Këshilli i Tiranës rezolutë për transferimin e Veliajt drejt Fierit, Zhulali: Për një status në FB! Teliti: U rrëmbye dhe u paketua! Miratohet lista me 1434 familje për kredi të buta

Aldo Merkoçi ka ngritur shqetësime në mbledhjen e Këshillit Bashkiak të Tiranës lidhur me transferimin e kryebashkiakut Erion Veliaj nga paraburgimi në Durrës drejt atij të Fierit.

Gjatë fjalës së tij, Merkoçi kërkoi transparencë mbi arsyet dhe bazën ligjore të këtij vendimi, duke vënë në pikëpyetje mungesën e informacionit zyrtar për transferimin. Ai ngriti gjithashtu shqetësimin se, në kushtet e një klime të ngarkuar politike, mungesa e shpjegimeve zyrtare për një veprim të tillë mund të ushqejë dyshime për presion politik. Megjithatë, Merkoçi tha se nuk njeh motivet e vendimit dhe se pikërisht për këtë arsye institucionet duhet të japin sqarimet përkatëse.

“Politikisht kur një veprim i pazakontë dhe i pashpjeguar ndërmerret ndaj një figure politike në një moment politik të ngarkuar dyshimi se po ushtrohet presion politik nuk ka nevojë ta krijojë askush, e krijon vetë heshtja e institucioneve. Unë nuk e di motivin dhe pikërisht sepse askush prej nesh nuk duhet të hamendësojë, institucionet kanë detyrim që ta bëjnë atë të qartë. Shteti i së drejtës nuk matet vetëm me aftësinë për të arrestuar, hetuar po dënuar, matet me vetëpërmbajtjen me të cilën e ushtron forcën që i është dhënë. Sot nuk kërkoj një privilegj, kërkoj diçka më modeste dhe shumë më të rëndësishme, ligjshmëri të verifikueshme, transparencë të plotë”, theksoi Merkoçi.

Merkoçi kujtoi se një vit më parë, Këshilli Bashkiak votoi propozimin për shkarkimin e Veliajt, por më pas, sipas tij, Gjykata Kushtetuese e konsideroi atë vendim antikushtetues. Ai theksoi se Veliaj mbetet kryetari i zgjedhur i Bashkisë së Tiranës dhe se situata e krijuar kërkon vëmendje jo vetëm për aspektin ligjor, por edhe për funksionimin e institucionit.

“Dua të jem i qartë që në fillim, nuk jam këtu për të folur për fajësinë apo pafajësinë e Erion Veliajt, për këtë ka gjykatë. Nuk jam këtu as për ta viktimizuar dhe as për t’i kërkuar askujt trajtim të privilegjuar për shkak të postit që mban”, deklaroi Merkoçi, duke shtuar se kërkesa e tij lidhet me respektimin e ligjit dhe të drejtave të njeriut.

Sipas Merkoçit, Veliaj u transferua nga institucioni i paraburgimit në Durrës drejt atij të Fierit pa iu komunikuar një akt zyrtar që të shpjegonte arsyet e vendimit. Ai pretendoi gjithashtu se as avokatit të kryebashkiakut nuk i ishte dhënë informacioni i kërkuar zyrtarisht, ndërsa përmendi raportimet për vendosjen e tij në një qeli izolimi, rrethana që, sipas tij, duhet të verifikohen nga institucionet përgjegjëse.

“Pyetja ime nuk është pse Fieri, pyetja ime është ku është letra”, u shpreh Merkoçi, duke theksuar se kompetenca e administratës së burgjeve për të vendosur vendin ku mbahet një i paraburgosur nuk duhet të shndërrohet në veprim arbitrar.

Gjatë fjalës së tij, këshilltari bashkiak ngriti edhe shqetësimin për pasojat institucionale të kësaj situate. Ai tha se fakti që kryetari i zgjedhur i Bashkisë së Tiranës ndodhet në paraburgim prej rreth 20 muajsh dhe nuk mund të jetë fizikisht në zyrë ka ndikim në ushtrimin e funksioneve të institucionit.

“Dje në mëngjes një qytetar shqiptar pas afro 20 muaj paraburgimi pa një vendim gjykate u mor nga institucioni ku mbahej dhe u dërgua në një qytet tjetër pa ju dhënë asnjë akt, pa ju treguar asnjë arsye as atij as avokatit të tij që e kërkoi zyrtarisht dhe sipas asaj që raportohet edhe Avokati i Popullit po e verifikon u vendos në një qeli izolimi. Kjo është absurde”, deklaroi ai.

Në përfundim të fjalës së tij, Aldo Merkoçi propozoi dy hapa konkretë që, sipas tij, duhet të ndërmerren nga Këshilli Bashkiak i Tiranës.

“Kërkoj që ky Këshill të mos mjaftohet me fjalë. Dy veprime konkrete: Së pari, t’u drejtohemi zyrtarisht Ministrisë së Drejtësisë, Drejtorisë së Përgjithshme të Burgjeve dhe Avokatit të Popullit, duke kërkuar bërjen publike të aktit dhe të arsyeve të transferimit, garantimin e menjëhershëm të aksesit të avokatit dhe të Avokatit të Popullit, dhe verifikimin e pavarur të kushteve të mbajtjes. Së dyti, t’i kërkojmë administratës së Bashkisë, siç parashtrohet në kërkesën që kemi depozituar sot — një raport të plotë dhe të dokumentuar mbi atë që ky transferim i bën funksionimit të institucionit tonë: cilat kompetenca kanë mbetur pezull, cilat komunikime janë penguar, çfarë kostosh dhe vonesash po paguan qyteti. Jo për të bërë politikë. Për ta matur dëmin. Nëse ligjshmëria, transparenca dhe trajtimi njerëzor ekzistojnë, institucionet nuk kanë asgjë për të fshehur. Nëse nuk ekzistojnë, atëherë kemi një problem që shkon shumë përtej emrit të Erion Veliajt”, deklaroi Merkoçi.

Këshilli Bashkiak i Tiranës miratoi listën me 1,434 familje përfitues të programit të kredive të buta. Fituesit mund të nisin menjëherë procedurat për blerjen e banesës, të cilën duhet ta gjejnë brenda 18 muajve.

955 aplikantët e skualifikuar kanë 5 ditë pune kohë për të paraqitur ankimimet. Ato që do të pranohen do të shqyrtohen nga Bashkia dhe përfituesit do të përfshihen në një listë shtesë, e cila do të miratohet nga Këshilli Bashkiak. Në përfundim, numri i përfituesve pritet të arrijë në rreth 1,500 familje.

Krahas listës së fituesve, u miratua në parim edhe marrëveshja me bankën e përzgjedhur për dhënien e kredive.

Sipas marrëveshjes, në vitin e parë interesi i kredisë do të jetë fiks 2.29%, ndërsa nga viti i dytë nuk do të kalojë 3%. Nëse interesi i bankës rritet mbi këtë nivel, diferencën do ta mbulojë Bashkia e Tiranës, në mënyrë që kësti mujor i qytetarëve të mbetet i pandryshuar.

Gjatë mbledhjes së sotme të Këshillit Bashkiak të Tiranës, këshilltarët socialistë të Bashkisë Tiranë kishin përgatitur një rezolutë për transferimin e kryebashkiakut Erion Veliaj nga paraburgimi i Durrësit drejt atij të Fierit.

Në rezolutën e lexuar nga këshilltari socialist Halit Valteri, shprehej shqetësimi për këtë transferim të papritur të kryetarit të Bashkisë së Tiranës.

Po ashtu, në rezolutë kërkohet gjithashtu më shumë transparencë për vendimin e Drejtorisë së Burgjeve për transferimin e Veliajt drejt Fierit.

Rezolta e anëtarëve socialistë të Këshillit Bashkiak të Tiranës:

Lidhur me transferimin dhe kushtet e mbajtjes së Kryetarit të Bashkisë së Tiranës, Erion Veliaj

Ne, këshilltarët e Bashkisë së Tiranës, shprehim shqetësimin tonë të thellë për transferimin e papritur të Kryetarit të Bashkisë, z. Erion Veliaj, nga institucioni i paraburgimit në Durrës në atë të Fierit, si dhe për kushtet e rënda në të cilat raportohet se po mbahet.

Shqetësimi ynë bëhet edhe më serioz pas vizitës së Avokatit të Popullit në institucionin e Fierit, ku janë ngritur çështje që kërkojnë verifikim dhe ndërhyrje të menjëhershme institucionale.

Erion Veliaj është një qytetar i paraburgosur, i cili gëzon prezumimin e pafajësisë dhe të gjitha të drejtat që Kushtetuta dhe Konventa Europiane për të Drejtat e Njeriut i njohin çdo individi. Ai është gjithashtu Kryetari i zgjedhur i Bashkisë së Tiranës, mandati i të cilit është konfirmuar nga Gjykata Kushtetuese.

Asnjë masë paraburgimi nuk mund të shërbejë si justifikim për trajtim çnjerëzor apo poshtërues, për kufizime arbitrare të komunikimit me familjen dhe mbrojtësit ligjorë, apo për pengesa të pajustifikuara në marrjen e kujdesit shëndetësor.

Për këto arsye, kërkojmë nga Ministria e Drejtësisë dhe Drejtoria e Përgjithshme e Burgjeve:

1. Transparencë të menjëhershme mbi arsyet ligjore dhe faktike të transferimit.

2. Garantimin e kushteve të qëndrimit në përputhje me standardet ligjore dhe europiane, si dhe vlerësimin e menjëhershëm të nevojave shëndetësore.

3. Respektimin e plotë të së drejtës së komunikimit me familjarët dhe mbrojtësit ligjorë.

4. Verifikimin dhe heqjen e çdo kufizimi të pajustifikuar që pengon ushtrimin e të drejtave të tij.

I kërkojmë Avokatit të Popullit të bëjë publike, brenda kufijve ligjorë, gjetjet dhe rekomandimet e inspektimit të kryer.

Si anëtarë të Këshillit Bashkiak, kemi gjithashtu përgjegjësinë të kërkojmë që situata e krijuar të mos prodhojë pengesa të paligjshme për funksionimin e Bashkisë së Tiranës dhe ushtrimin e kompetencave të kryetarit të saj.

Ne nuk kërkojmë privilegje për Erion Veliajn. Kërkojmë respektimin e ligjit, dinjitetit njerëzor dhe të drejtave që i takojnë çdo qytetari.

Drejtësia nuk mund të ushtrohet duke cenuar dinjitetin njerëzor. Dhe asnjë institucion publik nuk mund të qëndrojë indiferent përballë pretendimeve serioze për shkeljen e këtyre të drejtave.