TIRANE- Report Tv zbardh dëshminë e nënës së vajzës 17-vjeçe që u mbyt katër ditë më parë në Velipojë. Nëna e 17-vjeçares Enisa Doda ka deklaruar para oficerëve të policisë se vajza i kishte kërkuar leje për të dalë për kafe me një shok, por që nuk u rikthye më e gjallë.

"Atë ditë vajza më kërkoi leje të dilte për kafe me një shok. I dhashë leje, ndërkohë që më vonë mësova lajmin tragjik". Deklarata është dhënë para oficerëve të policisë së Shkodrës ditën e ngjarjes kur u nxor i pajetë trupi 17-vjeçares, raporton gazetari i Report Tv Ergys Kavaja.

Enisa Doda së bashku me të njohurin e saj, Indrit Bajraktari katër ditë më parë kishin marrë një motor uji për xhiro në det. Më pas Bajraktari u kthye në breg i vetëm, duke krijuar dyshime, ndërsa kishte vetëm çelësat e motorit. Trupi i pajetë i vajzës u gjet disa orë më pas, ndërsa nga ekspertiza rezultoi se nuk kishte shenja dhune.

Sipas ekspertizës shenjat në pjesën e pasme janë si pasojë e rënies në ujë nga motori, ndërsa shenjat e nxirjes nga bllokimi i frymëmarrjes. Bajraktari ishte i martuar në Angli, ndërsa ishte në pritje të një fëmije.

Ai ishte njohur me vajzën në Facebook dhe e takoi në momentin që erdhi në Shqipëri për të takuar prindërit, teksa 17-vjeçarja ishte me pushime me familjen në Velipojë.