Dom Gjergj Meta, ipeshkv i Rrëshenit ka shkruar disa vargje mjaft prekëse mëngjesin e sotëm lidhur me vrasjen e dyfishtë mbrëmë të vëlla e motër, Esmeralda Filopati 36 vjeçare, nënë e tre fëmijëve, dhe Vledison Filopati 34 vjeç, i cili vetëm disa ditë më parë kishte ardhur nga Italia. Ipeshkvi thotë se sot Rrëshenin e ka mbuluar një mjegull, ndërsa qyteti ra në zi dhe heshti. Dom Gjergj Meta shkruan se kaosi ka shpërfytyruar çdo kod të vjetër a të ri, kanunor apo kontinental, të shenjtë apo profan, ndërsa shkon se diçka nuk shkon në shoqërinë tonë.
Postimi i plotë i Dom Gjergj Metës për vrasjen e dyfishtë mbrëmë në Rrëshen
Tis gri në Rrëshen...
Një tis gri, bashkë me mjegullën e përhershme, ka rënë sot në mëngjes mbi Rrëshen. Mbrëmë do krisma ia rrëmbyen dy jetë të reja këtij qyteti. Tre vajza të vogla mbrëmë fjetën pa nanën e tyre. Dy prindërve mbrëmë ia vranë bamin e barkut. Vledisonit dhe Esmeraldës, vëlla e motër, mbrëmë iu mor fryma e fundit në oborr të shtëpisë në Sme. Qyteti ra në zi dhe heshti. Ah sa dhimbje! Çfarë kobi!
Aty-këtu nën zë dëgjohet: "Kush? Si? Qysh? Tek?" Vetëm psherëtima. Të gjithë ngrenë supet. E kupton edhe ti vetë se pyetjet e përgjigjet janë thjesht rutinë, kureshtje, por pa asnjë dobi. Sot dheu do të përpijë trupat e dy të rinjve. Hapen dyert e mortit për to e hapet një shteg i errët për tre vajzat jetime.
Nis i njëjti ritual si këtu e qindra e ndoshta mijëra vjet më parë:
- Zoti ju dhashtë kyvet!
- Kyvet paç!
Skena është e njëjtë. Te kryet e dy kufomave ndodhen gratë kryembuluar me veshje të zeza e vajtorja, kurse në oborr burrat që presin e përcjellin.
Si t'ua shpjegosh vajzave të vogla tani që mbrëmjeve nuk do ta shohin më nanën e tyre që vjen nga puna e që në mëngjes i çon për te shkolla? Kushedi si do shkruhet tash e mbrapa fati i tyre. E më keq akoma si t'ua shpjegosh se personi i dyshuar për vrasjen e nënës së tyre është pikërisht...?
U tronditëm përsëri! Si kemi arritur deri këtu? Çfarë po ndodh me ne?
A mos ndoshta pse vramë ato fjalë hynore: "Ju është thënë "mos vrit". Unë po ju them kushdo zemërohet me vëllanë e tij do të jetë përgjegjës para gjyqit..." ?
Apo kemi vrarë ato pak vlera që në dukje të vrazhda, mbanin dikur një shoqëri në kohezion: "Nuk qëllohet mbi gra e fmijë!"
"Burri nuk vritet kur është i shoqëruar me gra e fëmijë"?
Apo jemi duke vrarë edhe çdolloj ligji civil apo penal?
Apo mbi të gjitha kemi vrarë kodin njerëzor të jetës?
Kaosi ka shpërfytyruar çdo kod të vjetër a të ri, kanunor apo kontinental, të shenjtë apo profan. Diçka nuk shkon në shoqërinë tonë. Jeta ka vlerë sa hunda ime. Përtej saj ajo mund të dhunohet, gjymtohet dhe vritet. Kemi rënë shumë poshtë moralisht si shoqëri. E kemi përgjegjësi të gjithë.
Sot ne katolikët kemi të Mërkurën e Përhime, nisim kreshmen, kohë pendese, keqardhje për mëkatet e kthimi të zemrës kah Zoti. Mbi krye marrim hinin që ka dalë nga zjarr i druve.
Nuk kishte si të niste më gri e më trishtë kjo kreshme për ne këtu në Rrëshen.
Por sot më shumë se kurrë kemi nevojë, e unë ju ftoj sot pasdite në Katedrale në orën 16.00, që t'i lutemi Zotit për Rrëshenin tonë, për familjet tona, të rinjtë e të rejat tona e për shpirtin e Esmeraldës dhe Vledisonit.
Kemi nevojë të bëhemi tok kundër të keqes e të mos e lëmë veten pre e dëshpërimit, por me besim, shpresë e dashuri të ngulim këmbë në rrugëtimin tonë për një shoqëri më të mirë, për një Rrëshen të paqtë me Zotin në zemër!
Komente
Lajme të tjera
-
Dom Gjergj Meta: Mos jeto jetët e të tjerëve, bano jetën tënde
7 Qershor, 21:09
-
Lezhë/ Mbahen homazhe për Motër Roza Sykun në Kishën e Tales, e cila ndërroi jetë në moshën 58-vjeçare
8 Mars, 18:19
-
Rrëshen, Rama viziton shkollën profesionale! Batuta me Dom Gjergjin: Ogur i mirë kur vijmë ne! Bien kambanat
3 Mars, 13:51 -
Mirditë, rrënohet kisha e 'Shën Mitrit' në Bukmirë! Banorët kërkojnë rindërtimin e objektit 800-vjeçar
16 Shkurt, 16:19
-
Dom Gjergj Meta: Mungesa e narrativës së besueshme në kronikën e zezë
12 Shkurt, 21:56
-
Dom Gjergj Meta: Evropa nuk mund të vdes tërësisht
9 Maj 2023, 08:40
-
Sot qava...! Më erdhi turp nga njerëzit që ishin në meshë
26 Mars 2023, 22:40
-
Nis Ramazani, Dom Gjergj Meta: Agjërimi dhe Kreshma kanë përkuar pjesërisht në të njëjtën kohë, na ndihmon të shohim jetën duke forcuar besimin
23 Mars 2023, 21:17 -
Dom Gjergj Meta në Report TV: 2 janë arsyet kryesore pse shqiptarët po largohen!
27 Qershor 2022, 19:05 -
Kremtohet mesha në burgun e Spaçit, të pranishëm edhe ish të burgosur që vuajtën dënime politike
22 Qershor 2022, 08:26 -
Përkujtohet 49-vjetori i revoltës në ish-burgun e Spaçit
23 Maj 2022, 21:20 -
Kur modeli janë të fortët dhe tallavaja
11 Maj 2022, 13:55
Po kjo qyqare me kete monster ka lidhur jeten e saj,vete si kukull ai nje monster,ngushellime familjes.
Përgjigju