moshat e Olympiacos, duke luajtur  edhe me ekipin e parë të gjigantëve të Greqisë.

S.DH/Shqiptarja.com

TAG:
• Ardit Toli
• torpedo kutaisi
• kf tirana
• Legjionaret